އެމްޑީޕީގެ ލީޑާޝިޕްގެ ބައެއް ބޭފުޅުން މަޖިލީހަށް
އެމްޑީޕީ ޕްރައިމަރީ ޖެނުއަރީ 18ގައި
(ކ-ވ)އަލީ ނިޔާޒު، އަނަސް އަބްދުއްސައްތާރު، ހަސަން ލަތީފު އަދި ހިސާން ހުސައިން
އެމްޑީޕީގެ ލީޑަރޝިޕްގެ ބައެއް ބޭފުޅުން އަންނަ އަހަރު ބާއްވާ ރައްޔިތުންގެ މަޖިލީހުގެ އެމްޑީޕީ ޕްރައިމަރީގައި ވާދަކުރައްވާނެ ކަމަށް އިއުލާން ކުރައްވައިފިއެވެެ.
މިފަހަރުގެ މަޖިލީސް އިންތިޚާބުގެ ޕްރައިމަރީގައި އެމްޑީޕީގެ ފަރާތުން ވާދަކުރައްވާނެ ކަމަށް އިއުލާން ކުރައްވާފައިވާ ބޭފުޅުންގެ ތެރޭގައި އެމްޑީޕީގެ ސެކެޓްރީ ޖެނެރަލް އަދި ގަނޫނީ ވަކީލު އަނަސް އަބްދުއްސައްތާރާއި، އެމްޑީޕީގެ ޗެއާޕާސަން ހަސަން ލަތީފާއި، އެމްޑީޕީގެ ޗެއާޕާސަންގެ ނައިބު އިދާރީ އަލީ ނިޔާޒާއި އެމްޑީޕީގެ ޗެއާޕާސަން ނައިބު މާލީ އަހުމަދު އަބްދުﷲގެ އިތުރުން އެ ޕާޓީގެ ލީގަލް ޑިރެކްޓަރު ހިސާން ހުސައިން ހިމެނެއެވެ.
އޭގެ ތެރެއިން އަނަސް އެމްޑީޕީ ޕްރައިމެރީގައި ވާދަކުރައްވަނީ މާފަންނު މެދު ދާއިރާއަށެވެ. ދާއިރާ ރައްޔިތުން ތާއީދު ކޮށްދެއްވުމަށް އަނަސް ވަނީ އެދިވަޑައިގެންފައެވެ.
ހެންވޭރު ހުޅަނގު ދާއިރާއަށް ހަސަން ލަތީފު ވާދަކުރައްވާނެކަމަށް ވަނީ އިއުލާން ކުރައްވާފައެވެ. ޕްރައިމަރީގައި އޭނާ ހޮވުމަށް މަސައްކަތް ކުރަން ބޭނުންވާ މީހުންނަށް އެ ފުރުސަތު އޭނާ ވަނީ ހުޅުވާލާފައެވެ.
ހިސާން ހުސައިން ވާދަކުރައްވަނީ ތުޅާދޫ ދާއިރާއަށެވެ. ހިސާން ވިދާޅުވީ ތުޅާދޫ ދާއިރާގެ ގޮނޑިއަށް ވާދަ ކުރައްވަން ނިންމަވާފައިވާ ކަމަށާއި އެ ދާއިރާގައި ހިމެނޭ، ގޮއިދޫ، ފުޅަދޫ، އަދި ފެހެންދޫ ރައްޔިތުން ތަމްސީލް ކުރުމުގައި ފުރުސަތު އޭނާއަށް އެ ރައްޔިތުން ދޭނެ ކަމަށް އުންމީދު ކުރައްވާ ކަމަށެވެ.
މީގެ އިތުރުން އަލީ ނިޔާޒު ވާދަކުރައްވަނީ ހުޅުމާލެ ދާއިރާއަށެވެ. އަލީ ނިޔާޒު ވަނީ އެ ދާއިރާގެ ޕްރައިމަރީގައި ވާދަކުރެއްވުމަށް އެމްޑީޕީގެ މެމްބަރޝިޕް އެންޑް ކެންޕެއިން ކޮމެޓީގެ ޗެއަރމަން އަދި އެ ކޮމެޓީގެ މެމްބަރުކަމުގެ މަސްއޫލިއްޔަތުން އިސްތިއުފާ ވެސް ދެއްވާފައެވެ.
އެމްޑީޕީގެ ޗެއާޕާސަން ނައިބު މާލީ އަހުމަދު އަބްދުﷲ ވާދަ ކުރައްވަން ނިންމަވާފައި ވަނީ ބާރަށު ދާއިރާގެ އެމްޑީޕީ ޕްރައިމަރީގައެވެ. މަޖިލިސް އިންތިހާބަށް އެމްޑީޕީގެ ޓިކެޓް ހޯއްދެވުމަށް އަހުމަދު ގެންދަވަނީ ކެމްޕެއިން ކުރައްވަމުންނެވެ.
އެމްޑީޕީގެ މަޖިލިސް ޕްރައިމަރީ ބޭއްވުމަށް ނިންމާފައި ވަނީ އަންނަ އަންނަ އަހަރުގެ ޖެނުއަރީ 18ގައެވެ. ޕްރައިމަރިއަށް ކުރިމަތިލުމުގެ ސުންގަޑި ހަމަވާނީ އަންނަ މަހުގެ 19 ވަނަ ދުވަހުއެވެ.
އެ ޕާޓީގެ ފަރާތުން ވާދަކުރާނެ ދާއިރާތައް އިއުލާން ކުރާނެ ދުވަހެއް ކަމަށް ބަޔާންކޮށްފައި ވަނީ 30 ނޮވެމްބަރު 2018 އެވެ.
