ރާއްޖެޓީވީގެ "ދަންބައި"ގެ ޓްރެއިލާ ނެރެފި
"ދަންބައި" ކާމިޔާބު ކަމާއެކު ރާއްޖެޓީވީން ގެންސްދޭތާ މިއީ 4 ވަނަ އަހަރު
ދަންބައިގެ ޝޫޓިންގެ ތެރެއިން
ރަމަޟާން މަހުގެ ރާއްޖެޓީވީން ގެނެސްދޭ ޕްރޮގްރާމްތަކުގެ ތެރެއިން އާންމުންގެ ވަރަށް ބޮޑު މަގުބޫލުކަމެއް ހޯދައިފައިވާ ޝޯ "ދަންބައި"ގެ ޓްރެއިލާ ހުކުރުދުވަހު އާންމުކޮށްފިއެވެ.
ރާއްޖެޓީވީގެ ކެމެރާމަން، އާދަމް ޒަރީރު ޑައިރެކްޓްކޮށް، ހުށަހަޅައިދޭ ހެއްވާ މަޖާ މި ޕްރޮގްރާމްގެ ޓްރެއިލާ އާންމުކުރީ ރާއްޖެޓީވީގެ މޯނިން ޝޯ "ފަށާއިރު" ޕްރޮގްރާމްގެ ތެރެއިންނެވެ.
ޒަރީރު ބުނި ގޮތުގައި އެހެން އަހަރުތަކާ ހިލާފަށް މިފަހަރުގެ" ދަންބައި"ގައި ތަފާތު ސެގްމެންޓްތަކާއި ކޮމެޑީ އެތައް ބައިތަކެއް ހިމެނިގެންދާނެއެވެ.
މިފަހަރު އެހެން އަހަރުތަކަށް ވުރެ އިތުރަށް ފުރިހަމަވާނެ ކަމަށް ޒަރީރު ބުންޏެވެ." ދަންބައި"ގައި އަބަދުވެސް އަންނަ ސެގްމެންޓް ކަމަށްވާ "ގަމަރު ހަބަރު" މިފަހަރު ތަފާތު ވެފައި ޝައުގުވެރިކަން އިތުރުވާނެ ކަމަށް ވެސް ޒަރީރު ބުންޏެވެ. ޒަރީރު ބުނީ އަބަދުވެސް ބަލަނީ ރާއްޖޭގައި އެއިރެއްގައި ހިނގާ ސިޔާސީ ކަންތައްތައް މަޖާޒީ ގޮތެއްގައި ގެނެސްދެވޭތޯ ކަމަށެވެ.
"ބެލުންތެރިންނަށް ބުނެލަން އޮތީ ދަންބައި މިދިޔަ އެހެން ޕްރޮގްރާމްތަކަށްވުރެ ތަފާތުވާނެކަމަށް" ޒަރީރު ބުންޏެވެ.
މިފަހަރުވެސް "ދަންބައި" ހުށައަޅައިދެނީ ޒަރީރު އާއި އާދަމް ސުފިޔާނެވެ. ރާއްޖެޓީވީން "ދަންބައި" ދައްކާނީ ރަމަޟާން މަހުގެ ކޮންމެ ބުރާސްފަތިދުވަހެއްގެ ރޭގަނޑު 1:00 ގައެވެ.
"ދަންބައި" ކާމިޔާބު ކަމާއެކު ރާއްޖެޓީވީން ގެންސްދޭތާ މިއީ ހަތަރު ވަނަ އަހަރެވެ. މި ޕްރޮގްރާމް ސްޕޮންސަރކޮށްފައި ވަނީ ޕިރަމިޑުންނެވެ.
