ދިވެހިންގެ މެދުގައި ބޮޑު މަގުބޫލު ކަމެއް ހޯދާފައިވާ "މާކަނާ ޝޯ"ގައި، މިހާރުގެ ރައީސް އިބްރާހިމް މުހައްމަދު ސޯލިހްގެ ކެރެކްޓަރ ހިމަނައި، ރާއްޖެޓީވީން އަލުން އެ ޝޯ ދައްކަން ފެށުމަށް ނިންމައިފި އެވެ.
ދިވެހި ފުރަތަމަ އެނިމޭޓެޑް ޝޯ ހުއްޓިފައި އޮތުމަށްފަހު ރާއްޖޭޓީވީން ދެއްކުމަށް އަންގާރަ ދުވަހު ވަނީ މިކަމުގެ އެއްބަސްވުމުގައި ސޮއިކޮށްފަ އެވެ. މިއެއްބަސްވުމުގައި ރާއްޖެޓީވީގެ ފަރާތުން ސޮއިކުރެއްވީ މެނޭޖިން ޑިރެކްޓަރ އަހުމަދު ސަލީމް އެވެ. ސެލްމިން އެނިމޭޝަންގެ ފަރާތުން ސޮއިކުރެއްވީ ސްޓޫޑިއޯގެ ސީއީއޯ ޔާމީން ރަޝީދު އެވެ.
ރާއްޖެޓީވީގައި ބޭއްވި މި ރަސްމިއްޔާތުގައި މާކަނާ ޝޯގެ ޓްރެއިލާރ އާންމު ކުރުމަށްފަހު ޔާމީން ވިދާޅުވީ މިފަހަރުގެ ޝޯ ވަރަށް ތަފާތުވާނެ ކަމަށާއި، އައު ސަރުކާރުގެ ރައީސް އިބްރާހިމް މުހައްމަދު ސޯލިހްގެ "ތަފާތު ގޮތަކަށް" ފެނިގެންދާނެ ކަމަށެވެ.
"އަނެއްކާ ވެސް ތަފާތު އަޑެއް އަޅާފަ އާ ރައީސް އަށް އާ ކެރެކްޓަރ އެއް. ތަފާތު ޕާސަނަލަޓީގެ ރައީސް އެއް ފެނިގެންދާނެ އަނެއްކާ ވެސް" ޔާމީން ވިދާޅުވިއެވެ.
ރާއްޖެ ޓީވީގެ މެނޭޖިން ޑިރެކްޓަރު އަހްމަދު ސަލީމް ވިދާޅުވީ ދުވަސްތަކަކަށްފަހު މާކަނާ ޝޯ ފެނިގެންދާތީ ހިތްހަމަ ޖެހޭ ކަމަށާއި، މިއީ ދިވެހިންނަށް ލިބޭ ބޮޑު އުފަލެއް ކަމަށެވެ. ސަލީމް ވިދާޅުވީ މީގެ ކުރިން ދެއްކި މާކަނާ ޝޯތަކުން ޔާމީންއާއި ޔާމީންގެ ޓީމުގެ ހުނަރު ފެނިގެންދިޔަ ކަމަށާއި، އާ ރައީސް އާ އެކުގައި ނުކުންނަ އާ ސީރީޒް މާ ފުރިހަމަ ވެގެންދާނެ ކަމާމެދު ޝައްކު ނުކުރާ ކަމަށެވެ.
"މާކަނާ ޝޯގެ އާ ސީރީޒުން އަޅުގަނޑު އުންމީދު ކުރަނީ ބެލުންތެރިން އުންމީދު ކުރާފަދަ، ބެލުންތެރިން ބޭނުންވާފަދަ ތަފާތު މެސެޖްތަކާއެކު އަލަށް އަޅުގަނޑުމެންނާއި ބައްދަލުކުރި އާ ސިޔާސީ މާހައުލު ވަރަށް ރަނގަޅަށް ތަމްސީލް ވެގެންދާނޭ. ވަރަށް ހުނަރުވެރި ޓީމަކުން ތައްޔާރު ކުރަނީ. އެހެންވީމަ އެކަމަށް ނެތް ޝައްކެއް، ސުވާލެއް ނެތް،" ސަލީމް ވިދާޅުވިއެވެ.
ސެލްމިން އެނިމޭޝަން ސްޑިއޯގެ މާކަނާ ޝޯއަކީ ރާއްޖޭގައި ވަރަށް ބޮޑު މަގުބޫލު ކަމެއް ހޯދި ޝޯއެކެވެ.
ރައީސް ސޯލިހްގެ ކެރެކްޓަރ އާއެކު ގެނެސްދޭ މާކަނާ ޝޯގެ 13 ވަނަ ސީޒަން ރާއްޖެ ޓީވީން ދައްކަން ފަށާނީ ނޮވެމްބަރު 30 ވަނަ ދުވަހުގެ ރޭގަ އެވެ.
