ރައީސް އިބްރާހިމް މުހައްމަދު ސޯލިހް ދޫނިދޫ ޖަލަށް ޒިޔާރަތް ކުރައްވައި އެތަނުގެ ހާލަތު ބައްލަވައިލައްވައިފިއެވެ.

ރައީސް އޮފީހުން ބުނީ ރައީސް ސޯލިހް އާދީއްތަ ދުވަހުގެ މެންދުރު ދޫނިދޫގެ ޖަލުގެ ހާލަތު ބައްލަވާލައްވާފައި ވާކަމަށެވެ. އެމަނިކުފާނުގެ އަރިހުގައި މިނިސްޓަރ އޮފް ޑިފެންސް މާރިޔާ އަހުމަދުދީދީ އާއި، މިނިސްޓަރ އޮފް ހޯމްއެފެއާޒް ޝައިޚް އިމްރާން އަބްދުﷲ ވެސް ދޫނިދޫ ޖަލަށް ވަޑައިގެންނެވިއެވެ.

ރައީސް ސޯލިހް ދޫނިދޫ ޖަލަށް ޒިޔާރަތް ކުރައްވައި، ސިޔާސީ ބޭފުޅުން ހައްޔަރު ކޮށްފައި ބޭތިއްބެވި ގޮޅިތަކާއި، ޖަލުގެ އާންމު އެހެން ގޮޅިތައް ވަނީ ބައްލަވާލައްވާފައެވެ. އަދި ޖަލުގެ ހާލަތު އިތުރަށް ރަނގަޅު ކުރުމަށްޓަކައި ކުރަންހުރި ކަންތައްތަކުގެ މަޢުލޫމާތު އޮޅުންފިލުއްވައި، އެކަންކަމާ ގުޅޭގޮތުން  ޑިފެންސް މިނިސްޓަރާއި، ހޯމް މިނިސްޓަރާ މަޝްވަރާ ކުރައްވާފައިވާ ކަމަށް ރައީސް އޮފީހުން ބުނެއެވެ.

ރައީސް ސޯލިހް ވެރިކަމަށް ވަޑައިގެންނެވުމަށް ކުރެއްވި ކެންޕެއިން ތެރޭގައި ރާއްޖެޓީވީން ގެނެސްދިން ރައްޔިތުންގެ ދަރުބާރު ޕްރޮގްރާމުގައި ވާހަކަފުޅު ދައްކަވަމުން އެމަނިކުފާނު ވިދާޅުވެފައިވަނީ ރާއްޖޭގެ ޖަލުތަކަކީ އިންސާނުން ތިބެން ހެޔޮވާވަރު ތަނެއް ނޫން ކަން އަމިއްލަފުޅަށް ވެސް ފެނިވަޑައިގެންނެވި ކަމަށެވެ. ރައީސް ޔާމީންގެ ސަރުކާރުން  ކުއްލި ހާލަތު އިއުލާން ކޮށްފައިވަނިކޮށް ޖުމްހޫރީ މައިދާން ސަރަހައްދަށް ވަދެވަޑައިގަންނަން މަސައްކަތްޕުޅު ކުރެއްވުމުން އެމަނިކުފާނު ހައްޔަރުކޮށް ގާތްގަނޑަކަށް ނުވަ ވަރަކަށް ދުވަސް ވަންދެން ޖަލުގައި ބަހައްޓާފައިވެއެވެ.

ރައީސް ސޯލިހް ދޫނިދޫ ޖަލަށް ޒިޔާރަތް ކުރެއްވިއިރު ޖަލުތަކުގެ ހާލަތާއި ގުޅިގެން ރައީސް ސޯލިހު ވިދާޅުވެފައިވަނީ ސަރުކާރުގެ ވެރިކަމެއްގެ ފުރަތަމަ 100 ދުވަހު ޖަލުތަކުގެ އޮޑިޓެއް ހައްދަވާނެ ކަމަށެވެ.