ޢަބްދުﷲ ރިޔާޒް މިރޭ ޕޮލިހަށް ހާޒިރުވަން އަންގައިފި
ސަރުކާރުގެ ބޭނުމަކީ ހަތަރު ލީޑަރުން ގުޅިގެން ފަށާފައިވާ އިސްލާހީ މަސައްކަތައް ވަގުތު ނުދިނުން. އެހެންނަމަވެސް އެކަން ކާމިޔާބު ނުކުރެވޭނެ
ޢަބްދުﷲ ރިޔާޒް: މިދިޔަ މަހުގެ 28 ވަނަ ދުވަހު ވެސް ފުލުސް އޮފީހަށް ވަނީ ހާޒިރުކޮށްފައި
ކުރީގެ ޕޮލިސް ކޮމިޝަނަރ އަދި ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު ޢަބްދުﷲ ރިޔާޒް އަނެއްކާ ވެސް އާދީއްތަ ދުވަހުގެ ރޭ (މިރޭ) ފުލުސް އޮފީހަށް ހާޒިރު ވުމަށް ޗިޓް ފޮނުވައިފިއެވެ.
ރާއްޖެ އެމްވީއަށް މައުލޫމާތު ދެއްވަމުން ޖުމްހޫރީ ޕާޓީގެ ނައިބު ލީޑަރކަންވެސް ކުރައްވާ ޢަބްދުﷲ ރިޔާޒް ވިދާޅުވީ އާދީއްތަ ދުވަހުގެރޭ (މިރޭ) 8:00 އަށް ފުލުސް އޮފީހަށް ހާޒިރު ވުމަށް އަންގާ ޗިޓް ހަވާލުކޮށްފައިވާ ކަމަށެވެ.
ރިޔާޒް ވިދާޅުވީ ޗިޓް ފޮނުވާފައި ވަނީ އާދީއްތަ ދުވަހުގެ މެންދުރުފަހުގެ ވަގުތެއްގައި ކަމަށާއި ފުލުސް އޮފީހަށް ހާޒިރު ކުރަނީ ކުރިންވެސް ހާޒިރު ކޮށްފައިވާ މައްސަލައިގައި ކަމަށެވެ.
މާރޗް މަހުގެ 28 ގައި ޕޮލިހަށް ހާޒިރުކޮށް އޭނާގެ މައްޗަށް ދެ ތުހްމަތެއް ކޮށްފައިވެ އެވެ. ރިޔާޒް ވިދާޅުވި ގޮތުގައި އޭނާގެ މައްޗަށް ކޮށްފައިވާ ފުރަތަމަ ތުހުމަތަކީ، ނޫސްވެރިންގެ ބައްދަލުވުމެއްގައި ދެއްކެވި ސިޔާސީ ވާހަކައަކާ ގުޅިގެން ކަމަށެވެ. އެ ވާހަކައަކީ ގުޅިފައިވާ ސިޔާސީ ޕާޓީތަކުން ބޭއްވި ނޫސްވެރިންގެ ބައްދަލުވުމުގައި މި ޤައުމު މާފިއާ ގޭންގަކާއި ހަވާލުކުރަން ބޭނުން ނުވާކަމަށް ވިދާޅުވެފައިވާތީ އެކަމާ ގުޅޭ ގޮތުން ކަމަށް ރިޔާޒު ވިދާޅުވި އެވެ.
