ސްރީލަންކާގެ ބޮޑުވަޒީރުކަމުގެ މަގާމުން ރަނިލް ވިކްރަމަސިންހަ ވަކިކޮށް އޮކްޓޯބަރ މަހުގެ 26 ވަނަ ދުވަހުގެ ރޭ ކުއްލި ގޮތަކަށް އެ މަގާމަށް އައްޔަން ކުރެއްވި ކުރީގެ ރައީސް މަހިންދަ ރާޖަޕަކްސަގެ މައްޗަށް އިތުބާރުނެތް ކަމަށް އެ ގައުމުގެ ގާނޫނު ހަދާ މަޖިލީހުން ފާސްކޮށްފިއެވެ.

ރާޖަ ޕަކްސަ ބޮޑުވަޒީރުކަމުން ވަކިކުރެވިފައި މި ވަނީ ސްރީލަންކާގެ ޤާނޫނު ހަދާ މަޖިލީސް އުވާ ނުލެވެލޭނެ ކަމަށް ކަނޑައަޅައި އަވަސް އިންތިޚާބު ބޭއްވުމުގެ ތައްޔާރީތައް ހުއްޓާލުމަށް އެ ގައުމުގެ ސުޕްރީމް ކޯޓުން އަންގާރަ ދުވަހު އަމުރުކުރުމާ އެކުއެވެ.

ރާޖަޕަކްސަ ބޮޑުވަޒީރުކަމުގެ ހުވާ ކުރެއްވުމާ ގުޅިގެން، އޭރު ބޮޑުވަޒީރު ކަމުގައި ހުންނެވި ރަނިލް ގެންދެވީ އެކަން ޤަބޫލު ނުކުރައްވާނެ ކަމަށް ތަކުރާރުކޮށް ވިދާޅުވަމުންނެވެ. ލަންކާގެ ޤާނޫނުހަދާ މަޖިލީހުގެ ރައީސް ކަރޫ ޖަޔަސޫރިއާ ވެސް ވަނީ ބޮޑުވަޒީރަކީ ރަނިލް ކަމަށާއި މަޖިލީހުގެ އަޣުލަބިއްޔަތު އޮތީ ރަނިލްގެ ކޯލިޝަނަށް ކަމަށް ވިދާޅުވަމުންނެވެ.

މައިތިރިޕާލާ ސިރިސޭނާ ސްރީލަންކާގެ ގާނޫނު އަސާސީއާ ހިލާފަށް، އެ ގައުމުގެ ގާނޫނު ހަދާ މަޖިލީސް އުވާލައްވާފައި ވަނީ ނޮވެމްބަރު މަހުގެ 9 ވަނަ ދުވަހުގެ ރޭ 12އިން ފެށިގެންނެވެ.

ބުދަ ދުވަހު ބޭއްވި މަޖިލީހުގެ ޖަލްސާގައި މަޖިލީހުގެ 225 މެމްބަރުންގެ ތެރެއިން އަޣުލަބިއްޔަތު މެމްބަރުން ރާޖަޕަކްސައާ ދެކޮޅަށް ވޯޓް ދެއްވާފައިވާ ކަމަށް މަޖިލީހުގެ ރައީސްވަނީ ވިދާޅުވެފައެވެ.

އިތުބާރުނެތްކަމުގެ ވޯޓްނެގިވަގުތު ކުރީގެ ރައީސް އަދި ޤާނޫނުހަދާ މަޖިލީހުގެ މެމްބަރު ރާޖަޕަކްސައާއި އެމަނިކުފާނުގެ ދަރިކަލުން ނަމަލް ރާޖަޕަކްސަވަނީ ޗެމްބަރުން ނުކުމެވަޑައިގެންފައެވެ.

މީގެ އިތުރުން ރާޖަޕްކަސައަށް ވަފާތެރި މެމްބަރުންވަނީ ހަމެނުޖެހުން އުފައްދައި ވޯޓަށް ހުރަސް އެޅުމަށް މަސައްކަތްކުރައްވާފައެވެ.

މަޖިލީހުގެ ވޯޓުން މި ނަތީޖާ ނުކުތްނަމަވެސް އޭގެ މާނައަކީ އަޣުލަބިއްޔަތު އޮތީ ރަނިލްގެ ޔުނައިޓެޑް ނޭޝަނަލް ޕާޓީއަށްކަމަކަށް ނޫނެވެ.

އައު ބޮޑުވަޒީރަކު އައްޔަން ކުރެއްވުމުގެ ބާރު ރައީސް މައިތިރިޕާލާ ސިރިސެނާއަށް ލިބިވަޑައިގަންނަވާނެއެވެ.