ޕާކިސްތާނުގެ މާރުކޭޓެއްގައި ގޮއްވާލި ބޮމެއްގަ 31 މީހުން މަރުވެއްޖެ
ބޮން އޮތީ ތަރުކާރީތަކެއްގެ ތެރޭގައި ފޮރުވާފަ
ބޮން ގޮއްވާލި ސަރަހައްދު
ޕާކިސްތާނުގެ އޮރަކްޒާއީ ސަރަހައްދުގެ މާރުކޭޓެއްގައި ބޮމެއް ގޮއްވާލުމުގެ ސަބަބުން 31 މީހުންގެ ފުރާނަ ގެއްލި، 50 އަށް ވުރެ ގިނަ މީހުން ޒަހަމްވެއްޖެއެވެ.
ހުކުރު ދުވަހު ދިން މި ހަމަލާގައި ބޭނުންކުރި ބޮން އޮތީ ތަރުކާރީތަކެއްގެ ތެރޭގައި ފޮރުވާފައިވާ ކަމަށް އޭއެފްޕީ އަށް މައުލޫމާތު ދިން އޮފިޝަލަކު ވަނީ ވިދާޅުވެފައެވެ.
މި ހާދިސާއާއި ގުޅިގެން ޕާކިސްތާނުގެ ބޮޑު ވަޒީރު އިމްރާން ޚާން ވަނީ މަރުވި މީހުންނާއި، ޒަހަމްވި މީހުންނާއި، އެމީހުންގެ އާއިލާތަކަށް ހެޔޮ ދުޢާ އާއި ތައުޒިޔާ ވިދާޅުވެފައެވެ.
އޮރަކްޒާއީ އަކީ އަފްގާނިސްތާނާއި ޕާކިސްތާނުގެ ސަރަހައްދީ ރޮނގު ކައިރީގައި އޮންނަ، ނިސްބަތުން ޝީޢީން ގިނަ ހިސާބެކެވެ. އަދި މި ސަރަހައްދު ނިސްބަތް ވަނީ އެމެރިކާއިން ދުނިޔޭގެ އެންމެ ނުރައްކާތެރި ކަމަށް ބަލާ އެއް ސަރަހައްދު ކަމުގައިވާ ޕާކިސްތާނާއި އަފްގާނިސްތާނުގެ ފަރުބަދަމަތީ ހިސާބުގަނޑަށެވެ.
ޒަމާނުއްސުރެން މި ސަރަހައްދުގައި ހިނގަމުން އައިސްފައިވަނީ، އިނގިރޭސިންގެ އިސްތިއިމާރުގެ ދުވަސްވަރުގެ ގަވައިދުތަކާއި ސަރަހައްދީ ގަބީލާތަކުގެ އަމިއްލަ ގާނޫނުތަކެވެ. ޕާކިސްތާނުގެ ގާނޫނު މި ސަރަހްދުގައި ތަންފީޒު ކުރުމަށް މަގުފަހި ކުރުމަށް، މި އަހަރުގެ ކުރީކޮޅު ޕާކިސްތާންގެ ސަރުކާރުން ވަނީ ޕާކިސްތާނުގެ ޚައިބަރު ޕަކްތުންވާ ޕްރޮވިންސްގެ ދަށަށް މި ސަރަހައްދު ގެނެއުމަށް ގާނޫނެއް ހަދާފައެވެ.
ހުކުރު ދުވަހު ވަނީ ކަރާޗީގައި ހުންނަ ޗައިނާ ކޮންސުލެޓްއަށް ވެސް ހަމަލާ ދީފައެވެ. ނަމަވެސް މިއީ އެއް ބަޔަކު ދިން ހަމަލާއެއް ކަމަށް ނުބެލެވޭ ކަމަށް ހަބަރު ފަތުރާ ވަސީލަތްތަކުން މައުލޫމާތު ލިބެއެވެ.
