ބޮޑެތި ޖޫރިމަނާތައް ކުރެވޭ ގޮތަށް އޮތް އިމާރާތްކުރުމުގެ ބިލް ތަސްދީގު ކުރައްވައިފި

ބޮޑެތި ޖޫރިމަނާތައް ކުރެވޭ ގޮތަށް އެކުލަވާލާފައިވާ އިމާރާތްކުރުގެ ބިލް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ތަސްދީގު ކުރައްވައި ސަރުކާރުގެ ގެޒެޓްގައި ޝާއިއު ކުރައްވައިފި އެވެ.

އެބިލް ރައްޔިތުންގެ މަޖިލީހުން ފާސްކޮށްފައިވަނީ މިމަހުގެ 12 ވަނަ ދުވަހުގެ ރޭ ކުއްލި ގޮތަކަށް ބޭއްވި މަޖިލީހުގެ މިއަހަރުގެ ފުރަތަމަ ދައުރުގެ 14 ޖަލްސާގަ އެވެ. އެބިލް މަޖިލީހުން ފާސްކޮށްފައި ވަނީ 44 މެމްބަރުންގެ އިއްތިފާގުންނެވެ. އިދިކޮޅު މެމްބަރުން މި ވޯޓުގައި ބައިވެރިވެވަޑައިގަންނަވާފައެއް ނުވެއެވެ.

އިމާރާތް ކުރުމުގެ ބިލަކީ ރައްޔިތުން ޖޫރިމަނާ ތަކަކުން ދައުލަތަށް ފައިސާ ވަންނާނެ ގޮތަކަށް ހުށަހަޅަފައިވާ ބިލެއް ކަމަށް ގުޅިފައިވާ އިދިކޮޅު ސިޔާސީ ޕާޓީތަކުން އުފައްދާފައިވާ ޖޮއިންޓް ޕާލަމެންޓްރީ ގްރޫޕްގެ މެމްބަރުން އެބިލަށް ބަހުސް ކުރައްވަމުން ވަނީ ވިދާޅުވެފަ އެވެ. އިދިކޮޅު މެމްބަރުން ވިދާޅުވީ މިއީ ސަރުކާރާއި ގުޅިގެން ރައްޔިތުންގެ މަޖިލީހުގެ ސަރުކާރަށް ނިސްބަތްވާ މެމްބަރުން ހިންގާ ބޮޑެތި މަރާމާތަކަށް އިތުރުކުރާ ކަމެއް ކަމަށެވެ.

އެ ބިލަށް ބަހުސް ކުރެއްވި އިދިކޮޅު މެމްބަރުން ވިދާޅުވީ އިމާރާތް ކުރުމުގެ ބިލަކީ މުހިއްމު ބިލެއް ކަމަށާއި ނަމަވެސް މައްސަލައަކީ އެބިލްގައިވާ ޖޫރިމަނާތަކާއި އިމާރާތްކުރާ ކުދި އަދި މެދުފަންތީގެ ކުންފުނިތަކާއި އާއްމު ރައްޔިތުންނަށް މިބިލުގެ ސަބަބުން ބޮޑެތި ގޮންޖެހުންތަކެއް ދިމާވާނެ ކަމަށެވެ.

އެބިލް ސަރުކާރުގެ ފަރާތުން މަޖިލީހަށް ހުށަހަޅަފައިވަނީ ވެސް މިމަހުގެ 12 ވަނަ ދުވަހު ހެނދުނު ބޭއްވި ޖަލްސާގަ އެވެ. އެ ޖަލްސާގައި އެބިލްގެ ފުރަތަމަކިޔުން އިއްވާ، ހަމަ މިޖަލްސާގައި އެބިލަށް ބަހުސް ކުރުމަށް ފެނިވަޑައިގަންނަވާތޯ ވޯޓަށް އެހުމުން އެ ބިލަށް ބަހުސް ކުރުމަށް ފެންނަ ކަމަށް ވަނީ ފާސްކޮށްފަ އެވެ. އެގޮތަށް ފާސްވުމާއި ގުޅިގެން އެބިލަށް ބަހުސް ކުރުމަށް މެމްބަރުންނަށް ވަނީ ފުރުސަތު ހުޅުވާލާފަ އެވެ.

