ކުރީގެ ރައީސް ޑރ. ވަހީދު، ރައީސް ސޯލިޙާއި ބައްދަލުކުރައްވައިފި
30 ނޮވެމްބަރު 2018 | ހުކުރު 14:46ބައްދަލުވުމުގައި މަޝްވަރާކުރެވުނު ކަންކަމުގެ ތަފްޞީލެއް ހާމައެއް ނުކުރައްވާ
ކުރީގެ ރައީސް ޑރ. މުހައްމަދު ވަހީދު ހަސަން މަނިކު
ކުރީގެ ރައީސް ޑރ. މުހައްމަދު ވަހީދު ހަސަން މަނިކު، ރައީސް އިބްރާހިމް މުހައްމަދު ސޯލިޙްގެ އަރިހަށް އިހްތިރާމްގެ ޒިޔާރަތެއް ކުރައްވައިފިއެވެ.
ޑރ. ވަހީދު މިކަން ހާމަކުރައްވާފައިވަނީ އެމަނިކުފާނު ކުރެއްވި ޓްވީޓެއްގައެވެ. ޑރ. ވަހީދު ކުރެއްވި ޓްވީޓްގައި ވިދާޅުވީ ރައީސް ސޯލިޙަށް އެމަނިކުފާނުގެ ރަހުމަތްތެރިކަމާއި އެހީތެރިކަން އޮންނާނެކަން ހުށަހެޅުއްވިކަމަށެވެ. އަދި ރައީސް ސޯލިޙަށް ކާމިޔާބަށްވެސް އެދިވަޑައިގަންނަވާކަމަށް ވިދާޅުވިއެވެ.
ޑރ. ވަހީދަކީ އެމްޑީޕީގެ ފުރަތަމަ ވެރިކަމުގައި ރައީސް މުހައްމަދު ނަޝީދުގެ ނައިބެވެ. އަދި 2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު ރައީސް ނަޝީދުގެ ވެރިކަން ވެއްޓުމަށްފަހު، ވެރިކަމާއި ހަވާލުވެވަޑައިގެން، ދައުރުން ބޭރުންވެސް ހަފްތާއެއްހާ ދުވަހު ރާއްޖޭގެ ރައީސުލްޖުމްހޫރިއްޔާކަން އެމަނިކުފާނު ވަނީ ކުރައްވާފައެވެ. ޑރ. ވަހީދުގެ ވެރިކަމުގެ ފުރަތަމަ ދުވަހު، ފެބްރުއަރީ 8 ވަނަ ދުވަހު އަވަސް އިންތިޚާބަކަށް ގޮވާލައި މާލޭގެ މަގުތަކަށް ނިކުތް އެތައް ހާސް ބަޔަކަށް ފުލުހުން ވަނީ ބޮޑެތި އަނިޔާތަކެއްވެސް ދީފައެވެ.
ރައީސް އިބްރާހިމް މުހައްމަދު ސޯލިހާއި ރައީސް ޑރ. ވަހީދާއި ދެމެދު މަޝްވަރާކުރެވުނު ކަންކަމުގެ ތަފްޞީލެއް ރައީސް އޮފީހުން އަދި ހާމައެއް ނުކުރެއެވެ.
