ޕާޓީ ބަދަލުކުރިޔަސް، ކުރި ކަންތައް ނުކުރާ ކަމަކަށް ނުވާނެ

ސޯޝަލް މީޑިއާގައިވެސް، މެއިން ސްޓްރީމް މީޑިއާގައިވެސް މިހާރު އެންމެ ހިނގާ ޚަބަރުތަކަކީ ރައީސް ޔާމީންގެ ސަރުކާރު ދިފާޢުކުރަން އެންމެ ބުރަކޮށް މަސައްކަތްކުރެއްވި ބައެއް ބޭފުޅުން ޖުމްހޫރީ ޕާޓީއާއި ގުޅިވަޑައިގަންނަވާ ވާހަކައެވެ.

ރައީސް ޔާމީންގެ ވެރިކަން ބަދަލުކުރުމަށް މަސައްކަތްކުރި ކޯލިޝަންގެ ދެވަނަޔަށް އެންމެ ބޮޑު ޕާޓީއާއި ގުޅިވަޑައިގަންނަވަމުން ގެންދަވާ ބައެއް ބޭފުޅުންނަކީ އެޕާޓީގެ ލީޑަރު ޤާސިމް އިބްރާހިމްއާއި، އެމަނިކުފާނުގެ އާއިލާއަށް އަދި އެމަނިކުފާނުގެ ވިޔަފާރިތަކަށާއި އެމަނިކުފާނުގެ ޕާޓީއަށް ފާއިތުވި ދެތިން އަހަރު ޖެހުނު ހާލެއް ޖެއްސުމުގައި އެންމެ އިސްކޮށް މަސައްކަތް ކުރެއްވި ބައެއް ބޭފުޅުންނެވެ.

ބުރާސްފަތި ދުވަހު އިވުނު އަޑުތަކަށް ބަލާއިރުވެސް މެމްބަރު މުބީންއާއި މެމްބަރު ރަޝީދު (ޤާރީ) ޖޭޕީއާއި ގުޅިވަޑައިގެންނެވި ވާހަކަ އަޑު އިވުމުން ހައިރާންވެ އަންތަރީސްވިއެވެ. ބަޔަކު ޕާޓީއަކަށް ވަދެދާނެއެވެ. އެކަން ހުއްޓުވަން ކުރެވޭނެ މާބޮޑު ކަމެއްވެސް ނެތެވެ. އެހެންނަމަވެސް މުބީންއާއި ރަޝީދު ޖޭޕީއާއި ގުޅިވަޑައިގެންނެވި ޖަލްސާގައި އެޕާޓީގެ ލީޑަރޝިޕްގެ ބޭފުޅުން ތިއްބެވުމުން، އެ ދެމެމްބަރުންގެ ސަބަބުން ވެރިކަމަށް މިއަންނަ އިންތިހާދަށް ޖެހުނު ޙާލު ހަނދާން ނެތުނީތޯ ހިތަށް އަރައެވެ.

އަހުމަދު ފާރިސް މައުމޫން އެހުރިހާ ދުވަހު ޖަލުގައި ހުންނަވަން ޖެހުނު ސަބަބު މިއަދު ހަނދާން ކޮށްލަން ޖެހެއެވެ. އަނެއްކާ މާދަމާ ނިކުމެވަޑައިގެން ރަޝީދު ޖޭޕީއަށް ކުރެއްވި ސޮއެ އަނބުރާ ނުގެންދަވާނެ ބާއެވެ. މުބީންއަކީ ރައީސް ޔާމީންގެ ސަރުކާރު ދިފާޢުކުރަން އެންމެ ގަދަޔަށް މަޖިލީހުގަޔާއި ސްޓޭޖްތަކުގައި މަސައްކަތް ކުރެއްވި އެއް ބޭފުޅާއެވެ. އިންތިޚާބުން ބަލިވެ، ސަރުކާރު ބަދަލުވާން ދެ ދުވަހަށް ވުމުން ސަރުކާރު ހިންގާ ޕާޓީއަކަށް އެބޭފުޅުން ސޮއެކުރެއްވީ 'އޮޕޮޒިޝަން ޕާޓީ'އެއްގައި މަސައްކަތް ކުރެއްވުމުގެ ލަޤަބު ބޭނުންފުޅު ނުވާތީތޯއެވެ؟

