އެމެރިކާ ސަފީރު ޓެޕްލިޒް ސަފީރުކަމާއި ހަވާލުވެވަޑައިގެންފި

އެމެރިކާއިން ރާއްޖެއާއި ސްރީލަންކާއަށް ކަނޑައެޅި އައު ސަފީރު އެލައިނާ ބީ. ޓެޕްލިޒް މަޤާމުގެ ފަތްކޮޅު ލަންކާގެ ރައީސް މައިތިރިޕާލާ ސިރިސޭނާ އަށް އަރުވައިފިއެވެ.

ސަފީރު ޓެޕްލިޒް އެކަމަނާގެ ސަފީރުކަމުގެ ފަތްކޮޅު ރައީސް ސިރިސޭނާއަށް އެރުވުމުގެ ރަސްމިއްޔާތު އޮތީ ބުރާސްފަތި ދުވަހު ހެނދުނު ލަންކާގެ ރައީސްގެ ރަސްމީ އޮފީހުގައެވެ. އަދި އެކަމަނާ ވަނީ ނިމުނު ހަފްތާގައި ކޮޅުނބަށް ވަޑައިގެން މަޤާމުގެ މަސްއޫލިއްޔަތުތަކާއި ރަސްމީކޮށް ހަވާލުވެވަޑައިގެންފައެވެ.

Advertisement

ޓެޕްލިޒް ރާއްޖެއަށާއި ލަންކާއަށް ކަނޑައަޅާފައިވާ ސަފީރުކަމާއި ހަވާލުވެވަޑައިގެންނެވުމުގެ ކުރިން އެކަމަނާ ހުންނެވީ ނޭޕާލަށް ކަނޑައަޅާފައި ހުންނަ އެމެރިކާގެ ސަފީރުގެ މަޤާމުގައެވެ. ސަފީރު ޓެޕްލިޒް ކޮޅުނބުގައި ހުންނަވާ ސަފީރުކަމަށް ވަޑައިގަތީ ކުރިން އެމަޤާމުގައި ހުންނެވި ސަފީރު އަތުލް ކެޝަޕްގެ މަޤާމުގެ ދައުރު ހަމަވުމުންނެވެ.

ރާއްޖެއަށް ކަނޑައަޅުއްވާ އެމެރިކާގެ ސަފީރުކަމާއި ޓެޕްލިޒް ހަވާލުވެވަޑައިގަތުމުން ކުރީގެ ޚާރިޖީ ވަޒީރުންކަމަށްވާ އަބްދުﷲ ޝާހިދާއި އަހުމަދު ނަސީމް ވަނީ އެކަމަނާއަށް މަރުޙަބާ ދަންނަވާފައެވެ.