ކޮންމެ މުވައްޒަފަކަށް ވެސް ބޭނުން ސިޔާސި ފިކުރެއްގަ އުޅެވޭނެ: ޔޫތު މިނިސްޓަރު
މަހުލޫފު ވިދާޅުވީ އެމަނިކުފާނަކީ ވަރަށް ސިޔާސީ ބޭފުޅެއް ކަމަށް
މިނިސްޓަރ މަހުލޫފު
ޔޫތު މިނިސްޓްރީގެ ކޮންމެ މުވައްޒަފަކަށް ވެސް އެ މުވައްޒަފަކު ބޭނުން ސިޔާސީ ފިކުރެއްގައި އުޅެވޭނެ ކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހްމަދު މަހުލޫފު ވިދާޅުވެއްޖެއެވެ.
"ދުޅަހެޔޮ ހަށިހެޔޮ އީދު" ގެ ނަމުގައި ސަރުކާރުން ހޯމަ ދުވަހުގެ ރޭ ގަލޮޅު ދަނޑުގައި ބޭއްވި ފުޓްބޯޅަ މުބާރަތަށް ފަހު ރާއްޖެ އެމްވީ އަށް ދެއްވި އިންޓަވިއު އެއް ގައި، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ ކުރީގެ މެމްބަރު މަހުލޫފު ވިދާޅުވީ އޭނާ އަކީ ވަރަށް ސިޔާސީ ބޭފުޅެއް ކަމަށާއި، ނަމަވެސް ސިޔާސީ ގޮތުން ބާއްވާ އެއްވެސް ޖަލްސާ އަކަށް ދިއުމަށް މުވައްޒަފުންނަށް ނާންގާނެ ކަމަށެވެ.
"އަޅުގަނޑު މިއަދު އެންމެ ފުރަތަމަ އޮފީހަށް ގޮސް އޮފީސް މުވައްޒަފުންނާއި ބައްދަލުކޮށްފަ އަޅުގަނޑު ދެންނެވިން އަޅުގަނޑަކީ ވަރަށް ސިޔާސީ މީހެކޭ. އެކަމަކު މިނިސްޓްރީގަ އަޅުގަނޑު ކުރާ މަސައްކަތެއްގައި އެއްވެސް ސިޔާސީ ކަމެއްގައި މުވައްޒަފުން ބައިވެރިވާކަށް ނުޖެހޭނޭ. ކޮންމެ މުވައްޒަފަކަށް އެ މުވައްޒަފަކު ބޭނުން ސިޔާސީ ފިކުރެއްގައި އުޅެވޭނެ. ޖަލްސާއަށް ދެވޭނެ،"މިނިސްޓަރ މަހުލޫފު ވިދާޅުވި އެވެ.
ޤައުމީ ފުޓުބޯޅަ ޓީމުގެ މެނޭޖަރުގެ މަޤާމު ވެސް އަދާކުރައްވާފައިވާ މިނިސްޓަރ މަހުލޫފު އިތުރަށް ވިދާޅުވީ، މިނިސްޓްރީގެ މުވައްޒަފުންނާއި ބައްދަލު ކުރެއްވުމަށްފަހު މުވައްޒަފުން ތިބީ އުފަލުން ކަން އެނގިލައްވާ ކަމަށާއި ސަރުކާރު ބަދަލު ވިޔަސް އެކުގައި މަސައްކަތް ކުރާން ތިއްބެވި ކަމަށެވެ.
ރައީސް އިބްރާހިމް މުހައްމަދު ސޯލިހުގެ ކެބިނެޓުގައި ހިމެނޭ ވަޒީރުން ހުވާކުރައްވާފައި ވާއިރު، މަޤާމާއި ހަވާލުވެ ވަޑައިގެންނެވީ ހަމައެކަނި ވަޒީރުކަމުގެ ޓައި އަޅައިގެން ހުންނަވަން ނޫން ކަމަށް މަހުލޫފު ވަނީ ވިދާޅުވެފައެވެ.
