ރައީސް ނަޝީދު އެނބުރި ވަޑައިގަތުމުން ލޮލުން ކަރުނަ އައި: ޖެރަޑް ޖެންސަރ
ރާއްޖެއަށް ޒިޔާރަތްކުރުމުގެ އަވަސް ފުރުސަތަކަށް އުއްމީދުކުރައްވާ
ރައީސް ނަޝީދުގެ އެހެން ބައެއް ވަކީލުންނާއިއެކު ޖެރަޑް ޖެންސަރ (ކ-2)
ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުހައްމަދު ނަޝީދު އެނބުރި ރާއްޖެ ވަޑައިގެންނެވި މަންޒަރު ފެނުމުން ލޮލުން ކަރުނަ އައިކަމަށް ރައީސް ނަޝީދުގެ ބައިނަލްއަޤްވާމީ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޖެރަޑް ޖެންސަރ ވިދާޅުވެއްޖެއެވެ.
އިންސާނީ ހައްޤުތަކަށް މަސައްކަތްކުރާ ބައިނަލްއަޤްވާމީ މަޝްހޫރު ވަކީލު ޖެންސަރ ކުރެއްވި ޓްވީޓެއްގައި ވިދާޅުވީ ދިވެހި ރައްޔިތުންނަށްޓަކައި އުފާވާކަމަށެވެ. އަދި ވަރަށް އަވަހަށް ރާއްޖެއަށް ޒިޔާރަތްކުރައްވާނެކަމުގެ އިޝާރާތެއް ޖެންސަރ ދެއްވިއެވެ. މީގެ އިތުރުން އޭނާއަކީ ދިވެހި ދައުލަތުގެ ދުޝްމަނެއްގެ ގޮތުގައި ރައީސް އަބްދުﷲ ޔާމީން އަބްދުލްޤައްޔޫމް ސިފަކުރައްވާފައިވާކަމަށް އޭނާ ފާހަގަކުރެއްވިއެވެ.
ޖެރަޑް ޖެންސައަކީ ރައީސް ނަޝީދުގެ މައްސަލައިގައި އދގެ ވަރކިން ގްރޫޕް އޮން އާބިޓްރަރީ ޑިޓެންޝަން އާއި ހިއުމަން ރައިޓްސް ކައުންސިލްގައި ވަކާލާތު ކުރެއްވި ބައިނަލްއަޤްވާމީ ޤާނޫނީ ވަކީލުންގެ ޓީމުގެ އެއް ވަކީލެވެ. އަދި ރައީސް ނަޝީދު މިނިވަންކުރުމަށް ބައިނަލްއަޤްވާމީ ޕްރެޝަރ އިތުރުކުރުމަށް އެހެން ވަކީލުންނާއިއެކު އޭނާ މަސައްކަތްކުރެއްވިއެވެ.
ރައީސް ނަޝީދުގެ ބައިނަލްއަޤްވާމީ ޤާނޫނީ ވަކީލުންގެ ޓީމުގައި ހިމެނިވަޑައިގެންނެވި ބެން އެމަރސަންވެސް ވަނީ ޑިމޮކްރަސީ އަލުން އިޔާދަ ކުރެވުނީތީ ދިވެހި ރައްޔިތުންނަށް މަރުޙަބާ ދަންނަވާފައެވެ.
އެމަރސަން ވިދާޅުވީ ބުރަ މަސައްކަތް އަދި ފެށުނީ ކަމަށާއި، ދެން ކުރަން ޖެހޭކަމަކީ ރައީސް ޔާމީންގެ ސަރުކާރުން ހަދާފައިވާ ގޯސްތައް ރަނގަޅުކޮށް، ގޯސް ހެދި ފަރާތްތައް ޤާނޫނުގެ ކުރިމައްޗަށް ގެނައުންކަމަށެވެ. ބެން އެމަރސަން އަކީ އދގެ ކުރީގެ ސްޕެޝަލް ރެޕަރޓުއަރ އޮން ކައުންޓަރ ޓެރަރިޒަމް އެންޑް ހިއުމަން ރައިޓްސްގެ މަޤާމުގައި ހުންނެވި ބޭފުޅާއެވެ. އަދި އޭނާއަކީވެސް ބައިނަލްއަޤްވާމީ އިންސާނީ ހައްޤުތަކާއި ބެހޭ ޤާނޫނީ ވަކީލެކެވެ.
ރައީސް ނަޝީދުގެ ބައިނަލްއަޤްވާމީ ޤާނޫނީ ވަކީލުންގެ ޓީމުގައި ދެން ހިމެނިވަޑައިގެންނެވި ބޭފުޅަކީ އިންސާނީ ހައްޤުތަކާއި ބެހޭ ވަކީލު އާމާލް ކްލޫނީއެވެ.
