ސީރިއާއަށް އެހީވުމަށް ކެމްޕޭނެއް ފަށައިފި

ހަނގުރާމައިގައި ސީރިއާގެ ހަލަބުން ބޭރުކޮށްފައިވާ މުސްލިމް އަޚުންނާއި އުޚްތުންނަށް އެހީފޯރުކޮށް ދިނުމަށް، ރާއްޖޭގެ ބައެއް މަދަނީ ޖަމިއްޔާތައް ގުޅިގެން ކެމްޕޭނެއް ފަށައިފި އެވެ.

ދިވެހި ޖަމިއްޔާތައް ގުޅިގެން އުފައްދާފައިވާ އިންޓަނޭޝަނަލް އެއިޑް ކެމްޕެއިންގެ މެމްބަރެއް ކަމުގައިވާ އާދަމް ނާއިފު ވިދާޅުވީ ހަލަބުން 50،000 އަށް ވުރެ ގިނަ މީހުން ބޭރުކޮށްލާފައި ވާއިރު، ރެފިއުޖީ ކޭމްޕްތަކުގައި އެ މީހުން ދިރިއުޅެމުން ދަނީ ނިކަމެތި ހާލަތެއްގައި ކަމަށެވެ.

އެ މީހުންނަށް އެހީވުމަކީ މުސްލިމް އަޚުންގެ މައްޗަށް ލާޒިމު ކަމެއް ކަމަށާއި ދިވެހި ޖަމިއްޔާތަކުން ފެށި ކެމްޕެއިން ފެބްރުއަރީ މަހުގެ ނިޔަލަށް ކުރިޔަށް ގެންދާނެ ކަމަށް ނާއިފު ވިދާޅުވި އެވެ.

ހަލަބުން ބޭރުވެ، ރެފިއުޖީ ކޭމްޕްތަކުގައި ތިބި މީހުންނަށް ފޮނުވާނީ އެއް ކޮންޓޭނަރުގެ މަސްދަޅާއި، ގޮދަޑި އާއި ބްލެންކެޓާއި ކުޑަކުދިންގެ ކާނާ ކަމަށް ނާއިފު ވިދާޅުވި އެވެ.

"ޖުމުލަ ތިން ކޮންޓެއިނަރުގެ މުދާ ފޮނުވަން ވަނީ ރާވާފައި. މި ކެމްޕޭންގެ ފުރަތަމަ ހަރަކާތް ހުކުރު ދުވަހު ބާއްވަން ވަނީ ނިންމާފައި. އަޅުގަނޑުމެން އެދެނީ ވީހާ ވެސް ގިނަ ޖަމިއްޔާތަކުންނާއި ކުންފުނިތަކުން ވެސް މި ކެމްޕޭނުގައި ބައިވެރިވުން،" ނާއިފު ވިދާޅުވި އެވެ.

ކެމްޕޭނުގައި ލިބޭ ތަކެތި ހާލުގައި ޖެހިފައިވާ ސީރިއާގެ މުސްލިމުންނާ ހަވާލުކުރާނީ ތުރުކީގެ ޖަމިއްޔާއެއް މެދުވެރިކޮށް ކަމަށް ވެސް ނާއިފު ވިދާޅުވި އެވެ.

ތިން ކޮންޓެއިނަރުގެ މުދާ ގެންދާނީ ސީރިއާއާ އިންވެގެން އޮންނަ ތުރުކީއަށް ކަމަށާއި އެހީ ސިރިއާއަށް ގެންގޮސް ބެހުމަށް ހަވާލުކޮށްފައިވާ ޖަމިއްޔާއަކީ ތުރުކީގެ ސަރުކާރު ގަބޫލްކުރާ ޖަމިއްޔާއަކަށް ކަމަށް ވެސް ނާއިފު ވިދާޅުވި އެވެ.