ޓްރާންސްޕޯޓް އޮތޯރިޓީ ހިންގާފައިވަނީ ނާޖާއިޒު ބޮޑެތި ކަންތައްތަކަކާއެކު:އާދިލް
15 ނޮވެމްބަރު 2018 | ބުރާސްފަތި 02:25ނުދުއްވާ ލައިސަންސް ދީފައި އެބަހުރި
ޓްރާންސިޝަން ކޮމިޓީތަކުން ބޭއްވި ބައްދަލުވުން
ރައީސް އަބްދުﷲ ޔާމީންގެ ސަރުކާރުން ޓްރާންސްޕޯޓް އޮތޯރިޓީ ހިންގާފައިވަނީ ވަރަށް ބޮޑެތި ނާޖާއިޒް ކަންތައްތަކަކާއެކު ކޮރަޕްޝަނަށް މަގުފަހިވާ ގޮތަށް ކަމަށް ހޮނިހިރު ދުވަހު ހުވާ ކުރައްވާ އިބްރާހިމް މުހައްމަދު ސޯލިހްގެ ސަރުކާރުގެ މަސައްކަތްތައް ފެށުމަށް ތައްޔާރުވަމުންދާ ޓްރާންސިޝަނަލް ކޮމެޓީން ބުނެފި އެވެ.
ޓްރާންސިޝަން ކޮމިޓީން އިއްޔެ ބޭއްވި ނޫސްވެރިންގެ ބައްދަލުވުމުގައި އަހުމަދު އާދިލް ވިދާޅުވީ ޓްރާންސްޕޯޓް އޮތޯރިޓީ ވަނީ ވަރަށް ބޮޑަށް އަޅާނުލައި ދޫކޮށްލާފައި ކަމަށާއި އެއޮތޯރިޓީ ހިންގަން ޖެހެނީ ބޯޑަކުން ކަމަށްވިއަސް ވޭތުވެ ދިޔަ 8 މަސްދުވަހުގެ ތެރޭގައި އެބޯޑުގެ ބައްދަލުވުމެއް ބާއްވާފައި ނުވާ ކަމަށެވެ.
އާދިލް ވިދާޅުވީ ޓްރާންސްޕޯޓް އޮތޯރިޓީގެ ތެރޭގައި ކޮރަޕްޝަނަށް މަގުފަހިވާގޮތަށް ކަންކަން ހިނގާފައިވާ ކަމަށާއި ވޭތުވެ ދިޔަ 7 އަހަރުގެ ތެރޭގައި ޓްރާންސްޕޯޓާ ގުޅުންހުރި އެއްވެސް ޕްރޮޖެކްޓެއް ހިންގާފައި ނުވާކަމަށެވެ.
ވެހިކަލް އެތެރެ ކުރެވެނީ ގަރާޖެއް ރަޖިސްޓްރީ ކޮށްގެން ކަމަށާއި ގަރާޖް ރަޖިސްޓްރީ ކުރުމަށްފަހު ވެހިކަލް އެތެރެކޮށް އެ ގަރާޖް ކެންސަލްކޮށް އެހެން ވިޔަފާރިތައް ހިންގާފައިވާކަން ފާހަގަ ކުރެވޭ ކަމަށާއި ކޮރަޕްޝަން ހިނގާފައިވާކަމަށް ސާބިތުވާވަރުގެ ހެކިތައް ހުރި ނަމަވެސް ސިވިލް ސަރވިސްގެ މުވައްޒަފުން އެ ވަޒީފާއިން ވަކިނުކޮށް ބައިތިއްބާފައިވާ ކަމަށް ވެސް އާދިލް ވިދާޅުވިއެވެ.
އާދިލް ވިދާޅުވީ "އެއްލަކިން ލައިސަންސް" ދޫކުރުން ކުރިއަށް ގެންގޮސްފައި ވަނީ ރަނގަޅަށް ނޫން ކަމަށާއި ދުއްވުމުގެ ޓެސްޓް ނުހަދާ ލައިސަންސް ދޫކޮށްފައިވާކަން ފާހަގަ ކުރެވުނު ކަމަށެވެ.
