ރައީސް ޔާމީންގެ އިތުބާރު ނެތްކަމުގެ ވޯޓު ނަގަން ޖެހުނަސް ނަގާނަން: ޢަބްދުﷲ ރިޔާޒް
ބަންޑާރަ ނައިބާއި ޕްރޮސިކިއުޓަރ ޖެނެރަލްގެ އިތުބާރުގެ މައްސަލަ މަޖިލީހަށް ލާނެކަން ހާމަކުރި
ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު ޢަބްދުﷲ ރިޔާޒް
ޤައުމު އިސްލާހު ކުރުމަށްޓަކާ ކުރަންޖެހުނު ކޮންމެ ކަމެއް ކުރާނެ ކަމަށާއި އެގޮތުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އިތުބާރު ނެތްކަމުގެ ވޯޓު ނަގަންޖެހިއްޖެ ނަމަ، ފަސްޖެހުމެއް ނެތި އެކަންވެސް ކުރައްވާނެ ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު ޢަބްދުﷲ ރިޔާޒް ވިދާޅުވެއްޖެއެވެ.
އިދިކޮޅު ކޯލިޝަނުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، ޖުމްހޫރީ ޕާޓީގެ ޑެޕިއުޓީ ލީޑަރުގެ މަޤާމުވެސް ފުރުއްވާ ރިޔާޒް ވިދާޅުވީ، ޤައުމު ހަމަ މަގަށް އެޅުވުމަށް، ވަކި މީހަކަށް ބެލުމެއް ނެތް ކަމަށާ، ރައީސުލް ޖުމްހުރިއްޔާ މަޤާމުން ދުރުކުރަން ޖެހުނަސް، އެކަމާވެސް އެއްވެސް ޖެހިލުމެއް ނެތް ކަމަށެވެ.
"ޤައުމު ހަމަމަގަށް އެޅެން އަންނަނީ އެކިއެކި ކޮމިޝަން ތަކުގައި ތިބި ބޭފުޅުން ބަދަލުކޮށްގެން ކަމުގައި ވާނަމަ، އެކަންކަން ކުރަން އަޅުގަނޑު ހަމަ ގައިމުވެސް މިހިރީ ތައްޔާރަށް، އެކަމަށް ވަކާލާތު ވެސް ކުރާނަން. ވަކި މީހަކަށް ބެލުމެއް ނެތް. އެއީ އަދި ރައީސުލްޖުމްހުރިއްޔާގެ އިމްޕީޗްމަންޓަކާ ހަމައަށް ދާންޖެހުނަސް، އަޅުގަނޑުގެ ނެތް ހަމަ އެއްވެސް ޖެހިލުމެއް. ހަމަ އެއަށް ބަހުސް ކުރަންވީ، ބަހުސް ކޮށްގެން، ރައީސުލް ޖުމްހޫރިއްޔާވެސް މަޤާމުން ދުރުކުރަން ޖެހޭ ކަމުގަ ވަންޏާ އެކަން ކުރަންވީ. ނުކުރަންވީ ސަބަބެއް ނެތް،" ރިޔާޒު ވިދާޅުވި އެވެ.
އޭނާ ވިދާޅުވީ، ރައީސްކަމުގެ މަގާމަކީ ރައްޔިތުން ހަވާލުކުރާ މަސްއޫލިއްޔަތެއް ކަމަށާއި، އެ މަސްއޫލިއްޔަތު އަދާ ނުކުރެވޭ ނަމަ، ރައްޔިތުން އެކަން ކުރާނެ ކަމަށެވެ.
"އަޅުގަނޑުމެން ޤަބޫލުކުރަންވީ ރައީސުލްޖުމްޙޫރިއްޔާއަކީ ރަސްކަލެއް ނޫނޭ އެނގޭތޯ. އެއީ ވަޒީފާއެކޭ ހަވާލުކޮށްފަ އޮތް. އެއީ ވަޒީފާއެއް. ރައްޔިތުން ހަވާލުކޮށްފަ އޮތް މަސްއޫލިއްޔަތެއް އެމަނިކުފާނު އެ އަދާ ކުރައްވަނީ. އެ މަސްއޫލިއްޔަތާ ޚިލާފަށް ކަން ކުރައްވަ ކަމަށްވާންޏާ، އެވާހަކަ ދައްކާނެ.
އިދިކޮޅު ފަރާތްތަކުން ރައްޔިތުންގެ މަޖިލީހުގެ ރައީސް، ޢަބްދުﷲ މަސީޙު މުޙައްމަދާއި، އެ މަޖިލީހުގެ ނައިބު ރައީސް، މުސާ މަނިކުގެ އިތުބާރު ނެތްކަމަށް މަޖިލީހުން ފާސްކުރަން މަސައްކަތް ކުރަމުން ދާއިރު، އެ މަސައްކަތް ކާމިޔާބު ވެއްޖެ ނަމަ، ބައެއް ވަޒީރުންނާއި، މިނިވަން މުއައްސަސާތަކުގެ މެންބަރުންގެ އިތުބާރުގެ މައްސަލަތައްވެސް މަޖިލީހަށް ހުށަހަޅާނެ ކަމަށް އެ ފަރާތްތަކުން ވަނީ ބުނެފައެވެ. އެގޮތުން، ބަންޑާރަ ނައިބާއި، ޕްރޮސެކިއުޓަރ ޖެނެރަލްގެ އިތުބާރުގެ މައްސަލަ މަޖިލީހަށް ލާނެ ކަމަށް އިދިކޮޅު ފަރާތްތަކުން ވަނި ބުރާސްފަތި ދުވަހުގެ ނޫސްވެރިންގެ ބައްދަލުވުމުގައި ހާމަކޮށްފައެވެ.
