އޫރީދޫ ކަލަރ ރަން މާދަމާ!

އުރީދޫގެ މަޤްބޫލު ކަލަރ ރަން ތަފާތު ހަރަކާތްތަކާއެކު ހުކުރު ދުވަހު ފަށާނެއެވެ.

ހުޅުމާލޭ ސެންޓްރަލް ޕާކުގައި ކުރިއަށްދާ އުރީދޫ ކަލަރ ރަންގެ ފޯރިގަދަ ހަރަކާތްތަކުގައި ބައިވެރިވުމަށް އުރީދޫއިން އެންމެހާ ފަރާތްތަކަށް މަރުހަބާ ކިޔާފައިވާއިރު އެކި ކުލަތަކާއި އެކު، އުފާވެރި މާޙައުލެއްގައި ބާއްވާ އުރީދޫގެ މަޤްބޫލު ދުވުން މި އަހަރު އިތުރަށް ތަފާތު ކުރުމަށްޓަކައި، އެ ދުވަހު ކައިޓް ފެސްޓިވަލް އަކާއި ފޯރިގަދަ މިއުޒިކް ޝޯ އެއްވެސް ބޭއްވުމަށް ވަނީ ނިންމާފައެވެ.

ކަލަރ ރަންގެ ހަރަކާތްތަކަށް އަލަށް އިތުރު ކުރެވިފައިވާ ގުޑި މަހާސަމާ ބާއްވާނީ އިހުޒަމާނުއްސުރެ ދިވެހި އާއިލާތަކުގެ މެދުގައި އޮންނަ ގުޑި އެރުވުމުގެ އާދަކާދަ އައުކޮށް، މި ސަގާފަތް ދިރުވާ އާލާކުރުމުގެ މަޤްސަދުގައެވެ. ހުކުރު ދުވަހު ހެންދުނު 8.00 ގައި ފެށިގެންދާ މި މަހާސަމާގައި ތަފާތު ގުޑިތައް ދައްކާލުމުގެ އިތުރުން، ގުޑި ހެދުމަށް ދަސްކޮށްދިނުން، ގުޑި އެރުވުމުގެ މުބާރާތެއް، އަދި ބޮލްސް ރޭހެއްވެސް އޮންނާނެ ކަމަށް އުރީދޫ އިން ބުނެއެވެ. މި ހަރަކާތުގައި ކުދިބޮޑު އެންމެހާ ބޭފުޅުންނަށްވެސް، ޕްރީ-ރެޖިސްޓްރޭޝަން އަކާއި ނުލާ ބައިވެރިވެވޭނެއެވެ.

ސިއްހަތަށް ފައިދާހުރި އަދި މަޖާ ހަރަކާތެއްގެ ގޮތުގައި ދުވުން ޕްރޮމޯޓުކޮށްދޭ، އުރީދޫ ކަލަރ ރަން ހުކުރު ދުވަހުގެ ހަވީރު 3:30 ގައި ފަށާއިރު ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ މި ކުރު ދުވުމަކީ އަލަށް ދުވާ ފަރާތްތަކާއި އާއްމުކޮށް ދުވާ ފަރާތްތަކަށްވެސް ބައިވެރިވުމަށް މަޖާވާނެ އިވެންޓެކެވެ. އުރީދޫ ކަލަރ ރަންގައި ކޮންމެ ކިލޯމީޓަރ އެއް ދުވެ ނިމުމުން، ބެހެއްޓިފައިވާ ކުލަ ސްޓޭޝަންތަކުން، ކުލަގަދަ ގޮތެއްގައި އެކަން ފާހަގަ ކުރާނެއެވެ. މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ، ޖޮގްކޮށްފަ، ދުވެފަ ނޫނީ ނަށަމުންވެސް މި ދުވުން ނިންމިދާނެއެވެ. ކަލަރ ރަންގެ ފޯރި އިތުރު ކުރުމުގެ ގޮތުން ވަނީ އެންމެ ފޯރިގަދަ ދުވުންތެރިންނާއި އަދި އެންމެ ސަޅި ކޮސްޓިއުމްތައް ފާހަގަކޮށް، ވަރަށް ތަފާތު ހަދިޔާ ތަކެއް ދޭން ހަމަޖައްސާފައިވާ ކަމަށް ވެސް އުރީދޫ އިން ބުންޏެވެ.

ކަލަރ ރަން ނިމުމަށްފަހު، ރޭގަނޑު 8:30 އިން ފެށިގެން ހުނަރުވެރި ދިވެހި މިއުޒިކީ ފަންނާނުންނާއި އެކު މިއުޒިކް ޝޯ އެއްވެސް ބޭއްވިގެންދާނެ ކަމަށާއި ޝޯގައި ބައިވެރިވާ މިއުޒީޝަނުންގެ ތެރޭގައި ޓްރެފިކް ޖޭމް، ލެވިޓޭޝަން ބައި ހެބޭސް، ސަމާ، ޒިޕޯ އާއި ސޮއްޕެ، އަދި ހަބޭސް ބޮޑުބެރު ހިމެނޭ ކަމަށް އުރީދޫ އިން މައުލޫމާތުދެއެވެ.