ވިހާފައި ބާލިދީއަކަށްލި ކުއްޖާ އާއި މައިމީހާ ތިނަދޫ ހޮސްޕިޓަލުގައި
28 ނޮވެމްބަރު 2018 | ބުދަ 15:50ދެމައިންގެ ހާލުވެސް ރަނގަޅު
ތިނަދޫ ޢަބްދުއް ސަމަދު މެމޯރިއަލް ހޮސްޕިޓަލް
ގދ. ވާދޫގައި ވިހެއުމަށް ފަހު އެއްލާލި ތުއްތު ކުއްޖާ އާއި އެކުއްޖާގެ މައިމީހާ މިވަގުތު އޮތީ ގދ ތިނަދޫ ގައި ހުންނަ ޢަބްދުއް ސަމަދު މެމޯރިއަލް ހޮސްޕިޓަލްގައި ކަމަށާއި އެ ދެމައިންގެ ހާލުވެސް ރަނގަޅު ކަމަށް އެ ހޮސްޕިޓަލުން ބުނެފިއެވެ.
ރާއްޖެ އެމްވީއަށް މައުލޫމާތު ދެއްވަމުން އެ ހޮސްޕިޓަލްގެ އެސިސްޓެންޓް ޑިރެކްޓަރ އާމިނަތު ޢަބްދުލް ހަކީމް ވިދާޅުވީ ދެމައިން ވެސް އެ ހޮސްޕިޓަލަށް ގެނެވުނީ އަންގާރަ ދުވަހުގެރޭގެ ފަތިހުގެ ވަގުތެއްގައި ކަމަށެވެ.
އާމިނަތު ޢަބްދުލް ހަކީމް ވިދާޅުވީ އުސޫލެއްގެ ގޮތުން ވިހާތާ 48 ގަޑިއިރު ވަންދެން ދަރިފުޅު އޮބްޒަރވޭޝަންގައި ބާއްވަން ޖެހޭ ކަމަށާއި މައިމީހާ ވެސް 24 ގަޑިއިރު ވަންދެން ބާއްވަން ޖެހޭ ކަމަށެވެ. އަދި އެދެމައިން ވެސް ހާލު ރަނގަޅު ކަމަށާއި އިތުރު އެއްވެސް ކަމަކަށް ފަރުވާދެމުން ނުދާކަމަށް އާމިނަތު ޢަބްދުލް ހަކީމް ވިދާޅުވިއެވެ.
އޭނާ ވިދާޅުވީ އިތުރު ކަމެއް ދިމާ ނުވާނަމަ އެވަގުތުތައް ހަމަވުމުން ހޮސްޕިޓަލުން ދޫކޮށްލާނެ ކަމަށެވެ. އަދި ކުއްޖާއަށް ވެސް އަދި ވިހެއުމުގެ ތެރޭގައި އޭނާގެ މަންމައަށް ވެސް ކަމެއް ދިމާވެފައި ނުވާކަމަށް ވެސް އާމިނަތު ޢަބްދުލް ހަކީމް ވިދާޅުވިއެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި ކުއްޖާގެ މައިމީހާ ފުލުހުންގެ ބެލުމުގެ ދަށަށް ގެންދެވިފައި ނުވަނީ ހޮސްޕިޓަލުން އަދި ދޫ ނުކޮށްލާތީއެވެ. ނަމަވެސް މިކަމާ ގުޅޭގޮތުން ފުލުހުން ވަކި އެއްޗެއް ނުބުނެއެވެ.
ތުއްތު ކުއްޖަކު އެއްލާލާފައިވާ މައްސަލަ ފުލުހުންނާ ގުޅިގެން މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސް އިން ދަނީ ބަލަމުންނެވެ.
ޖެންޑާ މިނިސްޓްރީން ނެރުނު ބަޔާނެއްގައި ބުނީ ވާދޫގައި އަންހެނަކު ކުއްޖެއް ވިހެއުމަށްފަހު އެއްލާލާފައިވާ މައްސަލައެއްގެ ރިޕޯޓު ލިބުމާއެކު ފުލުހުންނާއި އެ މިނިސްޓްރީން އެކަން ބަލަމުންދާ ކަމަށެވެ.
އެ ކުއްޖާގެ ރައްކާތެރިކަން ކަށަވަރުކުރުމަށްޓަކައި ކުއްޖާގެ އާއިލާ އާއި ކަމާބެހޭ ދައުލަތުގެ އިދާރާތަކާ ގުޅިގެން މަސައްކަތް ކުރަމުންދާ ކަމަށެވެ.
މީގެ އިތުރުން ކުއްޖާގެ ހުރުމަތަށާއި، ކަމުގެ ހައްސާސްކަމަށް ރިޔާއަތްކޮށް، މީޑިއާ އާއި މީސްމީޑިއާގައި އެ ކުއްޖާގެ އެއްވެސް ފޮޓޯއެއް ޝާއިޢު ނުކުރުމަށް ޖެންޑާ މިނިސްޓްރީން ވަނީ އިލްތިމާސްކޮށްފައެވެ.
ވާދޫގައި ވިހެއުމަށްފަހު އެއްލާލާފައިވާ ކުއްޖާގެ ފޮޓޯ ވަނީ ސޯޝަލް މީޑިއާގައި އާންމުވެފަ އެވެ. އެ ކުއްޖާ އޮތީ ކަޅު ބާދިލީއެއްގެ ތެރެއަށް ލައިފަ އެވެ.
