ޑިސަޕޮއިންޓް ނުވާނެ ފޯމިއުލާ އެއް މަޖިލީހަށް ނެރޭނަން: ގާސިމް
30 ނޮވެމްބަރު 2018 | ހުކުރު 16:15ބައްދަލުވުން ނިންމާފައި ވަނީ އިންތިހާބުގައި ވާދަކުރުމާއި ގުޅޭ ގޮތުން ވަކި ގޮތެއް ނުނިމި
ހަތަރު ޅީޑަރުން މަޝްވަރާ ބައްދަލުވުމަށް ފަހު މީޑިއާތަކަށް މައުލޫމާތު ދެއްވަނީ
ރައްޔިތުންގެ މަޖިލީހުގެ އިންތިހާބުގައި ވާދަކުރުމަށް ރައްޔިތުން "ޑިސްއެޕޮއިންޓް ނުވާނެ ފޯމިއުލާ އެއް" ނެރޭނެ ކަމަށް ޖުމްހޫރީ ޕާޓީގެ ލީޑަރ އަދި ރައްޔިތުންގެ މަޖިލީހުގެ ރައީސް ގާސިމް އިބްރާހިމް ވިދާޅިވެއްޖެއެވެ.
އަންނަ އަހަރު މަރޗް މަހު އޮންނަ ރައްޔިތުންގެ މަޖިލީހުގެ އިންތިޚާބުގައި ގުޅިފައިވާ ޕާޓީތަކުން ވާދަކުރާނެ ގޮތަކާއި ގުޅޭ ގޮތުން މަޝްވަރާ ކުރެއްވުމަށް އެމްޑީޕީ އޮފީހުގައި ބޭއްވި ބައްދަލުވުމަށް ފަހު މީޑިއާތަކާއި ވާހަކަދައްކަވަމުން ގާސިމް ވިދާޅުވީ ރައްޔިތުންގެ މަޖިލީހުގެ އިންތިޚާބުގައި ޕާޓީތަކުން ވާދަކުރާނެ ގޮތެއް ނިންމާއިރު، އެކަމަށް ރައްޔިތުން ހިތްހަމަޖެހޭނެ ފަދަ ފޯމިއުލާ ގުޅިފައިވާ ޕާޓީތަކުން ނެރޭނެ ކަމަށެވެ. ނަމަވެސް "އެއީ ކޮން މެޖިކް ފޯމިއުލާ އެއްތޯ ސުވާލު ނުކުރެއްވުމަށް" ގާސިމްވަނީ މީޑިއާތަކުގެ ފަރާތުން އެދިފައެވެ. ނަމަވެސް އިންތިޚާބުގައި ވާދަކުރުމަށް ހުރިހާ ޕާޓީތަކަށް ވެސް އެއްބަސްވެވޭ ފޯމިއުލާ އެއް ނެރޭނެ ކަމަށް ގާސިމްވަނީ ވިދާޅުވެފައެވެ.
"ރައްޔިތުން ޑިސްއެޕޮއިންޓް ނުވާނެ ގޮތަކަށް އަޅުގަނޑުމެން އެ ފޯމިއުލާ ނެރޭނަން ﷲ އިރާދަކުރެއްވިއްޔާ. އެއީ މެޖިކް ފޯމިއުލާއެއްތޯ ތި ބޭފުޅުން ސުވާލުނުކުރައްވާތި. އެކަމަކު ނެރޭނީ އެ ފޯމިއުލާ،" ގާސިމް ވިދާޅުވިއެވެ.
އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ގުޅިފައިވާ ޕާޓީތަކުން ރައްޔިތުންގެ މަޖިލީހުގެ އިންތިޚާބުގައި ވާދަކުރާނީ ވަކި ވަކިންނެވެ.
