މުސްތަފާގެ އިލްތިމާސް: ޕްރައިމަރީއަކަށް ބިރު ނުގަނޭ، އެއީ ޕާޓީ ނިޒާމު
26 ނޮވެމްބަރު 2018 | ހޯމަ 04:45ސިޔާސީ މީހުން ޕްރައިމަރީއަށް ފަސް ނުޖެހޭނެ ކަމަށް ވިދާޅުވި
މުސަތަފާ އެމްޑީޕީއަށް ސޮއިކުރައްވަނީ
ޕާޓީ ނިޒާމުގައި އޮންނަ އެންމެ ރަނގަޅު ގޮތަކީ ޕްރައިމަރީ ކާމިޔާބުކޮށްގެން އިންތިޚާބަށް ވާދަކުރުން ކަމަށާއި، ޕްރައިމަރީގައި ވާދަކުރުމަށް ބިރު ނުގަތުމަށް ރައްޔިތުންގެ މަޖިލީހުގެ މެންބަރުންނަށް، ތިމަރަފުށީ ދާއިރާގެ މެންބަރު މުޙައްމަދު މުސްތަފާ އިލްތިމާސް ކުރައްވައިފިއެވެ.
ވެރިކަންކުރާ ކޯލިޝަންގެ މައި ޕާޓީ، ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް ސޮއިކުރެއްވުމަށްފަހު އާދީއްތަ ދުވަހުގެރޭ ވާހަކަފުޅު ދައްކަވަމުން މުސްތަފާ ވިދާޅުވީ، މުސްތަފާ އާއި އެކު ޕްރޮގްރެސިވް ޕާޓީ އޮފް މޯލްޑިވްސް ދޫކުރެއްވި މަޖިލިސް މެންބަރުންނަށް އެމްޑީޕީއާއި ގުޅުމަށް ދައުވަތު ދެއްވި ކަމަށެވެ. ނަމަވެސް އޭގެ ތެރެއިން އެހެން ޕާޓީތަކާއި ގުޅިވަޑައިގަތް ބޭފުޅުންގެ މައިގަނޑު ކަންބޮޑުވުމަކީ އެމްޑީޕީގައި ޕްރައިމަރީއެއްގައި ވާދަކުރަން ޖެހުން ކަމަށެވެ.
"އަޅުގަނޑު ކައިރީ ތިބި މީހުން، އެމީހުން ވަރަށް ބޮޑަށް އަންނަންވެސް ބޭނުންވި. ވަޑައިގަންނަވަން ބޭނުންވި އެމްޑީޕީއަށް. އެކަމަކުވެސް މިބޭފުޅުން ފަސްޖެހިވަޑައިގެންނެވީ އެމްޑީޕީއަށް ސޮއިކުރަން. މައްސަލައަކީ ޕްރައިމަރީއަކާ ފޭސްކުރަން ޖެހޭތީ. ތަކުރާރުކޮށް އަޅުގަނޑު އެބޭފުޅުންނަށް ދެންނެވިން އެއީ މައްސަލައެއް ނޫނޭ" މުސްތަފާ ވިދާޅުވިއެވެ.
އެމްޑީޕީއާއި އަލުން ގުޅިވަޑައިގަތުމުގެ އެންމެ ބޮޑު އެއް ބޭނުމަކީ ޕާޓީ ނިޒާމުގެ ތެރެއިން ވާދަވެރި އިންތިޚާބެއްގައި ވާދަކުރުމަކީ މައްސަލައެއް ނޫންކަން ދެއްކެވުންކަން ފާހަގަކުރައްވައި މުސްތަފާ ވިދާޅުވީ، ޕްރައިމަރީއަކަށް ފަސްޖެހުމަކީ ސިޔާސީ މީހުން ކުރާ ކަމެއް ނޫން ކަމަށެވެ.
"ސިޔާސީ މީހެއް ވެއްޖެއްޔާ ޕްރައިމަރީއަށް ފަހެއް ނުޖެހޭނެ" މުސްތަފާ ވިދާޅުވިއެވެ.
މުސްތަފާ ވިދާޅުވީ އެމްޑީޕީ އާއި ގުޅިވަޑައިގަތީ ޕްރައިމަރީގައި ވާދަކުރައްވަން ކެރިވަޑައިގެން ކަމަށާއި، ޕްރައިމަރީ އާއި އަދި އިންތިޚާބުވެސް ކާމިޔާބު ކުރެވޭނެ ކަމުގެ ޔަޤީންކަން އޮތް ކަމަށެވެ. މުސްތަފާ ވިދާޅުވީ، އެމްޑީޕީގައި ހުންނެވުމަށްފަހު ކުރިން ޕީޕީއެމްއަށް ވަޑައިގަތީ އޭރުގެ ސަރުކާރުގެ ތެރެއިން ކުރިމަތިވި ފިއްތުންތަކާއި ގުޅިގެން ރައްޔިތުންގެ މަޝްވަރާވެސް ހޯއްދެވުމަށްފަހު ކަމަށެވެ.
މުސްތަފާ އަލުން އެމްޑީޕީއާއި ގުޅިވަޑައިގެން ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް އެ ޕާޓީގެ ޓިކެޓް ހޯއްދެވުމަށް ޕްރައިމަރީގައި ވާދަކުރައްވާނެކަން އިއުލާނުކުރައްވާފައިވާއިރު، އާދީއްތަ ދުވަހުގެރޭގެ ޖަލްސާގައި ތިމަރަފުށީ ދާއިރާގެ 1200 ރައްޔިތުން ސޮއިކޮށް، މުސްތަފާ ރައްޔިތުންގެ މަޖިލީހަށް ކުރިމަތިލެއްވުމަށް އެދި ތައްޔާރުކޮށްފައިވާ ޕެޓިޝަނެއް ވަނީ މުސްތަފާ އާއި ހަވާލުކޮށްފައެވެ.
އާދީއްތަ ދުވަހުގެރޭގެ ރަސްމިއްޔާތުގައި އެމްޑީޕީގެ ރައީސް މުޙައްމަދު ނަޝީދާއި، އެ ޕާޓީގެ ޗެއާޕަރސަން ހަސަން ލަތީފާއި، އެމްޑިޕީގެ ތިމަރަފުށީ ދާއިރާގެ ރައީސް އަންވަރު އިބްރާހިމާއި، ރައްޔިތުންގެ މަޖިލީހުގެ ބައެއް މެންބަރުންނާއި، އެ މަޖިލީހުގެ މެންބަރުކަން ކުރިން ކޮށްފައިވާ ބައެއް މެންބަރުންގެ އިތުރުން ތިމަރަފުށީ ދާއިރާއަށް ނިސްބަތްވާ ގިނަ އަދަދެއްގެ ރައްޔިތުން ވަނީ ބައިވެރިވެފައެވެ.