ނުވަތަ މިބޭބޭފުޅުން ބޭނުންފުޅުވަނީ ކޮންމެ ޙާލެއްގައިނަމަވެސް މަޖިލިސް ޓިކެޓްތޯއެވެ؟ އިސްދޫ ދާއިރާއަށްވެސް އަދި ބިލެތްދޫ ދާއިރާއަށްވެސް ކުރިމަތިލައްވަން ބޭނުންފުޅުވާ ކިތަންމެ ބޭފުޅުންނެއް މިއަދު ޖޭޕީގައިވެސް އަދި އެމްޑީޕީގައިވެސް އެބަތިއްބެވިއެވެ. ކުއްލިއަކަށް މުބީންއާއި ރަޝީދު ވަޑައިގެން ތިމަންމެންނަށް އެދާއިރާތަކުގެ ޓިކެޓް ދޭށޭ ވިދާޅުވެ ޑިމާންޑްކުރެއްވިޔަސް، އެކަން އޮގޮތަށް ވެގެން ނުވާނެއެވެ. އެކަން އެހެން ވެއްޖެނަމަ މި ބަދަލު ގެނައުމުގައި އެންމެ ބޮޑަށް ޤުރުބާންވި މީހުންނަށް އެކުރެވެނީ ބޭއިންސާފެެވެ

މި ދެބޭފުޅުން ނޫނަސް ކިތަންމެ ބަޔަކު ކޮޅު ބަދަލުކުރާތަން އެބަފެނެއެވެ. ރައީސް ޔާމީނަށް ނުވަތަ އެމަނިކުފާނުގެ އަނބިކަނބަލުންނަށް ސަނާކިޔައި، ޓުވީޓްކޮށް ފޭސްބުކް ސްޓޭޓަސް ލިޔެގެން ވަޒީފާ ދީފައިތިބި އެތައް ބަޔަކު މިއަދު ކުއްލިއަކަށް އައު ސަރުކާރަށް ސަނާކިޔައި ޚިޔާލުފާޅުކުރާތަން އެބަ ފެނެއެވެ. އަންނަ ސަރުކާރަކީ ސަނާ ކިޔާ މީހުންނަށް ޚާއްސަ ސަރުކާރެއް ނޫންކަމަށް ރައްޔިތުންނަށް އެބޭފުޅުން ވައުދުވެފައިވާކަން އެފަދަ ސްޓޭޓަސް ލިޔާ އަދި ޓްވީޓްކުރާ ފަރާތްތަކަށް ހަނދާންކޮށްދޭން އެބަޖެހެެއެވެ.

ޖުމްހޫރީ ޕާޓީއަށް ވަނަސް، އެމްޑީޕީއަށް ވަނަސް، އަދާލަތު ޕާޓީ ނުވަތަ ރައީސް މައުމޫން ފެކްޝަނާއި ގުޅުނަސް، ހިންގާފައިވާ ކޮރަޕްޝަން ބެލެން ޖެހޭނެއެވެ. މަޖިލިސް ތެރެއިން ނުވަތަ ޕޯޑިއަމްތަކުގައި ކިތަންމެ ވަރަކަށް ރައީސް އިބްރާހިމް މުހައްމަދު ސޯލިޙަށް ސަނާ ކިޔަސް، ތަހުޤީޤުތަކުގައި ކަމެއް ފަޅާއަރައިފިނަމަ އެމީހަކަށް ލިބެން ޖެހޭ އަދަބު ލިބެން ޖެހޭނެއެވެ. އެފަދަ ކަމެއް ހުއްޓުވަން ރައީސް ނަޝީދުވެސް، ރައީސް މައުމޫންވެސް، ޤާސިމްވެސް ޝައިޚް އިމްރާންވެސް މަސައްކަތް ކުރައްވައިގެން ނުވާނެއެވެ. ޕާޓީ ބަދަލުކުރުމަކީ ކުރިކަންތައްތައް ފޮރުވަން ކުރެވޭ ކަމަކަށް ވެގެން ނުވާނެއެވެ.