ކުރީގެ ރައީސް މުހައްމަދު ނަޝީދުގެ މައްޗަށް ކޮށްފައިވާ ޖަލު ހުކުމް ސުޕްރީމް ކޯޓުން ބާތިލް ކުރިކުރުމަކީ ކަންކަން އިސްލާހު ވަމުން އަންނަ ކަމުގެ ނިޝާނެއް ކަމަށް އިންސާނީ ހައްޤުތަކަށް މަސައްކަތްކުރާ ބައިނަލްއަޤްވާމީ ވަކީލު ޖެރަޑް ޖެންސަރ ވިދާޅުވެއްޖެއެވެ.

ހުކުރު ދުވަހު ރާއްޖެޓީވީއަށް ދެއްވި ޚާއްސަ އިންޓިވިއުއެއްގައި ޖެރަޑް ވިދާޅުވީ ރައީސް ނަޝީދަށް އިއްވި 13 އަހަރުގެ ޖަލު ހުކުމަކީ ބާތިލް، އެއްވެސް އަސާސެއް ނެތް އަދި ބައިނަލްއަޤްވާމީ ގާނޫނުތަކާއި ހިލާފު ނިންމުމެއްކަން މާކުރިން ވެސް އެނގޭ ކަމަށެވެ.

ޖެރަޑް ވިދާޅުވީ ރައީސް ނަޝީދުގެ މައްސަލައަކީ އދގެ ވަރކިންގ ގްރޫޕް އޮން އާބިޓްރަރީ ޑިޓެންޝަން އަދި ހިއުމަން ރައިޓްސް ކައުންސިލުން ބާތިލް ހުކުމެއް ކަމަށް ނިންމާފައިވާ މައްސަލައެއް ކަމަށެވެ. އަދި ކުރީގެ ރައީސް ޔާމީންގެ ސަރުކާރުން އޭނާއަކީ ރާއްޖޭގެ ދުޝްމަނެއް ކަމަށް ލޭބަލްކޮށް ޑީޕޯޓް ކޮށްލާފައިވާ ކަމަށެވެ. ނަމަވެސް އެތައް ފިއްތުންތަކަކަށްފަހު ރައީސް ނަޝީދަށް ރާއްޖެއަށް ވަޑައިގެންނެވުމުން އުފާވާކަން ފާހަގަކުރައްވައި ޖެރަޑް ވިދާޅުވީ ދުވަސްތަކަކަށްފަހު ރައީސް ނަޝީދުގެ މައްޗަށް އަސްލު ހުކުމް ނެރެން ޖެހޭ ގޮތަށް އެހުކުމް އައުމުން ވަރަށް ބޮޑަށް ހިތްހަމަޖެހޭ ކަމަށެވެ. އަދި މިފަހަރުގެ ހުކުމް އެއޮތީ ކުރިން ކުރި ހުކުމާއި ދިމާ އިދިކޮޅަށް ކަމަށް ވެސް ޖެރަޑް ފާހަގަކުރެއްވިއެވެ.

ޖެރަޑް ވިދާޅުވީ ރައީސް ނަޝީދުގެ މައްޗަށް ކުރި ހުކުމް ސުޕްރީމް ކޯޓުން ބާތިލް ކުރުމަކީ ކަންކަން އިސްލާހުވަމުން އަންނަ ކަމުގެ ނިޝާނެއް ކަމަށާއި، އިންސާފާ ހަމަހަމައަށް ކަންކަން ނިންމާ، ރަނގަޅު ނިންމުންތަކަށް އެންމެހާ ރައްޔިތުން އެއްބާރުލުން ދޭންޖެހޭ ކަމަށެވެ.

އެގޮތުން އިންސާނީ ހައްޤުތަކުގެ ގާނޫނީ ތަކާއި ހިލާފުނުވެ މައްސަލަތައް ބަލާ ފިޔަވަޅު އަޅަން ޖެހޭ ކަމަށާއި، އަނިޔާ ލިބޭ ފަރާތްތަކަށް އެމީހެއްގެ ހައްގު ލިބެންޖެހޭ ކަމަށް ވެސް ޖެރެޑް ވިދާޅުވިއެވެ.

ރައީސް ނަޝީދުގެ މައްޗަށް 2015 ވަނަ އަހަރު 13 އަހަރުގެ ޖަލު ހުކުމެއް އިއްވީ އެމަނިކުފާނުގެ ވެރިކަމުގައި ގާނޫނާއި ހިލާފަށް ފަނޑިޔާރަކު ހިފާ ހައްޔަރު ކުރުމުގެ ތުހުމަތުގައެވެ. އަދި މިހުކުމް މިއަހަރުގެ ނޮވެންބަރު މަހު 26 ވަނަ ދުވަހު ސުޕްރީމް ކޯޓުން ވަނީ ބާތިލްކޮށްފައެވެ.