ފުރަތަމަ 100 ދުވަހުގެ ޕްލޭންގެ ތެރެއިން: ކަޅުވަކަރު މިސްކިތް ރޭވުން
ފުރަތަމަ 90 ދުވަހުގެ ތެރޭގައި ކަޅުވަކަރު މިސްކިތް ހޯދައި، އެ މިސްކިތް ރޭވުމަށް ވަނީ ނިންމާފަ
ކަޅުވަކަރު މިސްކިތުގެ ބައިތައް
ކުރީގެ ރައީސް އަބްދުﷲ ޔާމީންގެ ސަރުކާރުން ނެގި ކަޅުވަކަރު މިސްކިތް އަލުން ރޭވުމަށް އާ ސަރުކާރުން ނިންމައިފިއެވެ.
ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރަން ނިންމާފައިވާ ކަންކަން ހާމަކޮށްފައިވާ އިރު ފުރަތަމަ 90 ދުވަހުގެ ތެރޭގައި ކަޅުވަކަރު މިސްކިތް ހޯދައި އެ މިސްކިތް ރޭވުމަށް ވަނީ ނިންމާފައެވެ. ސަލްޓަން ޕާކުގައި ހުރި ކަޅުވަކަރު މިސްކިތް ނަގާފައި ވަނީ، ރައީސް ޔާމީންގެ ސަރުކާރުގައި 2016 ވަނަ އަހަރުގެ ތެރޭގައެވެ. އެ މިސްކިތް ނެގުމަށްފަހު ރައީސް ޔާމީންގެ ސަރުކާރުން ވަނީ އެތަނުގައި ވިންޓަ ޕާކެއް އަޅާފައެވެ. އާ ސަރުކާރުގެ ފުރަތަމަ 100 ދުވަހުގެ ތެރޭގައި، ރަށްރަށުގައި ހުރި ތަރިކަ އާއި، ދުވަސްވީ ބިނާތަކާއި، އާސާރު އެކުލެވޭ ތަންތަނާއި ތަކެތި ހިމާޔަތް ކުރުން އެންމެހާ ފަރާތްތަކަށް ލާޒިމުވާ ގޮތަށް ގާނޫނީ ޒިންމު ކަނޑައަޅާ، ތަރިކައިގެ ލިސްޓެއް އެކުލަވާލެވި، ހަރުދަނާ އުސޫލަކުން އާސާރު ބަލަހައްޓަން ފަށަން ވަނީ ނިންމާފައެވެ. އަދި އަލަށް އެކުލަވާލެވުނު ކެބިނެޓްގައި ތާރީހީ ތަރިކަ ހިމާޔަތް ކުރުމަށް އާޓްސް ކަލްޗަރ އެންޑް ހެރިޓޭޖްގެ ނަމުގައި މުޅިން އާ މިނިސްޓްރީ އެއް ވަނީ އުފައްދަވާފައެވެ.
