މި ސަރުކާރުގައި ދިވެހިރާއްޖޭގެ ފަތުރުވެރިކަން މާކެޓް ކުރުމަށް އާ ގޮތްތައް ބޭނުންކުރައްވާނެ ކަމަށާއި، ރާއްޖޭގެ ވަކިވަކި ހިސާބުތައް މާކެޓް ކުރުމަށް އިސްކަމެއް ދެއްވާނެ ކަމަށް މިނިސްޓަރ އޮފް ޓުއަރިޒަމް އަލީ ވަހީދު ވިދާޅުވެއްޖެއެވެ.
މަޤާމާއި ހަވާލުވެވަޑައިގެން ފުރަތަމަ ހަފްތާގައި ކުރެއްވި މަސައްކަތް ރައްޔިތުންނާއި ހިއްސާކުރެއްވުމަށް ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ އަލީ ވަހީދު ވިދާޅުވީ، ރާއްޖެ މާކެޓް ކުރުމަށް އާ ގޮތްތައް މި ސަރުކާރުން ތަޢާރުފު ކުރާނެ ކަމަށާއި، މިހާރު އާންމުކޮށް ބައިވެރިވާ ފެއާތަކުގެ އިތުރުން ރާއްޖެ ޕްރޮމޯޓް ކުރުމަށް އިތުރު ފެއާތަކުގައިވެސް ބައިވެރިވާނެ ކަމަށެވެ.
ދިވެހިރާއްޖެ މާކެޓް ކުރުމަށް ކަނޑައެޅިފައިވާ ބަޖެޓް ތިން ގުނައަށް އިތުރު ކުރެވިފައިވާކަން ފާހަގަކުރައްވާ މިނިސްޓަރ ވިދާޅުވީ، ކުރިއަށް އޮތް ތާނގައި ދުނިޔޭގެ އިތުރު ސަރަޙައްދުތަކުގައި ރާއްޖެ ޕްރޮމޯޓް ކުރުމުގެ މަސައްކަތް ކުރެވޭނެ ކަމަށެވެ. އަދި ހަމަ އެއާއިއެކު ޑެސްޓިނޭޝަން މާކެޓިންގއަށް އިސްކަން ދެއްވާނެ ކަމަށް މިނިސްޓަރ ވިދާޅުވިއެވެ.
"ދިވެހިރާއްޖޭގެ ރަށްތައް، ނުވަތަ އަތޮޅުތައް، ނުވަތަ ސަރަޙައްދުތައް ވަކިވަކި ޑެސްޓިނޭޝަންސްތަކެއްގެ ގޮތުގަ މާކެޓް ކުރުމަކީ އާ ސަރުކާރުގެ ވަރަށް ބޮޑު ވިސްނުމެއް"، މިނިސްޓަރ ވިދާޅުވިއެވެ.
މި މޭރުމުން ވާހަކަދައްކަވަމުން، އައްޑޫ ސިޓީއިން މިސާލު ދައްކަވާ މިނިސްޓަރ ވިދާޅުވީ، އާ ސަރުކާރުގެ އަމާޒަކީ ލާމަރުކަޒީކޮށް ރާއްޖެ މާކެޓް ކުރުން ކަމަށެވެ.
"އަޅުގަނޑާ މި ހަފްތާ ތެރޭގަ ބައްދަލުވީ އައްޑޫ ސިޓީ ކައުންސިލާ. އައްޑޫ އަކީ ހަމަ ވަރަށް ތަޖުރިބާކާރު، މި އިންޑަސްޓްރީގެ ރައްޔިތަކު ދިރިއުޅޭ ސިޓީއެއް. އެބޭފުޅުން އެބޮތް އެބޭފުޅުންގެ ޝޯޓް ޓަރމް، ލޯންގް ޓަރމް ޕްލޭނެއް ހަދާފަ. އެހެންވީމަ އާ ސަރުކާރުގެ ސިޔާސަތަކަށް ވާނީ ލާމަރުކަޒީކޮށް، ބާރުތައް ދެވެން އޮތް އެންމެ ފުން މިންވަރަކަށް ދޫކޮށްގެން، ޑެސްޓިނޭޝަންސްތަކެއްގެ ގޮތުގަ ރާއްޖެ ތަރައްޤީކުރުން"، މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖެ ޕްރޮމޯތް ކުރުމުގެ މަސައްކަތް ކުރާނީ އެމްއެމްޕީއާރްސީން ކަމަށާއި، އެ ތަނުގައި ތިބީ ވަރަށް ޤާބިލް ޓީމެއް ކަމަށެވެ. އަދި ސީދާ މިނިސްޓަރު އެތަން ހިންގުމުގެ ތެރެއަށް ވަދެވަޑައިނުގަންނަވާނެ ކަމަށް މިނިސްޓަރ ވިދާޅުވިއެވެ.
އެމްއެމްޕީއާރްސީ ހިންގުމަށް އެ ކުންފުނީގެ ވެރިއަކަށް އައު ބޭފުޅަކު ވަރަށް އަވަހަށް އައްޔަން ކުރައްވާނެ ކަމަށްވެސް ހުކުރު ދުވަހު މިނިސްޓަރ ވިދާޅުވިއެވެ.
