ޖޮއިންޓް ޕީޖީގެ ލީޑަރުކަން ރިޔާޒާ ރަސްމީކޮށް ހަވާލު ނުކުރޭ: މެމްބަރުން

ރައްޔިތުންގެ މަޖިލީހުގެ މައިނޯރިޓީ ޕާޓީގެ މަޤާމު ޖުމްހޫރީ ޕާޓީ (ޖޭޕީ) އަށް ލިބުމާއިއެކު، ވެރިކަންކުރާ ކޯލިޝަންގެ ޖޮއިންޓް ޕާލަމެންޓްރީ ގްރޫޕްގެ ލީޑަރުކަން ޖޭޕީގެ ޕާލަމެންޓްރީ ލީޑަރަށް ލިބިވަޑައިގެންފައިވާ ކަމަށް މީޑިއާގައި ރިޕޯޓުކޮށްފައި ވީނަމަވެސް، ޖޮއިންޓް ޕީޖީގެ ރަސްމީ ބައްދަލުވުމެއްގައި އެކަން ނިންމާފައި ނުވާ ކަމަށް ބައެއް މެމްބަރުން ވިދާޅުވެއްޖެއެވެ.

ޖޮއިންޓް ޕާލަމެންޓްރީ ގްރޫޕަށް ނިސްބަތްވާ ބައެއް މެމްބަރުން މައުލޫމާތު ދެއްވި ގޮތުގައި ޖުމްހޫރީ ޕާޓީގެ މެމްބަރުންގެ އަދަދު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ މަޖިލިސް މެމްބަރުންނަށްވުރެ އިތުރުވި ފަހުން ޖޮއިންޓް ޕީޖީގެ ބައްދަލުވުމެއް ބާއްވާފައެއް ނުވެއެވެ. ޖޮއިންޓް ޕީޖީގެ ލީޑަރެއްގެ ގޮތުގައި އެމްޑީޕީގެ ޕާލަމެންޓްރީ ގްރޫޕްގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމެވެ. ޖުމްޖޫރީ ޕާޓީގެ ޕާލަމެންޓްރީ ގްރޫޕްގެ ލީޑަރު، ކިނބިދޫ ދާއިރާގެ މެމްބަރު އަބްދުﷲ ރިޔާޒް ހުންނެވީ ޖޮއިންޓް ޕީޖީގެ ޑެޕިއުޓީ ލީޑަރެއްގެ ގޮތުގައެވެ.

ޖޮއިންޓް ޕީޖީގެ ލީޑަރުކަމާއި ހަވާލުވެވަޑައިގަތުމަށްފަހު ނިމިދިޔަ ހަފްތާގައި އަސްލަމް ވިދާޅުވީ ޖޮއިންޓް ޕީޖީގެ ހިންގާ ޤަވާޢިދު އެކުލަވާލުމުގެ މަސައްކަތް ކުރިއަށްދާ ކަމަށެވެ. އިތުބާރު ހުރި ގޮތެއްގައި އެނގިފައިވާ ގޮތުގައި ޖޮއިންޓް ޕީޖީގެ ލީޑަރެއް ގޮތުގައި ހުންނަވާނެ ބޭފުޅަކު އެ ގްރޫޕްގެ މެމްބަރުންގެ މެދުގައި ނެގޭ ވޯޓަކުން ނިންމުމަށް ވަނީ ހުށަހަޅާފައެވެ. ގުޅިފައިވާ ޕާޓީތަކުގެ ޕާލަމެންޓްރީ ގްރޫޕްގެ ހިންގުން ހަރުދަނާ ކުރުމަށް ނިންމާފައި ވަނީ ކޯލިޝަން ސަރުކާރު ހިންގުމުގައި މަޖިލީހުގެ އެހީތެރިކަން ބޮޑުވާނެތީ އާއި، ކޯލިޝަން އެކަތިގަނޑެއްގެ ގޮތުގައި ބޭއްވުމުގައި ޖޮއިންޓް ޕާލަމެންޓްރީ ގްރޫޕްގެ ދައުރު ވެސް ބޮޑުވާނެތީ ކަމަށް މައުލޫމާތު ލިބިފައިވެއެވެ.

ވެރިކަންކުރާ އިއްތިޙާދުން ގުޅިގެން މަސައްކަތް ކުރަން ފެށީއްސުރެ އެ އިއްތިޙާދުގައި ހިމެނޭ ޕާޓީތަކުގެ ޖޮއިންޓް ޕާލަމެންޓްރީ ގްރޫޕްގެ ލީޑަރުކަން ކުރައްވަމުން ގެންދެވީ އެމްޑީޕީގެ ޕާލަމެންޓްރީ ގްރޫޕްގެ ލީޑަރުކަން ވެސް ކުރެއްވި މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙެވެ. ޖުމްހޫރީ ޕާޓީއަށް މަޖިލީހުގެ މައިނޯރިޓީ ޕާޓީގެ މަޤާމު ލިބިފައި ވަނީ މަޖިލީހުގައި ތިއްބެވި އެމްޑީޕީގެ 5 ބޭފުޅަކު ކެބިނެޓަށް ވަޑައިގަތުމާއި، އަދި މިނިވަން މެމްބަރުންގެ ގޮތުގައި ތިއްބެވި ބައެއް މެމްބަރުން އެޕާޓީއާ ގުޅިވަޑައިގަތުމުންނެވެ. މަޖިލީހުގެ ބައެއް މެމްބަރުން މައުލޫމާތު ދެއްވާ ގޮތުގައި ޖޭޕީއާ އަލަށް ގުޅިވަޑައިގެންނެވި ބޭފުޅުންނަށް އެ ޕާޓީން ވަނީ ޓިކެޓް ކަށަވަރުކޮށްދީފައެވެ.