ރައީސް ސޯލިހު އިންޑިއާއަށް ވަޑައިގަންނަވަނީ ޑިސެމްބަރު 17 ގައި
ރައީސް ސޯލިހުގެ ފުރަތަމަ ރަސްމީ ދަތުރުފުޅު
ރައީސް ސޯލިހު(ކ) އަދި އިންޑިއާގެ ބޮޑުވަޒީރު މޯދީ . އަންނަ މަހުގެ 17 ގައި ރައީސް ސޯލިހު އިންޑިއާއަށް ވަޑައިގަންނަވާނެ
ރައީސް އިބްރާހިމް މުހައްމަދު ސޯލިހު އަންނަ ޑިސެމްބަރު މަހުގެ 17 ގައި އިންޑިއާއަށް ދަތުރުކުރައްވާ ގޮތަށް ނިންމަވައިފިއެވެ.
ރައީސް ސޯލިހު އިންޑިއާއަށް ވަޑައިގަތުމަށް ނިންމަވާފައިވާކަން ހާމަކުރައްވާފައިވަނީ ފޮރިންގ މިނިސްޓަރ އަބްދުﷲ ޝާހިދު އިންޑިއާއަށް ކުރައްވަމުންގެންދަވާ ދަތުރުފުޅުގައި އިންޑިއާގެ ހާރިޖީ ވަޒީރާ ސުޝްމާ ސްވަރާޖާއެކު ބޭއްވި ބައްދަލުކުރެއްވުމުގައި ދެއްކެވި ވާހަކަ ފުޅުގައެވެ.
ރައީސް ސޯލިހު ވެރިކަމާއި ހަވާލުވެ ވަޑައިގެންނެވި ފަހުން ކުރައްވާ ފުރަތަމަ ދަތުރުފުޅު އިންޑިއާއަށް ކުރެއްވުމަށް ހަމަޖެހިފައިވާއިރު
ރައީސްކަމުގެ ހުވާކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރު މޯދީ ވަނީ ވަޑައިގަންނަވާފައެވެ. ރައީސް ސޯލިހު ހުވާކުރެއްވުމަށްފަހު ބޮޑުވަޒީރު މޯދީއާއި ބައްދަލުކުރެއްވުމަށްފަހު ދެއްކެވި ވާހަކަފުޅުގައި ވީ އެންމެ އަވަސް ފުރުސަތެއްގައި ރައީސް އިބްރާހީމް މުހައްމަދު ސޯލިހު އިންޑިއާ އަށް ރަސްމީ ދަތުރުފުޅެއް ކުރެއްވުމަށް މޯދީ ވަނީ ދައުވަތު ދެއްވާފައެވެ.
ނިމިދިޔަ ސަރުކާރުގައި އިންޑިއާއާއި ރާއްޖޭގެ ގުޅުން ހީނަރުވެފައިވާއިރު މިނިސްޓަރ ޝާހިދު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި ވިދާޅުވެފައިވަނީ "އެދަތުރުފުޅަކީ އާ ސަރުކާރާއެކު ދެގައުމުގެ ގުޅުމުގެ އާ ޒަމާނެއްގެ ފެށުން" ކަމަށެވެ.