އެބިލަށް ބަހުސް ކުރުން ނިންމާލުމަށްފަހު، ހަމަ މިޖަލްސާގައި ވަނީ އެބިލް މަޖިލީހަށް ބަލައިގަންނަށް ފެންނަ ކަމަށް ފާސްކޮށް، މަޖިލީހުގެ ގައުމީ ތަރައްގީގެ ކޮމެޓީއަށް ދިރާސާ ކުރުމަށް ފޮނުވާފަ އެވެ.

އެބިލް ދިރާސާ ކުރުމަށް ކޮމެޓީއަށް ފޮނުވުމުން ހަމަ އެދުވަހުގެ ހަވީރު ވަނީ ގައުމީ ތަރައްގީގެ ކޮމެޓީގެ ބައްދަލުވުމެއް ބާއްވާ މާގިނަ އިރުތަކެއްނުވެ، އެބިލަށް މާބޮޑެތި ބަދަލުތަކެއް ގެނައުމަކާނުލާ ކޮމެޓީން ވަނީ އެބިލް ފާސްކޮށްފަ އެވެ.

އިމާރާތްކުރުމުގެ ބިލްގައި 99 މާއްދާ ވެއެވެ. އަދި 65 ސޮފްހާގެ މައްޗަށް އެކުލެވޭ އެބިލް މަޖިލީހުގެ ކޮމެޓީން ދިރާސާ ކުރުމަށް ނަގާފައިވަނީ އެންމެ ދިހަ ވަރަކަށް މިނެޓް ކަމަށް އިދިކޮޅު މެމްބަރުން ވިދާޅުވެފައިވެއެވެ.

އެބިލް މަޖިލީހުން ދިރާސާކޮށް ނިންމާ މަޖިލީހުގެ ތަޅުމަށް ފޮނުވުމުގެ ކުރިން ބުދަ ދުވަހުގެ ޖަލްސާ ނިންމާލައްވަމުން ޖަލްސާގެ ރިޔަސަތުގައި އިންނެވި މަޖިލީހުގެ ރައީސް އަބްދުﷲ މަސީހު މުހައްމަދު ވަނީ ބުދަ ދުވަހުގެ ރޭ މަޖިލީހުގެ ޖަލްސާއެއް ބޭއްވޭނެކަން އިއުލާން ކުރައްވާފަ އެވެ.

މިމަހުގެ 12 ވަނަ ދުވަހުގެ ރޭ ބޭއްވި ޖަލްސާގެ އެޖެންޑަގައި ހަމައެކަނި ހިމަނާފައިވަނީ ވެސް ގައުމީ ތަރައްގީގެ ކޮމެޓީން އިމާރާތް ކުރުމުގެ ބިލް ދިރާސާކޮށް ނިންމި ގޮތުގެ ރިޕޯޓެވެ.

ސަރުކާރުގެ ފަރާތުން ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ހުށަހެޅުއްވި އިމާރާތް ކުރުމުގެ ބިލްގައި ބުނެފައިވާ ގޮތުން އިމާރާތްކުރުމުގެ އެއްވެސް ހުއްދައެއް ނެތި އެއްވެސް އިމާރާތެއް ނުކުރެވޭނެއެވެ. އެފަދަ ކަމެއް ކޮށްފިނަމަ، ކަމުގެ ކުޑަ ބޮޑުމިނަށް ބަލައި އެފަރާތެއް 50،000 ރުފިޔާޢައި 1،000،000 މިލިއަން ރުފިޔާއާ ދެމެދު އަދަދަކުން ޖޫރިމަނާކުރެވޭނެކަމަށް ގާނޫނުގައިވެއެވެ.

މީގެއިތުރުންވެސް މިގާނޫނާއި މިގާނޫނުގެ ދަށުން ހަދާ ގަވާއިދާ ހިލާފުވާ ފަރާތްތައް، ކަމުގެ ކުޑަބޮޑު މިނަށްބަލައި 5،000ރ އާއި 1،000،000ރ އާދެމެދުގެ އަދަދުތަކުން ޖޫރިމަނާ ކުރެވޭގޮތަށް އެ ގާނޫނުގައި ވެއެވެ.