ބިރުދައްކާއިގެން ޕީޕީއެމްއަށް މެމްބަރުން ވައްދާ މައްސަލަ އީސީއަށް

ވެރިކަން ކުރާ ޕީޕީއެމުން ވަޒީފާއަށް ބިރުދައްކައިގެން އެޕާޓީއަށް މެމްބަރުން ވައްދާތީ އެކަމުގެ ކަންބޮޑުވުން އެމްޑީޕީން އިލެކްޝަން ކޮމިޝަނުނާ ހިއްސާކޮށްފިއެވެ.

ބުދަ ދުވަހު ހެނދުނު ކުރިއަށް ގެންދިޔަ މި ބައްދަލުވުމުގައި އެމްޑީޕީގެ ފަރާތުން ބައިވެރިވަޑައިގެންފައި ވަނީ އެޕާޓީގެ ޗެއާޕާސަންގެ ނައިބް އަލީ ނިޔާޒު އެވެ. އިލެކްޝަން ކޮމިޝަންގައި ކުރިއަށް ދިޔަ މި ބައްދަލުވުމުގައި އިލެކްޝަން ކޮމިޝަންގެ މެންބަރުން ވަނީ ބައިވެރިވަޑައިގެންފައެވެ.

ރާއްޖެއެމްވީއަށް މައުލޫމާތު ދެއްވަމުން އަލީ ނިޔާޒު ވިދާޅުވީ މި ބައްދަލުވުމުގައި މައިގަނޑު ގޮތެއްގައި ތިން ކަމަކާ ގުޅޭ ގޮތުން މަޝްވަރާ ކުރެވުނު ކަމަށެވެ. ވަޒީފާގެ ބިރުދައްކައިގެން ޕާޓީއަށް ވައްދާ މައްސަލައާއި، ލޯކަލް ކައުންސިން އިންތިހާބުގެ ގައުމީ ލަފާދޭ ކޮމެޓީގެ ބައްދަލުވުން ފަހަކަށް އައިސް ނުބާއްވާ މައްސަލައިގެ އިތުރުން ސުލްހަވެރި ސިޔާސީ ހަރަކާތް ހިންގުމުގެ ފުރުސަތު އެޕާޓީއަށް ނުލިބޭތީ، އެކަމާ ވެސް މަޝްވަރާ ކުރެވުނު ކަމަށް އޭނާ ވިދާޅުވިއެވެ.

ގައުމީ ލަފާދޭ ކޮމެޓީގެ ބައްދަލުވުންތަށް ގަވައިދުން ބާއްވަމުން ދިޔުމަށް ފަހު މިހާރު އެ ބައްދަލުވުންތަށް ނުބާއްވާ ކަމަށް ނިޔާޒު ވިދާޅުވިއެވެ. އެބައްދަލުވުންތަށް މިހާރު ނުބާއްވާނީ ކޮމެޓީން ނިންމާ ނިންމުންތަށް އެމްޑީޕީން މީޑިއާއި ހާމަކުރާތީތޯ އިލެކްޝަން ކޮމިޝަނާއި ސުވާލުކުރިން ކަމަށް ވެސް އޭނާ ވިދާޅުވިއެވެ.

މީގެ އިތުރުން ސުލްހަވެރި ސިޔާސީ ހަރަކާތައް ބޭއްވުމަށް ހާއްސަކޮށް އެމްޑީޕީއަށް ޖަލްސާއެއް ބޭއްވުމަށް އެއްވެސް ތަނެން ނުލިބޭތީ އެކަމާ މަޝްވަރާ ކުރެވުނުކަމަށް ވެސް ނިޔާޒު ވިދާޅުވިއެވެ.

ނިޔާޒު ވިދާޅުވީ މިކަންކަމާއި ގުޅިގެން އިލެކްޝަން ކޮމިޝަނުން ކަމާއި ބެހޭ މުވައްސަސާތަކާއި ވާހަކަ ދައްކުމަށްފަހު މިކަންކަން އެ މުވައްސަސާތަކުގެ ސަމާލުކަމަށް ގެނެއުމަށްފަހު ހައްލުކުރާނެ ކަމަށް އުންމީދު ކުރާ ކަމަށެވެ.