ރައީސް ސޯލިހު އަންނަ މަހުގެ ތެރޭގައި އިންޑިއާއަށް ވަޑައިގަންނަވަނީ
26 ނޮވެމްބަރު 2018 | ހޯމަ 07:07ރައީސް ސޯލިހު ހުވާކުރެއްވުމުގެ ރަސްމިއްޔާތަށް މޯދީ ވަޑައިގެންނެވި
ރައީސް ސޯލިހާއި އިންޑިއާގެ ބޮޑުވަޒީރު ނަރެންދުރަ މޯދީ ބައްދަލުކުރައްވަނީ.
ރައީސް އިބްރާހިމް މުހައްމަދު ސޯލިހު އަންނަ މަހުގެ ތެރޭގައި އިންޑިއާއަށް ވަޑައިގަންނަވަން ހަމަޖެހިފައިވާ ކަމަށް އިންޑިއާގެ ނޫސްތަކުން ބުނެފިއެވެ.
އިންޑިއާގެ ނޫހެއްކަމަށްވާ ޓައިމްސް އޮފް އިންޑިއާގައި ބުނެފައިވަނީ ފޮރިން މިނިސްޓަރ އަބްދުﷲ ޝާހިދު އެގައުމަށް ކުރައްވަމުން ގެންދަވާ ދަތުރުފުޅުގައި އެގައުމުގެ އެކްސްޓާނަލް އެފެއާޒަ މިނިސްޓަރ ސުޝްމާ ސުވަރާޖްއާއި ހޯމަދުވަހު ބައްދަލުކުރައްވާނެކަމަށެވެ. އަދި ރައީސް ސޯލިހު އިންޑިއާއަށް ކުރައްވާ ދަތުރުފުޅާއި ބެހޭގޮތުން މިނިސްޓަރ ޝާހިދު މަޝްވަރާ ކުރައްވާނެކަމަށެވެ. އެނޫހުގައި ރައީސް ސޯލިހު އިންޑިއާއަށް ވަޑައިގަންނަވާނެކަމަށް ބުނެފައިވަނީ އަންނަ ޑިސެމްބަރު މަހުގައެވެ.
ރައީސް ސޯލިހު ހުވާކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރު މޯދީ ވަނީ ވަޑައިގަންނަވާފައެވެ. ރައީސް ސޯލިހު ހުވާކުރެއްވުމަށްފަހު ބޮޑުވަޒީރު މޯދީއާއި ބައްދަލުކުރެއްވުމަށްފަހު ދެއްކެވި ވާހަކަފުޅުގައި ވީ އެންމެ އަވަސް ފުރުސަތެއްގައި ރައީސް އިބްރާހީމް މުހައްމަދު ސޯލިހު އިންޑިއާ އަށް ރަސްމީ ދަތުރުފުޅެއް ކުރްވުމަށް މޯދީ ވަނީ ދައުވަތު ދެއްވާފައެވެ.
ރައީސް ސޯލިހު އަންނަ މަހު އިންޑިއާއަށް ވަޑައިގަންނަވާނެ ކަމަށް އިންޑިއާގެ ނޫސްތަކުގައި ބުނެފައިވީ ނަމަވެސް ރައީސް އޮފީހުން އަދި އެދަތުރުފުޅާއި ގުޅިގެން ރަސްމީކޮށް އެއްޗެއް ބުނެފައެއް ނުވެއެވެ.
