އުރީދޫ ކަލަރ ރަން ގައި މިފަހަރު 5000 އަށްވުރެ ގިނަ މީހުން ބައިވެރިވި!

އުރީދޫ ކަލަރ ރަންގައި މިފަހަރު 5000 އަށްވުރެ ގިނަ މީހުން ބައިވެރި ވެފައިވާ ކަމަށް އުރީދޫ އިން ބުނެފިއެވެ.

ހުކުރު ދުވަހުގެ ހަވީރު 4 ޖެހި އިރު ހުޅުމާލޭ ސެންޓްރަލް ޕާކުގައި ފެށި މި ރަން ނިންމާލާފައި ވަނީ އިރުއޮއްސި 6 ޖެހިއިރުއެވެ.

އުރީދޫ ކަލަރ ރަން ފައްޓަވައި ދެއްވީ ނާއިބު ރައީސް ފައިސަލް ނަސީމްއެވެ. އެމަނިކުފާނުގެ އިތުރުން ބައެއް ވަޒީރުން ވެސް މި ދުވުމުގައި ބައިވެރިވެ ވަޑައިގަތެވެ.

އުރީދޫ ކަލަރ ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ކުލަ ސްޓޭޝަންތަކުން، ކުލަގަދަ ގޮތެއްގައި އެކަން ވަނީ ފާހަގަކޮށްފައެވެ. އަދި މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ ޔާއި، ޖޮގްކޮށްފަޔާއި، ދުވެފަ ނޫނީ ނަށަމުން ވެސް ބައެއް ފަރާތްތަކުން ވަނީ ދުވުން ނިންމާފައެވެ.

އުރީދޫ އިން ވަނީ ކަލަރ ރަންގެ ފޯރި އިތުރު ކުރުމުގެ ގޮތުން އެންމެ ފޯރިގަދަ ދުވުންތެރިންނާއި އަދި އެންމެ ސަޅި ކޮސްޓިއުމްތައް ފާހަގަކޮށް، ވަރަށް ތަފާތު ހަދިޔާ ތަކެއް ދީފައެވެ.

އުރީދޫގެ ޑިރެކްޓަރ އޮފް ސޭލްސް އެންޑް ބްރޭންޑް ހުސެއިން ނިޔާޒް ވިދާޅުވީ އާންމުންގެ ފަރާތުން ކަލަރ ރަން އަށް ވަރަށް ބޮޑު ތަރުހީބެއް ލިބުނު ކަމަށާއި މިފަހަރު ބޭއްވި މަޑި ފެސްޓިވަލްގައި ވަރަށް ގިނަ ކުޑަކުދިން ބައިވެރިވި ކަމަށެވެ. އަދި މި އަންނަ އަހަރު މިއަށްވުރެ ތަފާތުކޮށް، އާންމުންގެ ހިޔާލު ހޯދައިގެން ކަލަރ ރަން ބާއްވާނެ ކަމަށް ވެސް ނިޔާޒް ވިދާޅުވިއެވެ.

އުރީދޫގެ ކަލަރ ރަން ނިންމުމަށްފަހު ހުކުރު ދުވަހުގެ ރޭ ހުނަރުވެރި ދިވެހި މިއުޒިކީ ފަންނާނުންނާއި އެކު މިއުޒިކް ޝޯ އެއް ވަނީ ބާއްވާފައެވެ. ޝޯގައި ބައިވެރިވި މިއުޒީޝަނުންގެ ތެރޭގައި ޓްރެފިކް ޖޭމް، ލެވިޓޭޝަން ބައި ސަމާ، ޒިޕޯ އާއި ސޮއްޕެ، އަދި ހަބޭސް ބޮޑުބެރު ހިމެނެއެވެ.