ކުރީގެ ރައީސް އަބްދުﷲ ޔާމީންގެ ސަރުކާރުގައި މުލިޔާގެ ނެގުމަށް އުޅުއްވި ކަމަށް މިނިސްޓަރު އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މައުމޫނު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓަރު ޔުމްނާ ވިދާޅުވީ ކުރީގެ ރައީސް ޔާމިންގެ ވެރިކަމުގައި އެކަމަނާ ޑިޕާޓްމަންޓް އޮފް ހެރިޓޭޖްގެ އެންމެ އިސްވެރިއެއްގެ ގޮތުގައި ހުންނެވިއިރު އެކަމުގެ މައުލޫމާތު ލިބިވަޑައިގެންނެވި ކަމަށެވެ.
މިނިސްޓަރު ޔުމްނާ ވިދާޅުވީ ރައީސް ޔާމިންގެ ސަރުކާރުން އާސާރީ ތަންތަން ހިމާޔަތް ކުރުމުގެ ވިސްނުންފުޅު ނުގެންގުޅޭ ކަމަށާއި، އެސަރުކާރުގެ ބޭފުޅުންގެ ވިސްނުންފުޅު ހުރީ އަސާރީ ތަންތަން އުވާލުމަށްފަހު ތަރައްގީގެ ނަމުގައި ބޮޑެތި އުސް އިމާރާތްތައް ގެނައުން ކަމަށެވެ.
އެގޮތުން ސަލްޓަން ޕާކުގައި ހަމައެކަނި އިމާރާތް އުސްގެކޮޅު ނެގުމަށް ވެސް މަސައްކަތް ކުރި ކަމަށާއި، ނަމަވެސް ހެރިޓޭޖުން ކުރިން މަސައްކަތުން އެގެކޮޅު ނުގަނަގާ ތަފާތު ބޭނުމަކަށް ބޭނުން ކުރެވޭ ގޮތަށް އޭރު ޕްލޭން ކުރެވިގެންދިޔަ ކަމަށެވެ. އެހެންކަމުން އުސްގެކޮޅު ސަލާމަތް ކުރެވުނީ ކަމަށް މިނިސްޓަރު ޔުމްނާ ވިދާޅުވިއެވެ.
މީގެ އިތުރަށް މިނިސްޓަރު ވިދާޅުވީ ރައީސް ޔާމީންގެ ސަރުކާރުން މުލިޔާގެ ނެގުމަށް މަޝްވަރާކުރި ކަމަށާއި، ގަބޫލުކުރަން ދަތި އެތަކެއް އަޑުތަކެއް އިވިވަޑައިގެންނެވި ކަމަށެވެ.
"މުލިޔާ ގެއަކީ ވެސް ވަރަށް ދުވަސްވީ އަޅުގަނޑުމެންގެ މުހިންމު ތާރީހީ ބިނާއެއް. އެތަނުން އެތަން ނަގާފަ އުސްއިމާރާތެއް އެޅީމަ އަޅުގަނޑުމެންގެ އަމިއްލަ މުހިންމު ބިނާއެއް ގެއްލުނީ. މިހާރު ވެސް ފަތުރުވެރިން އައިސް ބަލާލަން ދަނީ ހުކުރު މިސްކިތާއި މުލިޔާގެއާ މެދު ޒިޔާރާތް ދިމާލަށް. އެއީ ހެރިޓޭޖް މުހިންމު ސައިޓަކީ. އެތަންތަން ނެތް ކަމަށްވަންޏާ ފަތުރުވެރިން ޒިޔާރަތް ކުރާނެ މާބޮޑުތަނެއް މާލޭގައި ނޯންނާނެ ތެދެއްތޯ. އެހެން ގައުމަކަށް މާބޮޑު ތަފާތު ވާނެ ސިފަތަކެއް ކޮބައިތޯ މާލޭގައި." މިނިސްޓަރު ޔުމްނާ ވިދާޅުވިއެވެ.
މިނިސްޓަރު ޔުމްނާ ވިދާޅުވީ ރައީސް ޔާމީންގެ ސަރުކާރުގައި ޑިޕާޓްމަންޓް އޮފް ހެރިޓޭޖް ހިންގަވާ އެންމެ އިސްވެރިއެއްގެ ގޮތުގައި ހުންނެވިފަހު އިސްތިއުފާ ދެއްވީ ވެސް އާސާރީ ތަންތަން ހިމާޔަތް ނުކުރެވިގެން ކަމަށާއި، މިފަދަ ތަންތަން ހިމާޔަތް ނުކުރެވޭ ކަމަށްވާނަމަ މަގާމުގައި ހުރުމުގެ އެއްވެސް ބޭނުމެއް ނެތުމުން ކަމަށެވެ.
ނަމަވެސް ރައީސް އިބްރާހިމް މުހައްމަދު ސޯލިހުގެ ސަރުކާރުން އަސާރީ ތަންތަން ހިމާޔަތްކޮށްދެއްވާނެ ކަމުގެ އުންމީދު ވަރަށް ބޮޑަށް އެބައޮތް ކަމަށާއި، މިސަރުކާރުން ގައުމަށް ތަރައްގީ ގެނެސްދެއްވާނީ އަސާރީ ބިނާތަކާއެކު ކަމަށް މިނިސްޓަރު ޔުމްނާ ވިދާޅުވިއެވެ.
ރައީސް ޔާމީންގެ ސަރުކާރުގައި މުލިޔާގެ ނަގަން އުޅުއްވި ކަމަށް މިނިސްޓަރު ޔުމްނާ ވިދާޅުވިއިރު، މުލިޔާ ގެއަކީ ރައީސުން ދިރިއުޅުއްވުމަށް ހަދާފައިވާ ވަރަށް ޒަމާންވީ ގެކޮޅެކެވެ. ނަމަވެސް ރައީސް ޔާމީންގެ މުލިޔާގެއަށް ބަދަލުވެވަޑައިނުގަންނަވާ މުލިޔާގެ ބޭނުންކުރެއްވީ އެމަނިކުފާނުގެ ސިޔާސީ ކެންޕޭންގެ މަސައްކަތާއި، ރައީސް ޔާމީންގެ އަނބިކަނބަލުން ފާތިމަތު އިބްރާހިމްގެ ސަދަގާތު ފައުންޑޭޝަންގެ ގިނަ ހަރަކާތްތައް ވެސް ކުރިއަށް ގެންދިއުމަށްށެވެ.
މުލިޔާގެގައި ކުރީގެ ރައީސް މުހައްމަދު ނަޝީދުގެ އިތުރުން ކުރީގެ ރައީސް މައުމޫން އަބްދުލްޤައްޔޫމް ވެސް ދިރިއުޅުއްވިއެވެ. އަދި މިހާރު ރައީސް ސޯލިހު ވެސް ދިރިއުޅުއްވަމުން ގެންދަވަނީ މުލިޔާ ގޭގައެވެ.
