މާމުއި ފިލްމުގެ ޕޯސްޓަރު ނެރެފި
17 ޑިސެމްބަރު 2018 | ހޯމަ 20:32މިފިލްމު ރިލީޒް ކުރުމަށް ހަމަޖެހިފައިވަނީ އަންނަ އަހަރުގެ ޖުލައިގައި
މާމުއި ފިލްމުގެ ޕޯސްޓަރާއެކު ފިލްމުގެ ބައެއް ބައިވެރިން
ޑާކްރެއިން އެންޓަޓެއިންމެންޓުން އަންނަ އަހަރު ރިލީޒް ކުރާ މާމުއި ފިލްމުގެ ޕޯސްޓަރު ނެރެފިއެވެ.
މިފިލްމުގެ ޕޯސްޓަރު ނެރުމަށް ހޯމަ ދުވަހުގެ ރޭ ބޭއްވި ކުޑަ ހަފްލާގައި މިފިލްމުގެ ޑައިރެކްޓަރު އަލީ ޝިފާއު ބުނީ މިޕޯސްޓަރުން ގިނަ މާނަތަކެއް ދޭހަވާނެ ކަމަށެވެ.
މާމުއި ފިލްމަށް އިޝާރާތްކޮށް ޝިފާއު ބުނީ މިމުޖުތަމައުގައި ގިނަ މައްސަލަތަކެއް ހިނގަމުންދާއިރު، ދެމަފިރިން ދޭތެރޭގެ މައްސަލަތަކާއި، އެއްބަނޑުއެއްބަފާ މީހުންގެ މައްސަލަތަކާއި، އަދި ރައްޓެހިންގެ ދޭތެރޭގައި ހުންނަ މައްސަލަތަކުގެ އިތުރުން ގިނަ މައްސަލަތައް މިފިލްމުން މަޖާ ގޮތަކަށް ފެނިގެންދާނެ ކަމަށެވެ. އަދި މިފިލްމުން ގިނަ މެސެޖްތަކެއް ބެލުންތެރިންނަށް ލިބޭނެ ކަމަށް ޝިފާއު ބުންޏެވެ.
"ފުރަތަމަ އިންނަނީ ވަރަށް ބޮޑުކޮށް ދެމީހުން. މަޑުމަޑުން މިފެންނަނީ ކުޑަ މީހުން. މާމުއި ފުޅިއެއް ހިފަހައްޓާގެން ހުންނަތަން ވެސް ފެންނާނެ. މާމުއި ހަތައެއް ވެސް ފެންނާނެ. ކާޑުތަކެއް ވެސް ފެންނާނެ. މިހެން އަތުރާފަ ހުރި އެއްޗިއްސެއްނޫން އެއީ. ކޮންމެ އެއްޗެއްގައި މާނައެއްވޭ. ހަގީގަތުގައި މާމުއި މިއަންނަނީ ކުޅަދުރު ހަތައަކުން. ހަތާ މި ދައްކައިދެނީ ކޮމިއުނިޓީ އަސްލު." ޝިފާއު ބުންޏެވެ.
ޝިފާއު ބުނީ މިފިލްމުން އައު ތަރިން ފެނިގެންދާނެ ކަމަށާއި، މިފިލްމު ހެދުމުގެ މަސައްކަތުގައި ޖުމްލަ 50 އަށްވުރެ ގިނަ މީހުން ހަރަކާތްތެރިވި ކަމަށެވެ.
މާލޭގައި ޝޫޓް ކުރި މިފިލްމު ރިލީޒް ކުރަނީ އަންނަ އަހަރުގެ ޖުލައި މަހުގެ ތެރޭގައެވެ.
