ޢަބްދުﷲ ސައީދާއި ޢަލީ ހަމީދު ޖަލަށްލީ އިންސާފަކުން ނޫން، މިނިވަންކުރަން ޖެހޭ: ނަޝީދު
އެ ދެ ބޭފުޅުން އާއިލާތަކާ އެކު އުޅެވޭނެ ގޮތް ހަދައިދޭން ޖެހޭ
ރައީސް ނަޝީދު ހުޅުދޫގައި ވާހަކަ ދައްކަވަނީ
ކުރީގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދު ޖަލަށްލާފައި ވަނީ އިންސާފުން ކަމަށް ޤަބޫލްނުކުރައްވާ ކަމަށާއި ކޯޓުން އަމުރެއް ނެރެގެން ވެސް އެ ދެ ބޭފުޅުން މިނިވަން ކުރުމަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.
އެމަނިކުފާނު މިހެން ވިދާޅުވީ އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގައި ބުދަ ދުވަހު އައްޑޫ ސިޓީ ހުޅުދޫއަށް ވަޑައިގެން އެރަށު ރައްޔިތުންނާ ވާހަކަ ދައްކަވަމުންނެވެ.
ހުޅުދޫ އެމްޑީޕީ ހަރުގެ ކުރިމަތީގައި ވާހަކަ ދައްކަވަމުން ރައީސް ނަޝީދު ވިދާޅުވީ އަބްދުﷲ ސައީދާއި އަލީ ހަމީދު ޖަލަށް ލީ އިންސާފުން ނޫން ކަމަށާއި އެއްވެސް ބަޔަކަށް ބޭއިންސާފުން އަނިޔާ ލިބެން ބޭނުން ނުވާ ކަމަށެވެ. އަދި އެ ދެ ބޭފުޅުން ދޫކޮށްލުމަށް ރައީސް ނަޝީދު ވަނީ ގޮވާލައްވައިފައެވެ.
ރައީސް ނަޝީދު ވިދާޅުވީ ކުރީގެ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ޖަލުގައި އޮންނެވީ ނުހައްގުން ހިންގުނު ޝަރީއަތަކާއި ބޭއިންސާފުން ކުރެވުނު ތުހުމަތެއްގައި ކަމަށެވެ. އަދި އެބޭފުޅުންގެ ދޫކޮށްލާ އާއިލާތަކާ އެކު އުޅެވޭނެ ގޮތް މި ސަރުކާރުން ހަދައިދޭން ޖެހޭ ކަމަށް އެމަނިކުފާނު ވިދާޅުވިއެވެ.
އައްޑޫ ސިޓީ އަށް ކުރައްވަމުން ގެންދަވާ މި ދަތުރުފުޅުގައި ރައީސް ނަޝީދު ހުޅުދޫއަށް ވަޑައިގެންނެވުމުން އެރަށުން ވަނީ ވަރަށް ހޫނު މަރުހަބާއެއް ދަންނަވާފައެވެ. ވެހެމުންދިޔަ ވާރޭގެ ތެރޭގައި ވެސް ގިނަ އަދަދެއްގެ ބަޔަކު ހުޅުދޫ ބަނދަރު ސަރަހައްދަށް އެއްވެ އެމަނިކުފާނާ ސަލާމްކޮށް ފޮޓޯ ނަގާ ވަގުތު ހޭދަކޮށްފައި ވެއެވެ.
މީގެ އިތުރުން ރައީސް ނަޝީދު ވަނީ ހުޅުދޫ އެމްޑީޕީ ހަރުގޭގައި ބަހައަޓާފައިވާ ކުރީގެ ދިވެހިންގެ ބައެއް މަސައްކަތްތަކާއި އާސާރީ ބައެއް ތަކެތި ބައްލަވާ ލައްވާފައެވެ.
