ރައީސް ސޯލިހު އުކުޅަހަށް ވަޑައިގަންނަވަނީ

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހޯމަދުވަހު އއ.އުކުޅަހަށް ވަޑައިގަންނަވާ ގޮތަށް ހަމަޖެހިއްޖެއެވެ.

އއ.އުކުޅަހު ކައުންސިލްގެ ރައީސް ޝައުކަތު އިބްރާހިމް ވިދާޅުވީ ރައީސުލްޖުމްހޫރިއްޔާ ހޯމަދުވަހު ހެދުނު 9.20 ގައި އުކުޅަހަށް ވަޑައިގަންނަވާ ގޮތަށް ހަމަޖެހިފައިވާ ކަމަށާއި، އެ ރަށުން އެބުރިވަޑައިގަންނަވާނީ ހޯމަދުވަހު މެންދުރު 1.30 ގައި ކަމަށެވެ.

ޝައުކަތު ވިދާޅުވީ ރައީސުލްޖުމްހޫރިއްޔާގެ މި ދަތުރުފުޅުގައި އުކުޅަހު ކައުންސިލް ވެބްސައިޓް ލޯންޗްކުރުމަށް ހަމަޖެހިފައިވާ ކަމަށެވެ. ޝައުކަތު ވިދާޅުވީ މުއައްސަސާތަކުގެ އިސްވެރިންގެ އިތުރުން އުކުޅަހުގެ ރައްޔިތުންނާއި، ރަށުގެ ވިޔަފާރިވެރިންނާއި ރައީސުލްޖުމްހޫރިއްޔާގެ މި ދަތުރުފުޅުގައި ބައްދަލުކުރައްވާ ގޮތަށް ހަމަޖެހިފައިވާ ކަމަށެވެ.

ރައީސް ސޯލިހުއަށް އެމްޑީޕީގެ ރިޔާސީ ޓިކެޓް އެރުވުމަށް ބޭއްވި އެމްޑީޕީގެ ކޮންގްރެސް ބާއްވާފައިވަނީ އުކުޅަހުގައެވެ. ރައީސް މުހައްމަދު ނަޝީދު މާލެ ވަޑައިގެން ތިންވަނަ ރަށަކަށް ވަޑައިގެންނެފައިވަނީވެސް އުކުޅަހަށެވެ. އެދަތުރުފުޅުގައި ރައީސް ނަޝީދު ވިދާޅުވީ ރައީސް ސޯލިހް ބުރަކޮށް އުޅުއްވާތީ އެރަށަށް ވަޑައިނުގެންނެވުނު ކަމަށާއި، ވަރަށް އަވަހަށް އެރަށުގެ ރައްޔިތުންނާއި ބައްދަލު ކުރައްވަން ވަޑައިގަންނަވާނެ ކަމަށެވެ.

އުކުޅަހަކީ އެމްޑީޕީއަށް ބޮޑު ތާއީދެއް އޮންނަ ރަށެކެއެވެ.