މަސީޙުގެ ވޯޓަކީ މިނިވަން އިންސާފުވެރި ވޯޓެއް ނޫން: އެމެރިކާ

ރައްޔިތުންގެ މަޖިލީހުގެ ރައީސް، ޢަބްދުﷲ މަސީޙުގެ މައްޗަށް އިތުބާރު އޮތްތޯ ބެލުމަށް ހޯމަ ދުވަހު މަޖިލީހުގައި ނެގި ވޯޓަކީ، ޤަވާއިދާއި، އުސޫލުތަކާއި ޚިލާފަށް ކަންކަން ހިނގާފައިވާ ވޯޓެއް ކަމަށާ، އެއީ މިނިވަން އިންސާފުވެރި ވޯޓެއްކަމަށް ނުދެކޭ ކަމަށް އެމެރިކާއިން ބުނެފިއެވެ.

ރާއްޖެއާއި ސްރީ ލަންކާއަށް ކަނޑައަޅައި، ކޮލަމްބޯގައި ހުންނަ އެމެރިކާގެ އެމްބަސީން ކުރި ޓްވީޓެއްގައި ބުނެފައިވަނީ، ޤަވާއިދާއި، އުސޫލުތަކާއި ޚިލާފަށް ކަންކަން ހިނގުމުގެ ސަބަބުން މާޗް 27 ވަނަ ދުވަހު މަޖިލީހުގައި މިނިވަން، އިންސާފުވެރި، ވޯޓެއް ނެގުމަށް ހުރަސްއެޅުނުކަމަށްޓަކައި ކަންބޮޑުވާ ކަމަށެވެ.

އެހެންކަމުން، މަޖިލީހުގައި ކުރެވޭ މަސައްކަތްތަކަކީ، މިނިވަން، ވަކި ފަރާތަކަށް ނުޖެހޭ މަސައްކަތްތަކަކަށް ހަދައި، ބޭއްވޭ އިންތިޚާބުތަކަކީ މިނިވަން އިންސާފުވެރި އިންތިޚާބުތަކަކަށް ހަދައި، ނޫސްވެރިކަމާއި، ޚިޔާލުފާޅުކުރުމާއި، އެއްވެއުޅުމުގެ އަސާސީ ޙައްޤު ކަށަވަރުކޮށްދީ، ޑިމޮކްރެޓިކް ނިޒާމަށް އިތުބާރު އާކޮށްދިނުމަށް ސަރުކާރަށް ގޮވާލާކަމަށް މި ބަޔާނުގައިވެއެވެ.

އެމެރިކާއިން މިފަދަ ބަޔާނެއް ނެރެފައި މިވަނީ، ރައްޔިތުންގެ މަޖިލީހުގެ ރައީސް، ޢަބްދުﷲ މަސީޙުގެ މައްޗަށް އިތުބާރު އޮތްތޯ ބެލުމަށް ހޯމަ ދުވަހު މަޖިލީހުގައި ކުރިއަށްގެންދިޔަ ޖަލްސާގައި ވޯޓުލުމުގެ ކަންކަން ރޯލް ކޯލް އުސޫލުން ގެންދިޔައީ ޤާނޫނުތަކާއި ޤަވާއިދުތަކާއި ޚިލާފަށް ކަމަށް އިދިކޮޅު ފަރާތްތަކުން ބުނެފައިވަނިކޮށެވެ.

މި ޓްވީޓް ކުރިތާ ފަނަރަ ވަރަކަށް މިނެޓްތެރޭގައި ޓްވީޓް ވަނީ ޑިލީޓްކޮށްލައިފަ އެވެ.