ވޯޓާސް ލިސްޓްގެ ތަފާތު ތިން ލިސްެޓެއް، ސައްޚަ ލިސްޓް ނޭނގި ސޮޔެއް ނުކުރެވޭނެ: ޖޭޕީ
ސޮއި ކުރެވޭނީ އެއް ލިސްޓެއްގައި
ޖޭޕީގެ ކައުންސިލް ބައްދަލުވުމެއްގެ ތެރެއިން
ލޯކަލް ކައުންސިލް އިންތިޚާބުގައި، ވޯޓްލާން ރަޖިސްޓްރީ ކޮށްފައިވާ މީހުންގެ ލިސްޓްގައި ސޮއި ނުކުރާނެ ކަމަށް ޖުމްހޫރީ ޕާޓީން ބުނެފިއެވެ.
ވޯޓާސް ލިސްޓުގައި ސޮއިކުރުމަށް ޖުމްހޫރީ ޕާޓީން ދެކޮޅު ހެދީ ލިސްޓުތަކުގައި ސޮއި ކުރުމަށް އަންގާރަ ދުވަހު އިލެކްޝަންސް ކޮމިޝަނަށް ދިއުމަށް ފަހު، އެ ކޮމިޝަނުން ތަފާތު ތިން ލިސްޓެއް ގެންގުޅޭ ކަމަށް ބުނެއެވެ.
ޖޭޕީގެ އިސް އޮފިޝަލަކު ރާއްޖެއެމްވީއަށް ބުނީ، ވޯޓާސް ލިސްޓްގައި ސޮއިކުރެވޭނީ، ކޮންމެވެސް ސައްޚަ އެއް ލިސްޓުގައި ކަމަށެވެ. އެހެންނަމަވެސް ޖޭޕީން ބުނީ، އީސީން ތަފާތު ތިން ލިސްޓެއް ގެންގުޅޭތީ، އެއީ ކޮން ތިން ލިސްޓެއްކަން ސާފު ނުވާހާ ހިނދަކު ވޯޓާސް ލިސްޓްގައި ސޮއިކުރެވެން ނޯންނާނެ ކަމަށެވެ.
"އަޅުގަނޑުމެންނަށް ސޮއި ކުރެވޭނީ އެއް ލިސްޓެއްގައި. އެކަމަކު އެބަދޭ ތަފާތު ތިން ލިސްޓެއް. ކީއްކުރަން ގެންގުޅޭ ތިން ލިސްޓެއްތޯ؟ އެހެންވީމަ ކޯންޗެއްކަން ނޭނގި އެގޮތަކަށް އަދި ސޮއެއް ނުކުރެވޭނެ،" ޖޭޕީގެ އޮފިޝަލް ވިދާޅުވިއެވެ.
އޮފިޝަލު ވިދާޅުވި ގޮތުގައި އެއް ލިސްޓުގައި މީހުންގެ ފޮޓޯއާއި ހުރިހާ މައުލޫމާތެއް ހުއްޓެވެ. ދެވަނަ ލިސްޓުގައި ފޮޓޯއާއި ނަން ހުރި އިރު ތިން ވަނަ ލިސްޓުގައި އޮތީ ހަމައެކަނި ނަން ކަމަށް އޮފިޝަލު ވިދާޅުވިއެވެ.
ވޯޓަސް ލިސްޓުގައި ސޮއި ކުރުމަށް ޖޭޕީން ދެކޮޅު ހަދާފައިވާ އިރު އިދިކޮޅު އެމްޑީޕީން ވެސް ވަނީ ވޯޓާސް ލިސްޓުގައި ސޮއި ކުރުމަށް ދެކޮޅު ހަދާފައެވެ.
އެމްޑީޕީން ބުނެފައިވަނީ، ވޯޓާސް ލިސްޓުގައި ތިބި މީހުންގެ އައީޑި ނަންބަރު އެނގެން ނެތް ކަމަށާއި ވޯޓުލާ މީހުންނަކީ ކޮން ބައެއްކަން ނޭނގޭ ކަމަށެވެ. އަދި އެ ލިސްޓުގައި ސޮއި ކުރި ނަމަވެސް ވެރިފައި ވެގެން އަންނާނީ އެ ލިސްޓު ކަމުގެ ޔަގީން ކަމެއް ނެތް ކަމަށެވެ.
އެމްޑީޕީން ބުނެފައިވަނީ، އެންމެ ފަހުން ބޭއްވި ލޯކަލް ކައުންސިލު އިންތިހާބުގައި ވޯޓާސް ލިސްޓް އައީ ފޮޓޯއާ އެކުގައި ކަމަށާއި، މިނިވަން އިންސާފުވެރި ދެފުށް ފެންނަ އިންތިހާބެއްގައި އެންމެ ބޮޑަށް ސިއްރު ކުރަން ޖެހެނީ ވޯޓުލާ މީހާއެއް ނޫން ކަމަށެވެ. އެހެންވީމަ ވޯޓުލާ މީހާ މިހާ ބޮޑަށް ސިއްރު ކުރުމުގައި ވާ ސިއްރަކީ ކޮބައިތޯ އެމްޑީީޕީން ވަނީ ސުވާލު އުފައްދާފައެވެ.
ލޯކަލް ކައުންސިލް އިންތިހާބު ބޭއްވުމުގެ ތާރީހު ވަނީ ތިން ފަހަރެއްގެ މަތިން ފަސްކޮށްފައެވެ. އެގޮތުން އެންމެ ފަހުން ފަހަރު ފަސްކުރިއިރު އިންތިހާބު ބޭއްވުމަށް ހަމަޖެހިފައިވަނީ މިމަހުގެ 15 ގައެވެ. ނަމަވެސް ސްވައިން ފްލޫގެ ސަބަބުން އިންތިހާބު އަންނަ މެއި މަހުގެ 6 ވަނަ ދުވަހަށް ފަސްކުރެވިގެން ދިޔައެވެ.
މިފަހަރުގެ ކައުންސިލް އިންތިހާބުގައި 1،505 ކެންޑިޑޭޓުން ވާދަ ކުރާއިރު، އޭގެ ތެރެއިން 1،127 ކެންޑިޑޭޓުންނަކީ ސިޔާސީ ޕާޓީތަކުގެ ފަރާތުން ކުރިމަތިލާފައިވާ ކެންޑިޑޭޓުންނެވެ. އަމިއްލަ ގޮތުން ވާދަކުރަނީ 378 ކެނޑިޑޭޓުންނެވެ.
