ހުޅުމާލޭގައި ހަދާފައިވާ ރާއްޖޭގެ ފުރަތަމަ ޓާޝިއަރީ ހޮސްޕިޓަލް ކަމަށްވާ ޓްރީ ޓޮޕް ހޮސްޕިޓަލް ހިންގަމުން އައި ރަމްސޭ ސައިމް ޑާބީ ހެލްތް ކެއަރއާ އެކު ހަދާފައިވާ އެއްބަސްވުން އުވާލި ނަމަވެސް ކުރިން ވެސް ދެމުން އައި ޚިދުމަތްތައް އެ ގޮތުގައި ދެމުން ގެންދާނެ ކަމަށް އެ ހޮސްޕިޓަލުން ބުނެފިއެވެ. 

އެއްބަސްވުން އުވާލުމާ ގުޅިގެން ޓްރީޓޮޕް ހޮސްޕިޓަލުން ނެރެފައިވާ ބަޔާނެއްގައި ބުނެފައި ވަނީ ދެ ފަރާތުގެ އެއްބަސްވުމުގެ މަތީން 1 ނޮވެންބަރު 2018 އިން ފެށިގެން އެއްބަސްވުން ނިމުމަކަށް ގެނެސްފައިވާ ކަމަށެވެ. ނަމަވެސް އެއްބަސްވުން އުވާލި ސަބަބެއް އެ ހޮސްޕިޓަލުން ހާމަކޮށްފައެއް ނުވެއެވެ. 

މިހާރު ޓްރީޓޮޕް ހޮސްޕިޓަލް ހިންގަމުން ގެންދާނީ ޓްރީ ޓޮޕް ހޮސްޕިޓަލުގެ މެނޭޖްމަންޓުން ކަމަށާއި ކުރިމަގުގައި ވެސް އެ ހޮސްޕިޓަލުގެ ޚިދުމަތްތައް އެންމެ ފުރިހަމަ ގޮތުގައި ދެމުން ގެންދާނެ ކަމަށް އެ ބަޔާނުގައި ވަނީ ބުނެފައެވެ. ކުރިއެކޭ ވެސް އެއްގޮތަށް ފެންވަރު ރަނގަޅު ޚިދުމަތްތަކެއް، އަގަށް ހެޔޮބަދަލާ އެކީގައި އާސަންދަ ލިބޭ ގޮތުގެ މަތިން ކުރިއަށް ދާނެ ކަމުގެ ޔަޤީން ކަން ޓްރީ ޓޮޕް ހޮސްޕިޓަލުގެ މެނޭޖްމަންޓުން ދޭކަމަށް ވެސް އެ ހޮސްޕިޓަލުން ވަނީ ބުނެފައެވެ.

ޓްރީޓޮޕް ހޮސްޕިޓަލަކީ ފަހުގެ ޓެކްނޮލޮޖީއާ އެކު "ފުލީ އޮޓޯމެޓިކް" ހޮސްޕިޓަލަކަށްވާއިރު އެ ހޮސްޕިޓަލްގައި ބަލި މީހުން އެޑްމިޓްކުރުމަށް ތަފާތު ފަސް ކެޓަގަރީގެ ކޮޓަރި ހުރެއެވެ. އެގޮތުން ދެ މީހަކަށް އެއް ފަހަރާ ޚިދުމަތްދެވޭ 30 ކޮޓަރި އާއި އެކަކަށް ޚިދުމަތް ދެވޭ ގޮތަށް ހަދާފައިވާ 57 ކޮޓަރި އާއި ހަތަރު ޖޫނިއަރ ސުއިޓާއި، ހަ ސުޕީރިއާ ސުއިޓް އަދި ދެ ޕްރެޒިޑެންޝަލް ސުއިޓް ހިމެނެއެވެ. މި އަހަރުގެ މާޗް 1 އިން ފެށިގެން ޚިދުމަތް ދެމުން އަންނަ ޓްރީ ޓޮޕް ހޮސްޕިޓަލް ހިންގަމުން އައީ އޮސްޓްރޭލިއާގެ ރަމްސޭ ގްރޫޕާއި މެލޭޝިއާގެ ސައިމް ޑާބީއާ ގުޅިގެންނެވެ. ޓްރީ ޓޮޕް އިންވެސްޓްމަންޓުން ތަރައްގީކުރީ 110 މިލިއަން ޑޮލަރު (1.7 ބިލިއަން ރުފިޔާ) ހޭދަކޮށްގެންނެވެ.