ސީއެސްސީގެ މެމްބަރު ކަމަށް އައްޔަންކުރަން އެންމެ މަތިން މާކްސް ލިބުނީ އާމިރާއަށް
75 ޕަސެންޓަށް ވުރެ މަތިން މާކްސް ލިބިވަޑައިގެންފައި ވަނީ ތިން ބޭފުޅަކަށް
ރައްޔިތުންގެ މަޖްލީހުގެ ޖަލްސާ
28 ނޮވެމްބަރު 2018 އަށް ހުސްވާ ސިވިލް ސާރވިސް ކޮމިޝަނުގެ މެމްބަރެއްގެ މަގާމަށް ކުރިމަތިލެއްވި ފަރާތްތަކުގެ ތެރެއިން މިނިވަން މުއައްސަސާތަކާއި ބެހޭ ކޮމިޓީން ދިރާސާކުރެއްވި ނަންފުޅުތަކުގެ ތެރެ އިން އެންމެ މަތިން މާސްކް ހޯއްދެވީ ސ ފޭދޫ ކުމުންޒާނިގެ ފާތިމަތު އާމިރާއެވެ.
ސީއެޗްސީގައި ޕްރިސިޕަލްކަމާއި އެޑިޔުކޭޝަންގެ ގިނަ މަގާމްތައް ފުރުއްވާފައިވާ އާމިރާ އެންމެ މަތިން މާކްސް ހޯއްދަވާފައި ވާއިރު، އޭނާ އަށް ލިބިވަޑައިގެންފައި ވަނީ 89 ޕަސެންޓް މާކްސްއެވެ.
ސިވިލް ސާރވިސް ކޮމިޝަނުގެ މެމްބަރަކު ހޮވުމަށް މިނިވަން މުއައްސަސާތަކާއި ބެހޭ ކޮމިޓީން ދިރާސާކުރެއްވި ގޮތުގެ ރިޕޯރޓް ރައްޔިތުންގެ މަޖިލީހުގެ ތަޅުމަށް ހުށަހަޅުއްވަމުން ކޮމިޓީގެ މުގައްރިރު އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ ކޮމިޓީގެ މަރްހަލާ އިން ފާސްވީ 75 ޕަސެންޓަށް ވުރެ މަތިން މާކްސް ލިބިވަޑައިގެންނެވި ބޭފުޅުން ކަމަށެވެ. 75 ޕަސެންޓަށް ވުރެ މަތިން މާކްސް ލިބިވަޑައިގެންފައި ވަނީ ތިން ބޭފުޅަކަށް ކަމަށް ރޮޒައިނާ ވިދާޅުވިއެވެ.
އެންމެ މަތިން މާކްސް ލިބިވަޑައިގެންނެވި ތިން ބޭފުޅުންނަކީ:
- ފާތިމަތު އާމިރާ ކުމުންޒާނިގެ ސ. ފޭދޫ 89 ޕަސެންޓް
- އަބްދުއްރަހީމް ހަސަން ލިލީގެ ތ. ހިރިލަންދޫ 83.4 ޕަސެންޓް
- މުހައްމަދު މާހިދު ޝަރީފް މ. ވެލެގަލި 79.5 ޕަސެންޓް
ސިވިލް ސަރވިސް ކޮމިޝަންގެ މެމްބަރަކު ހޮވުމަށް ރައްޔިތުންގެ މަޖިލީހުން އިއުލާނު ކުރުމުން 22 ބޭފުޅަކު ކުރިމަތިލައް ވާފައިވާ އިރު، އޭގެ ތެރެއިން ޝަރުތު ހަމަވެފައި ވަނީ 14 ބޭފުޅުންނެވެ. 14 ބޭފުޅުންނަށް މިނިވަން މުއައްސަސާތަކާއި ބެހޭ ކޮމިޓީން އިންޓަރވިއު އަށް ދެންނެވުމުން އެއް ބޭފުޅަކު ވަނީ ނަން އަބުރާ ގެންދަވާފައެވެ. އެހެންކަމުން ކުރިމަތިލެއްވި ބޭފުޅުންގެ ތެރެއިން ކޮމިޓީން އިންޓަރވިއު ކޮށްފައި ވަނީ 13 ބޭފުޅުންނާއެވެ.
ކޮމިޓީގެ ތެރެއިން މާރކްސް ދިނުމަށް ކަނޑައެޅުނު އޮނިގަޑުގައި މައިގަނޑު ގޮތެއްގައި ހިމެނެނީ ތައުލީމް އާއި ތަމްރީނާއި މަސައްކަތުގެ ތަޖްރިބާ އަދި އިންޓަރވިއުގެ މަރްހަލާގައި މާރކްސް ހޯދި ގޮތަށެވެ.
ސީއެސްސީ އަށް މެމްބަރަކު އައްޔަން މި ކުރަނީ އެ ކޮމިޝަންގެ މެމްބަރަކަށް މިހާރު ހުންނެވި ފާތުމަތު ރީނީ އަބްދުއްސައްތާރުގެ މުއްދަތު މި މަހު ފަހުކޮޅު ހަމަވާތީ އެވެ.
އެހެން މިނިވަން މުއައްސަސާތަކާ ތަފާތުކޮށް، ސީއެސްސީ އަށް އައްޔަން ކުރާނެ ބޭފުޅުން ކަނޑައެޅުމުގައި ރައީސްޖުލްމްހޫރިއްޔާގެ ދައުރެއް ނޯވެ އެވެ. ސީއެސްސީ އަށް މެމްބަރުން އައްޔަން ކުރާނީ ރައްޔިތުންގެ މަޖިލީހުންނެވެ.