އެމްޑީޕީގެ އޮފީހުގައި ކުރެވުނު މަޝްވަރާތަކާއި ގުޅޭ ގޮތުން ގުޅިފައިވާ ޕާޓީތަކުގެ ތެރޭގައި ހިމެނިވަޑައިގަންނަވާ އެންމެ ބޮޑު ޕާޓީ، އެމްޑީޕީގެ ލީޑަރ ރައީސް މުހައްމަދު ނަޝީދު ވިދާޅުވީ ރައްޔިތުންގެ މަޖިލީހުގެ އިންތިހާބުގައި ގުޅިފައިވާ ޕާޓީތަކުން ވާދަކުރަން މަޝްވަރާކުރެވޭނެ ހުރިހާ ގޮތަކުން މަޝްވަރާކުރަމުން އަންނަ ކަމަށެވެ. ރައީސް ނަޝީދު ވިދާޅުވީ މަޖިލީހުގެ އިންތިހާބާއި ގުޅޭ ގޮތުން ގޮތެއް ނިންމުމަކީ އެކަށީގެންވާ ޓެކްނިކަލް މަސައްކަތެއް ކަމަށާއި، އުއްމީދުކުރައް ވަނީ މި ކަމުގައި ވަކި ގޮތެއް ހުކުރުދުވަހު ނިންމޭނެ ކަމަށެވެ.
"އެނގިވަޑައިގަންނަވާނެ މަޖިލީހުގެ އިންތިހާބާއި ގުޅޭ ގޮތުން ގޮތެއް ނިންމުމަކީ އެކަށީގެންވާ ޓެކްނިކަލް މަސައްކަތެއްކަން. ގޮނޑިތަކުގެ އަދަދާއި ޝައުގުވެރިކަން ހުންނަ މިންވަރާއި. އަޅުގަނޑުމެން އެއްވެސް ހާލެއްގައި މަސައްކަތް ކުރަމުންނެއްނޫން މި ދަނީކީ، ރާއްޖޭގެ ރައްޔިތުންނަށް އެ މީހުން ބޭނުންވާ، އިހްތިޔާރު ކުރާ ގޮތަށް އެ ރައްޔިތުންނަށް އިންތިހާބުތަކުގައި ބައިވެރި ނުވެވޭނެ ގޮތަކަ،ށް" ރައީސް ނަޝީދު ވިދާޅުވިއެވެ.
ބައްދަލުވުން ކުރިއަށް ދިޔަ ގޮތާއި ގުޅޭ ގޮތުން މީޑިއާތަކަށް މައުލޫމާތު ދެއްވަމުން މައުމޫން ރިފޯރމް މޫވްމަންޓްގެ ފަރާތުން ވާހަކަ ދައްކަވަމުން ރައީސް މައުމޫން ވިދާޅުވީ ބައްދަލުވުން ކުރިއަށް ދިޔައީ ވަރަށް އެކުވެރި މާހައުލެއްގައި ކަމަށާއި، ގޮތެއް ނިންމާނީ ހުރިހާ ޕާޓީތަކަށް ވެސް އެއްބަސްވެވޭ ގޮތަކަށް ކަމަށެވެ.
"ވަރަށް އެކުވެރި ރަހްމަތްތެރި ޖައްވެއްގައި ވާހަކަދައްކާލާފައި މިއަދު މި ނިންމާލީ. ނަމަވެސް އަޅުގަނޑުމެން ނިންމީ އަދިވެސް އެ ވާހަކަތައް ދައްކާފައި މަޝްވަރާކޮށްގެން ހުރިހާ ޕާޓީތަކަށް އެއްބަސްވެވޭ ގޮތަކަށް މި ކަން ނިންމަން" ރައީސް މައުމޫން ވިދާޅުވިއެވެ.
އަދާލަތު ޕާޓީގެ ރައީސް ޝެއިހް އިމްރާން ވިދާޅުވީ ހަތަރު ޕާޓީ މަޝްވަރާކޮށްގެން ގައުމަށް އެންމެ ފާއިދާހުރި ހައްލެއް މި ކަމުގައިވެސް ނެރެވޭނެ ކަމަށެވެ.
"އަޅުގަނޑުމެންނަށް މަޝްވަރާކޮށްގެން އަބަދު ވެސް އެންމެނަށް އެއްބަސް ވެވޭ ރަނގަޅު ގޮތެއް އެއީ މިހާ ހިސާބަށް ކުރެވިފައި ހުރި ތަޖްރިބާ. އަޅުގަނޑުމެން މި ކަމުގައި ވެސް އެންމެނަށް އެއްބަސްވެވޭ އެންމެންނަށް އެންމެ މަސްލަހަތު ހުރި ކޮންމެ ވެސް ހައްލަކާއިގެން އަޅުގަނޑުމެން އިރާދަކުރެއްވިއްޔާ ނިކުންނާނަން" އިމްރާން ވިދާޅުވިއެވެ.
