ސައިންސް މިނިސްޓްރީއަށް ލަފާދޭނެ ޓެކް ކައުންސިލެއް އުފައްދަން ނިންމައިފި
26 ނޮވެމްބަރު 2018 | ހޯމަ 15:44ކައުންސިލްގައި ހިމެނޭނީ 10 މެމްބަރުން
މިނިސްޓަރު މަލީހަށް މަގާމުގެ ފަތްކޮޅު ދިން ރަސްމިއްޔާތުގެ ތެރެއިން
ކޮމިނިކޭޝަން، ސައިންސް އެންޑް ޓެކްނޮލޮޖީ މިނިސްޓްރީއަށް ލަފާ ދިނުމަށް އައިޓީ ދާއިރާގައި ހިމެނޭ ފަންނީ ބޭފުޅުންގެ މައްޗަށް އެކުލެވޭ ޓެކް ކައުންސިލެއް އުފެއްދުމަށް ނިންމައިފިއެވެ.
ސައިންސް މިނިސްޓްރީގެ މަސައްކަތަކާ ގުޅޭ ގޮތުން މައުލޫމާތު ދިނުމަށް، އެ މިނިސްޓްރީ ހިންގަމުންދާ އެން.ސީ.އައި.ޓީ އިމާރާތުގައި ހޯމަ ދުވަހު ބޭއްވި ޕްރެސް ކޮންފަރެންސްގައި ވާހަކަފުޅު ދައްވަމުން މިނިސްޓަރު މުހައްމަދު މަލީހު ޖަމާލު ވިދާޅުވީ ޓެކް ކައުންސިލް އުފައްދާނީ 10 މެމްބަރުންގެ މައްޗަށް ކަމަށެވެ. އަދި ދާއިރާގެ ފަންނީ ގާބިލު ފަރާތްތަކުގެ ހިޔާލު ހޯދައިގެން އައިޓީ ސެކްޓަރ ކުރިއެރުވުމަށް މިނިސްޓްރީން މަސައްކަތް ކުރާނެ ކަމަށް މަލީހު ވިދާޅުވިއެވެ.
"މި ދާއިރާގައި އުޅޭ ފަރާތްތަކުގެ ލަފާ ހޯދައިގެން، އެބޭފުޅުން ބޭނުންވާ ގޮތަށް އައިޓީ ސެކްޓާ، މި ދާއިރާ ކުރިއަށް ގެންދިއުމުގެ ވިސްނުމެއް ގެންގުޅެނީ. އެކަން އެންމެ ރަނގަޅަށް ކުރެވޭނީ އެކިއެކި ދާއިރާތަކުން މިސާލަކަށް ރާއްޖޭގައި އެބަ ހަރަކާތްތެރިވޭ މިދާއިރާގެ ވިޔަފާރިތައް. އަޅުގަނޑު ވިސްނުން ހުރީ 10 ވަރަކަށް ބޭފުޅުން ހިމެނޭ ކައުންސިލެއް ގާއިމު ކުރުން. ހުރިހާ ދާޢިރާއެއްގެ މަންދޫބުން ހިމެނޭ ގޮތަށް ކައުންސިލް އެކުލަވާލުން،" މަހީލު ވިދާޅުވިއެވެ.
މަލީހު ވިދާޅުވީ ޓެކް ކައުންސިލް އެންމެ ފުރަތަމަ އުފައްދާނީ ގަވައިދެއްގެ ދަށުން ކަމަށާއި އެއަށްފަހު، ގާނޫނަކުން އެ ކައުންސިލަށް ބާރުތަކެއް ދޭނެ ކަމަށެވެ.
އޭނާ ވިދާޅުވީ ރާއްޖޭގެ ވަކި ސަރަހައްދުތަކެއްގައި ޓެކް އިންސްޓިޓިއުޓްތަކެއް ގާއިމު ކުރުމަކީ ރައީސް ސޯލިހުގެ ވައުދެއް ކަމަށެވެ. އަދި އެ ވައުދު ފުއްދުމަށް ކުރަންޖެހޭ މަސައްކަތް ވަރަށް އަވަހަށް ފަށާނެ ކަމަށް މަލީހު ވިދާޅުވިއެވެ.
"ރައީސް އިބްރާހިމް މުހައްމަދު ސޯލިހުގެ ވައުދުފުޅެއް، ރާއްޖޭގެ ކަނޑައެޅޭ ވަކި ދިމަދިމާގައި ޓެކް އިންސްޓިޓިއުޓްތަކެއް، ގާއިމު ކުރުން. އެހެންވީމަ އަޅުގަނޑުމެން ވަރަށް އަވަހަށް މި ވައުދު ފުއްދުުމަށްޓަކާ ކައުންސިލްތަކާ ބައްދަލުކޮށް، ބޭނުންވާ ބިންތައް ހޯދުމާއި އެ ބޭނުންވާ އިންފްރާސްޓްރަކްޗަރ ގާއިމު ކުރުމުގެ މަސައްކަތް ވަރަށް އަވަހަށް ފަށައިގަންނާނަން،" ރައީސް ޔާމީންގެ ސަރުކާރުގައި ވެސް ވަޒީރުކަން ކުރެއްވި މަލީހު ވިދާޅުވިއެވެ.
ސައިންސް މިނިސްޓްރީއަކީ ރައީސް ސޯލިހުގެ ސަރުކާރުން އަލަށް އުފެއްދި މިނިސްޓްރީއެކެވެ. އެ މިނިސްޓްރީގެ ޒިންމާތަކުގެ ތެރޭގައި ރާއްޖޭގައި ސަރުކާރުގެ މަސައްކަތްތައް ޑިޖިޓަލައިޒް ކުރުމާއި އޯޕަން ޑޭޓާގެ ސިޔާސަތު ތަންފީޒު ކުރުން ހިމެނެއެވެ.
