ބޯކޮށް ވާރޭ ވެހެމުން ދިއުމާއި ގުޅިގެން މާލޭގެ އެކި ސަރަހައްދުތަކުގައި ފެންބޮޑުވެއްޖެއެވެ.

ބުދަ ދުވަހުގެ ހެނދުނުން ފެށިގެން މާލެއަށް ކުރަމުންދާ ވިއްސާރައިގެ ސަބަބުން ގިނަ މަގުތަކެއްގައި ހިނގައިބިނގައިވެ އުޅެން ދަތިވާ ވަރަށް ވަނީ ފެންބޮޑުވެފައެވެ. އަދި ބައެއް ގެތަކަށާއި ފިހާރަތަކަށް ވެސްވަނީ ފެންވަދެފައެވެ. މާލޭގެ މަގުތަކުގައި ފެންބޮޑުވެފައިވާއިރު، އެމްއެންޑީއެފްއިން ދަނީ ފެންހިއްކުމުގައި ހަރަކާތްތެރިވަމުންނެވެ.

ރާއްޖެޓީވީއަށް މައުލޫމާތު ދެއްވަމުން މެޓް އޮފީހުން ބުނެފައިވަނީ މިހާތަނަށް މާލެއަށް އެކަނިވެސް 140 މިލިމީޓަރުގެ ވާރޭވެހިފައިވާ ކަމަށެވެ.

ރާއްޖެއަށް މިހާރު ކުރަމުންދާ މޫސުމީ ވިއްސާރައިގައި މާލޭގެ ދެ ގެއެއްގައި ވަރަށް ބޮޑަށް ފެންބޮޑުވެ، އެގޭގޭގައި ދިރިއުޅޭ މީހުންވަނީ ވަގުތީ ގޮތުން އެހެން ތަނަކަށް ބަދަލުކޮށްފައިވެއެވެ. ބުދަ ދުވަހު ޑިފެންސް މިނިސްޓަރ މާރިޔާ އަހުމަދު ދީދީ ދެއްވި ޕްރެސް ކޮންފަރެންސެއްގައި ވިދާޅުވީ ހާލުގައި ޖެހުނު މީހުންނަށް އެހީ ވުމުގެ މަސައްކަތް ޑިޒާސްޓާ މެނޭޖްމަންޓްގެ ބެލުމުގެ ދަށުން ކުރިއަށްދާ ކަމަށެވެ. އަދި އެމްއެންޑީއެފްގެ ހުރިހާ ސިފައިންވެސް މަގު މައްޗަށް ނެރެގެން މަސައްކަތްކުރަމުން އަންނަ ކަމަށް މިނިސްޓަރ ވިދާޅުވިއެވެ. ވިއްސާރަގައި ސަބަބުން ހާލުގައި ޖެހުނު މީހުންނަށް އެހީވުމަށް ޑިޒާސްޓަރ މެނޭޖްމަންޓުންދަނީ ކަލާފާނު ސްކޫލްގައި މަރުކަޒު ހަދައި އެ ސްކޫލްގައި ހަރަކާތްތެރިވަމުންނެވެ.

ޑިޒާސްޓާ މެނޭޖްމަންޓްގެ ފަރާތުން ވާހަކަދެއްކެވި އިހްސާން ހަސަން ވިދާޅުވީ ފުލުހުންނާއި ރެޑް ކްރެސެންޓުގެ ބޭފުޅުން އެކުލެވޭގޮތަށް އެ ތަނުގެ ޓީމްތަކެއް މިހާރު މިހާރު މާލެ ތެރޭގައި ހަރަކާތްތެރި ވަމުންދާކަމަށެވެ. އަދި މީގެ އިތުރުން އެ ބޭފުޅާ ވަނީ މިކަހަލަ ދަނޑިވަޅެއްގައި ހުރިހާ ރައްޔިތުންގެ ފަރާތުން އެއްބާރުލުން ދިނުމަށް އިލްތިމާސްކޮށްފައެވެ.

މާލޭ ސިޓީ އަށް ބޯކޮށް ވާރޭ ވެހެމުން ދާތީ ޓެކްސީ ދަތުރުކުރާ ފަރާތްތަކުން ޓެކްސީގެ ޚިދުމަތް މެދުކަނޑާނުލުމަށް ޓްރާންސްޕޯޓް މިނިސްޓަރ އައިޝަތު ނަހުލާވަނީ އިލްތިމާސް ކުރައްވާފައެވެ.

ބުދަ ދުވަހު މާލޭ ސިޓީއަށް ކުރަމުންދާ ވިއްސާރައާއި ގުޅިގެން މިނިސްޓަރ ކުރައްވާފައިވާ ޓްވީޓް ގައި ޓެކްސީތައް ޕާކް ކޮށްފައި ނުބާއްވާ އާންމުންގެ ޚިދުމަތަށް ނުކުތުމަށް އިލްތިމާސް ކުރައްވާފައެވެ. އަދި ވިއްސާރަ ދުވަސްވަރު މަގުތައް ބޭނުންކުރުމުގައި ދުއްވާ މީހުންނާއި ހިނގާ މީހުން އިތުރަށް ސަމާލުވުމަށާއި ޕާކް ކުރުމުގައި ހުރިހާ ރައްޔިތުންގެ ހައްގުތައް ރައްކާތެރި ކުރުމަށް ވަނީ ނަސޭހަތްތެރިވެފައެވެ.

ވާރޭ ވެހުމުގެ ސަބަބުން މާލޭގައި ފެން ބޮޑުވުމުގެ މައްސަލައަކީ ޒަމާނުއްސުރެން ހައްލެއް ނުލިބިފައި އޮތް ކަމެކެވެ. ނިމިގެންދިޔަ ސަރުކާރުން ވަނީ މި މައްސަލް ހައްލު ކުރުމަށް ޕްރޮޖެކްޓްތަކެއް ހިންގާފައެވެ. އެގޮތުން އަމީނީ މަގުގައި "ސްޓޯމް ޑްރެއިނޭޖް ސިސްޓަމް" ތަކެއް ވެސް ހަރުކުރިއެވެ. ނަމަވެސް މާލޭގައި މި ފަހުން ފެންބޮޑުވެގެން އޭރުގެ ހައުސިން މިނިސްޓަރު، ޑރ. މުހައްމަދު މުއިއްޒުއާއި ސުވާލުކުރުމުން ވިދާޅުވެފައިވަނީ އެ ސިސްޓަމްތައް މަސައްކަތް ނުކުރީ ބަޔަކު އެ ސިސްޓަމްތަކަށް ގެއްލުން ދީގެން ކަމަށެވެ.