ކާނަލް ނާޒިމް އިންތިޚާބީ ރައީސް ސޯލިހްއާ ބައްދަލުކުރައްވައިފި

ކުރީގެ ޑިފެންސް މިނިސްޓަރ ކާނަލް މުހައްމަދު ނާޒިމް އިންތިޚާބީ ރައީސް އިބްރާހިމް މުހައްމަދު ސޯލިހާއި ބައްދަލުކުރައްވައިފިއެވެ.

ކާނަލް ނާޒިމް ބޭސް ފަރުވާ އަށް ރާއްޖޭން ބޭރުގައި ހުންނެވުމަށް ފަހު މާލެ ވަޑައިގެންފައި ވަނީ އާދީއްތަ ދުވަހުއެވެ. ނާޒިމް ރާއްޖެ ވަޑައިގެންފައި މި ވަނީ އެމަނިކުފާނުގެ މައްޗަށް އިއްވި 11 އަހަރުގެ ޖަލު ހުކުމް ތަންފީޒުކުރުން ސުޕްރީމް ކޯޓުން ފަސްކޮށްފައި ވަނިކޮށެވެ.

ކާނަލް ނާޒިމްއަށް އިއްވާފައިވާ 11 އަހަރުގެ ޖަލު ހުކުމް ފަސްކުރުމާ ގުޅޭ ގޮތުން ސުޕްރީމް ކޯޓުން ނެރުނު އަމުރުގައި ވަނީ ހުކުމް ތަންފީޒުކުރުމުގެ ގޮތުން ނާޒިމާ މެދު އެއްވެސް ފަރާތަކުން އެއްވެސް ފިޔަވަޅެއް ނޭޅުމަށް ދައުލަތުގެ ކަމާބެހޭ އެންމެހައި ފަރާތްތަކުގެ މައްޗަށް އަންގައި އަމުރުކުރާ ކަމަށެވެ.

ކާނަލް ނާޒިމްގެ ކޮޓަރިކޮޅުން ފިސްތޯލަ އެއް ފެނުނު މައްސަލާގައި ހަނގުރާމަވެރި ހަތިޔާރު ގެންގުޅުނު ކަމުގެ ކުށް ސާބިތުކޮށް 11 އަހަރަށް ޖަލަށްލުމަށް ނާޒިމްގެ މައްޗަށް ކުރިމިނަލް ކޯޓުން ހުކުމް ކުރީ 2015 ވަނަ އަހަރުއެވެ.

އާދީއްތަ ދުވަހު މާލެ ވަޑައިގެން މީޑިޔާތަކާ ވާހަކަ ދައްކަވަމުން ކާނަލް ނާޒިމް ވިދާޅުވެފައި ވަނީ އޭނާ ފްރޭމް ކުރުމުގެ ނުބައި ޖަރީމާ ހިންގީ ރައީސް ޢަބްދުﷲ ޔާމީން ޢަބްދުލް ޤައްޔޫމާއި ކުރީގެ ޕޮލިސް ކޮމިޝަނަރ ހުސައިން ވަހީދު ކަމަށާއި އެ ދެ ބޭފުޅުން އިންސާފްގެ ކުރިމައްޗަށް ގެންނާނެ ކަމަށެވެ.

އާދީއްތަ ދުވަހު މާލެ ވަޑައިގެން ވެލާނާ އިންޓަރނޭޝަނަލް އެއަރޕޯޓްގައި ހުންނަވައި ކާނަލް ނާޒިމް ވަނީ ޖުމްހޫރީ ޕާޓީއާ ހޯމަދުވަހު ގުޅިވަޑައި ގަންނަވާނެކަން އިއުލާން ކުރައްވާފައެވެ.