ޗީފް އޮފް ޑިފެންސް ފޯސްގެ މަގާމަށް ޝަމާލު

ޗީފް އޮފް ޑިފެންސް ފޯސްގެ މަގާމަށް މޭޖަރ ޖެނެރަލް އަބްދުﷲ ޝަމާލް އަދި ވައިސް ޗީފް އޮފް ޑިފެންސްގެ މަގާމަށް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފް އައްޔަން ކުރައްވައިފި އެވެ.

ރައީސުލް ޖުމްހޫރިއްޔާ އަދި ސިފައިންގެ އެންމެ މަތީވެރިޔާ މި ދެ ބޭފުޅުންނަށް އެ މަގާމު އަރުއްވާފައި ވަނީ އަންގާރަ ދުވަހުގެ ރެ އެވެ. އަދި ޗީފް އޮފް ޑިފެންސް ފޯސްގެ މަގާމުގައި ކުރިން ހުންނެވި އަހްމަދު ޝިޔާމާއި ވައިސް ޗީފް އޮފް ޑިފެންސް ފޯސްގެ މަގާމުން އަހްމަދު ޝާހިދު ވަނީ ވަކި ކުރައްވާފައި އެވެ.

މޭޖަރ ޖެނެރަލް ޢަބްދުﷲ ޝަމާލް ޗީފް އޮފް ޑިފެންސް ފޯސްގެ މަޤާމަށް ޢައްޔަނު ކުރައްވާފައި ވަނީ ސްޓޭޓް މިނިސްޓަރ ފެންވަރުގައެވެ. އަދި ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފް ވައިސް ޗީފް އޮފް ޑިފެންސް ފޯސްގެ މަގާމަށް ޢައްޔަނު ކުރައްވާފައިވަނީ މިނިސްޓަރުގެ ނާއިބު ފެންވަރުގައެވެ.

ޝަމާލު ސިފައިންގެ ވަޒީފާއިން 2013 ވަނަ އަހަރު ވަކި ކޮށްފައިވާ މައްސަލަ ބެލުމަށްފަހު އަނބުރާ ވަޒީފާ ދިނުމަށް ހައި ކޯޓުން އަމުރުކޮށްފައި ވަނީ ވެސް އަންގާރަ ދުވަހު އެވެ. ނޮވެމްބަރު، 2013 ގައި ޝަމާލް ސިފައިންގެ އިން ވަކިކުރީ ސިފައިންގެ ތެރޭގައި ބައިބައިވުން އުފެދިފައިވާ ކަން ހާމަ ކުރުމުގެ ބޭނުމުގައި ލިޔުމެއް ސޯޝަލް މީޑިއާގައި އާންމުކޮށް، ސިފައިންގެ ތެރޭގައި ފިތުނަ އުފެދޭ ގޮތަށް މަސައްކަތް ކޮށް، މަސްލަހަތު ނަގާލަން އުޅުނު ކަމަށް ބުނެ އެވެ.

ޝަމާލް ވަޒީފާ އިން ވަކިކޮށްފައިވާ މައްސަލައިގައި ހައި ކޯޓުން ހުކުމްކުރީ ޝަމާލް ވަކިކުރީ ގާނޫނާ ޚިލާފަށް ކަމަށެވެ. އެހެންވެ، އޭނާ ކުރިން ހުރި ފެންވަރުގެ ވަޒީފާ އެއް 15 ދުވަހުގެ ތެރޭގައި އަލުން ދިނުމަށް ވަނީ ހުކުމް ކޮށްފަ އެވެ. އަދި ވަކިކުރި ދުވަހުން ފެށިގެން ވަޒީފާ އަނބުރާ ދިނުމާ ހަމައަށް ލިބެންޖެހޭ މުސާރަ އާއި އިނާޔަތްތައް ވެސް 30 ދުވަހުގެ ތެރޭގައި ޝަމާލަށް ދިނުމަށް ހުކުމުގައި އަންގާފައިވެ އެވެ. ޝަމާލް އަކީ 25 އަހަރަށް ވުރެ ގިނަ ދުވަސް ވަންދެން ސިފައިންގެ ވަޒިފާ އަދާ ކުރައްވާފައިވާ ބޭފުޅެކެވެ.