ފަސްދޮޅަސް ފަސް އަހަރުވުމުން ރައީސް ކަމަށް ކުރިމަތި ނުލެވޭ އިސްލާހު ބާތިލް ކުރުމުގެ ބިލް ރައްޔިތުންގެ މަޖިލީހުގެ ޖަލްސާ އަށް ހުށަހަޅައިފިއެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި، ގާނޫނު އަސާސީ އަށް ގެނެސްފައިވާ އެ އިސްލާހު ބާތިލް ކުރުމަށްޓައި ވަނީ އެ ބިލް ފުރަތަމަ ކިޔުން އިއްވާފައެވެ.

އުމުރުން 65 އަހަރު ވުމުން ރައީސް ކަމަށް ކުރިމަތި ނުލެވޭ ގޮތަށް ގާނޫނު އަސާސީ އަށް ގެނައި އިސްލާހު ބާތިލު ކުރުމަށް ހުށަހަޅާފައި ވަނީ ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހުއެވެ. ފަލާހަކީ ކުރީގެ ރައީސް އަބްދުﷲ ޔާމީންގެ ސަރުކާރަށް ނިސްބަތްވާ، އަދި އެ އިސްލާހު ފާސްކުރުމަށް އިސްކޮށް އުޅުއްވި މެމްބަރެކެވެ.

ފަލާހު ބައެއް މީޑީއާތަކުގައި ވިދާޅުވެފައި ވަނީ ގާނޫނު އަސާސީ އަށް ގެނެސްފައިވާ އެ ބަދަލު ބާތިލު ކުރަން ހުށަހަޅާފައި ވަނީ ވެރިކަމަށް ކުރިމަތިލެވޭ އެންމެ މަތީ އުމުރު އެހެން ގައުމުތަކުގައި ވެސް ކަނޑައަޅާފައި ނެތުމުން ކަމަށެވެ.

ފެހި ގާނޫނު އަސާސީ އަށް އަމަލު ކުރަން ފެށި ފަހުން، 2015 ވަނަ އަހަރުގެ ޖޫން މަހުގެ 24 ވަނަ ދުވަހު މަޖިލީހުން ގެނައި އިސްލާހުގައި ބުނެފައި ވަނީ ރައީސުލްޖުމްހޫރިއްޔާގެ މަގާމަށާއި ރައީސުލްޖުމްހޫރިއްޔާގެ ނާއިބު ކަމަށް ކުރިމަތި ލެވޭނީ އުމުރުން 30 އަހަރާއި ފަސް ދޮޅަސް ފަސް އަހަރާ ދެމެދުގެ މީހުންނަށް ކަމަށެވެ.

ގާނޫނު އަސާސީ އަށް ގެނައި ފުރަތަމަ އިސްލާހު ފާސްކުރީ 78 މެމްބަރުންގެ އަޣްލަބިއްޔަތުންނެވެ. އެދުވަސް ވަރަކީ ސަރުކާރުގެ ކޮރަޕްޝަން އިންތިހާއަށް އިތުރުވެ، ގާނޫނުއަސާސީ އަށާއި ގާނޫނުތަކަށް ބޮޑެތި ބަދަލުތަކެއް ސަރުކާރުން ގެންނަމުން ދިޔަ ދުވަސްވަރެކެވެ. އެގޮތުން ސަރުކާރާ ދެކޮޅު ގިނަ މެމްބަރުންގެ ވޯޓު އެފަދަ ބިލްތައް ފާސްކުރުމަށް ހޯދާފައިވާކަން ފާހަގަ ކުރެވެއެވެ. 

ގާނޫނުއަސާސީ އަށް އިސްލާހެއް ގެނެވޭނީ މަޖިލީހުގެ ޖުމްލަ އަދަދުގެ ހަތަރުބައިކުޅަ ތިން ބައި މެންބަރުންގެ ތާއީދު ލިބިގެންނެވެ.