ލަންކާގެ ޤާނޫނު ހަދާ މަޖިލިސް އުވާ ނުލެވޭނެކަމަށް ކޯޓުން އަމުރު ނެރެފި

ސްރީލަންކާގެ ޤާނޫނު ހަދާ މަޖިލީސް އުވާ ނުކެވެލޭނެކަމަށް ކަނޑައަޅައި އަވަސް އިންތިޚާބު ބޭއްވުމުގެ ތައްޔާރީތައް ހުއްޓާލުމަށް އެ ގައުމުގެ ސުޕްރީމް ކޯޓުން އަންގާރަ ދުވަހު އަމުރުކޮށްފިއެވެ.

ޤާނޫނު ހަދާ މަޖިލިސް އުވާލުމަށް އެ ޤައުމުގެ ރައީސް މައިތިރިޕާލާ ސިރިސޭނާ ނިންމެވި ނިންމެވުމާއި ދެކޮޅަށް އެ ޤައުމުގެ ސުޕްރީމް ކޯޓަށް މައްސަލަ ހުށަހަޅުއްްވާފައި ވަނީ ހޯމަ ދުވަހުއެވެ.

ލަންކާގެ ގާނޫނު ހަދާ މަޖިލީހުގައި 225 މެމްބަރުން ތިއްބަވާއިރު މިހާރު މައްސަލަ ހުށަހެޅުއްވި ހުރިހާ ޕާޓީތަކެއް އެކުވުމުން މަޖްލީހުގެ ސާފު އަޣުލަބިއްޔަތު އެ ފަރާތްތަކަށް ލިބެއެވެ.

ލަންކާގެ ބޮޑުވަޒީރު ކަމުގައި ހުންނެވި ރަނިލް ވިކްރަމަސިންހަ އާއި ޚިޔާލު ތަފާތުވެ، އެމަނިކުފާނު މަޤާމުން ދުރުކޮށް ގާނޫނުހަދާ މަޖިލީސް އުވާލަން ރައީސް ސިރިސޭނާ ނިންމެވި ނިންމެވުމާއި ދެކޮޅަށް ސުޕްރީމް ކޯޓަށް ދިއުމަށް ނިންމާފައި ވަނީ ރަނިލްގެ ފަރާތުންނެވެ.

މިދިޔަ ހުކުރު ދުވަހު ރައީސް ސިރިސެނާ ވަނީ ގާނޫނު ހަދާ މަޖިލީސް އުވާލައްވައި ޖެނުއަރީ މަހުގެ ފަސްވަނަ ދުވަހު އަަވަސް އިންތިޚާބެއް ބާއްވަން ގޮވާލައްވަފާއެވެ.

ސްރީލަންކާގެ ސިޔާސީ މަސްރަހު ގޯސްވެގެން ގޮސްފައި މި ވަނީ ރައީސް ސިރިސޭނާ އާއި ބޮޑުވަޒީރު ރަނިލް އާއި ދެމެދު ސިޔާސީ ތަފާތުތައް އުފެދި، އެ މައްސަލަތައް ޒާތީ މައްސަލަތަކަކަށް ވެފައިވަނިކޮށް، ސިރިސޭނާގެ ޕާޓީ އިން ރަނިލްގެ ޕާޓީ އާއި އެކު އޮތް ކޯލިޝަން އުވާލައި ބޮޑުވަޒީރުކަމުން ރަނިލް ވަކިކޮށް ކުރީގެ ރައީސް މަހިންދަ ރާޖަޕަކްސަ އަށް ބޮޑުވަޒީރުގެ މަޤާމު ހަވާލުކުރެއްވުމުންނެވެ.

ނިމިގެން ދިޔަ އޮކްޓޯބަރ މަހުގެ 26 ވަނަ ދުވަހުގެ ރޭ ކުއްލި ގޮތަކަށް ރާޖަޕަކްސަ ބޮޑުވަޒީރުކަމުގެ ހުވާ ކުރެއްވުމާއި ގުޅިގެން، އޭރު ބޮޑުވަޒީރު ކަމުގައި ހުންނެވި ރަނިލް ވަނީ އެކަން ޤަބޫލު ނުކުރައްވާނެ ކަމަށާއި، ރާޖަޕަކްސަ ބޮޑުވަޒީރުކަމުގެ ހުވާ ކުރެއްވި ނަމަވެސް ބޮޑުވަޒީރަކީ ރަނިލް ކަމަށާއި، ޤާނޫނު ހަދާ މަޖިލީހުގެ އަޣުލަބިއްޔަތު އޮތީ އެމަނިކުފާނަށް ކަމަށް ވިދާޅުވެފައެވެ.