ރިލުވާނާއި، ޔާމީނުގެ ވާހަކައާ އެކު ރައީސް ސޯލިހް ފެންކަޅިވެއްޖެ
11 ޑިސެމްބަރު 2018 | އަންގާރަ 23:21ރައީސް ސޯލިހު ވާހަކަފުޅު މެދުކަނޑާލެއްވި
ރައީސް ސޯލިހު ވާހަކަފުޅު ދައްކަވަނީ
ގެއްލުވާލާފައިވާ ނޫސްވެރިޔާ އަހުމަދު ރިލުވާނާއި، އަނިޔާވެރި ގޮތަކަށް މަރާލި ބްލޮގަރ ޔާމީނު ރަޝީދުގެ ހަނދާން އައުކުރައްވައި، ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފެންކަޅިވެއްޖެއެވެ.
ދިވެހި ނޫސްވެރިކަމުގެ އަލިމަސްޔޫބިލް ފާހަގަކުރުމަށާއި، އެކި ރޮނގުތަކުން މިދިޔަ އަހަރުގެ އެންމެ މޮޅު ނޫސްވެރިންނަށް އިނާމު ދިނުމަށް ދަރުބާރުގޭގައި އަންގާރަ ދުވަހުގެ ރޭ ބޭއްވި ޖަލްސާ ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ސޯލިހު ވިދާޅުވީ، ނޫސްވެރިކަމުގެ އަލިމަސްޔޫބީލް ފާހަގަކުރާ އިރު، އަލްވަދާއު ކިޔާފައިވާ ދެ ނޫސްވެރިއެއްގެ ހަނދާން އައުކުރަންޖެހޭ ކަމަށެވެ. އަދި ވިދާޅުވީ ރިލްވާންއާ، ޔާމިންގެ ވަކިވުމަކީ، ދިވެހި ނޫސްވެރިންގެ އާއިލާއަށް ލިބުނު ވަރަށް ބޮޑު ހިތާމައެއް ކަމަށާއި، ހިތްދަތިކަމެއް ކަމެއް ކަމަށެވެ.
މިހެން ވިދާޅުވުމަށްފަހު، އެމަނިކުފާނަށް އިރުކޮޅަކަށް ވާހަކަފުޅު ނުދައްކަވާ މަޑު ކުރެއްވިއެވެ. އަދި ފަހުން ވާހަކަފުޅު ދެއްކެވީ ކުރެހިފައިވާ އަޑަކުންނެވެ. އަޑުގައި ތުރުތުރު އެޅުމެއް ހުރިއިރު ރައީސް ސޯލިހުގެ މޫނުފުޅުމަތިން ވެސް އެހިތާމަވެރިކަން ފެނިގެން ދިޔައެވެ.
އިރުކޮޅަކަށް ވާހަކަފުޅު މެދުކަނޑާލެއްވުމަށްފަހު އެއަށްވުރެ ހަރުއަޑުން ރައީސް ސޯލިހު ވިދާޅުވީ މި ދެ މައްސަލަ އަޅާ ނުލައި ދޫކޮށްނުލައްވާނެ ކަމަށާއި، މިހާދިސާގެ ހަގީގަތް ހޯއްދަވާނެ ކަމަށެވެ. އަދި މިފަދަ ކަންކަމުގެ ހަގީގަތް ދެނެގަތުމަށްޓަކައި، ވެރިކަމުގެ ފުރަތަމަ ދުވަހު "މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަން"ގެ ނަމުގައި ކޮމިޝަނެއް އުފައްދާފައިވާ ކަން އެމަނިކުފާނު ފާހަގަކުރެއްވިއެވެ.
"އިރާދަ ކުރެއްވިއްޔާ، އެ ކޮމިޝަންގެ އެހީތެރިކަމާ އެކު، އެ ދެ މައްސަލައިގެ ޙަޤީޤަތާ ހަމައަށް އަޅުގަނޑުމެންނަށް ވާސިލުވެވޭނެ. އަޅުގަނޑު އުންމީދުކުރަނީ، އިންސާނިއްޔަތުކަމެއް ނެތި ހިންގާފައިވާ އެ ދެ ޖަރީމާގެ ޙަޤީޤީ ކުށްވެރިން ހޯދައި، އެކަމުގެ ޙަޤީޤަތް ހާމަކުރެވޭނެ ކަމަށް. އެ ކޮމިޝަނުން އެ މަސައްކަތް އަވަސް ކޮށްދެއްވާނެ ކަމަށް އުންމީދު ކުރަން،" ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ ވެރިކަމަށް ވަޑައިގެންނެވީ ވެސް ޚިޔާލު ފާޅުކުރުމާއި ނޫސްވެރިކަމުގެ މިނިވަންކަމުގެ ޙައްޤު ކަށަވަރުކޮށްދިނުމުގެ ވަޢުދާ އެކު ކަމަށެވެ.
ރައީސް ސޯލިހު ވިދާޅުވީ ވެރިކަމާ ހަވާލުވުމަށްފަހު، ނޫސްވެރިންނަށް އޮތް ބިރުވެރިކަމުން ނޫސްވެރިން ސަލާމަތް ކުރުމުގެ މަސައްކަތް ފަށާފައިވާ ކަމަށެވެ. އެގޮތުން އެންމެ ފުރަތަމަ ތަޞްދީޤު ކުރި ބިލަކީ، އަބުރުގެ ޤާނޫނު އުވައިލުމުގެ ބިލްކަން އެމަނިކުފާނު ފާހަގަކުރެއްވިއެވެ.
