އަދިވެސް ބައެއް މެމްބަރުންގެ ނުރުހުންވުން މަސީހަށް!
މަޖިލިސް ރައީސްގެ ކާރުކޮޅާއި، ސެކިއުރިޓީއާއި އިނާޔަތްތައް ގެއްލިވަޑައިގަތީ މަސީހުގެ އަނިޔާވެެރިކަމުން: މުސްތަފާ
މަސީހު: މަޖިލީހުގެ ރައީސްކަމުން ވަނީ ވަކިކުރެވިފައި
ރައްޔިތުންގެ މަޖިލީހުގެ ރައީސްކަމުގެ މަޤާމުން އަބްދުﷲ މަސީޙު މުހައްމަދު ބުރާސްފަތި ދުވަހުގެ މެންދުރުފަހު އިސްތިއުފާ ދެއްވުމުންވެސް މަޖިލީހުގެ ބައެއް މެމްބަރުން މަސީހަށް ނުރުހުމުގެ ބަސްތަކެއް ސީދާކޮށް އަދި ނުސީދާކޮށް ވިދާޅުވެއްޖެއެވެ.
މަޖިލީހުގެ ރައީސްކަމަށް މެމްބަރުންގެ ބޮޑު އަޣުލަބިއްޔަތަކުން ހޮވިވަޑައިގެން މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމް މަޖިލިސް ރައީސްގެ ކާރުކޮޅުގައި ގެއަށް ވަޑައިގަތުމަށް ކާރުކޮޅަށް އަރާވަޑައިގެންނެވި ފޮޓޯއާއިއެކު ތިމަރަފުށީ ދާއިރާގެ މެމްބަރު މުހައްމަދު މުސްތަފާ ކުރެއްވި ޓުވީޓެއްގައި ވިދާޅުވީ މަޖިލިސް ރައީސްގެ ކާރުކޮޅާއި، ސެކިއުރިޓީއާއި އިނާޔަތްތައް ގެއްލިވަޑައިގަތީ މަސީހުގެ އަނިޔާވެެރިކަމުންކަމަށެވެ.
މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު، މަސީޙު އިސްތިއުފާ ދެއްވުމާއިއެކު ކުރެއްވި ޓުވީޓެއްގައި ވިދާޅުވީ މަސީހު މަޖިލިސް މެމްބަރުން ޖަލަށް ލައްވައި، މެމްބަރުގެ ގޮނޑި ޤާނޫނާއި ޚިލާފަށް ގެއްލުވައި، ސިފައިން މަޖިލީހަށް ވެއްދިކަމަށެވެ. އަދި އެކަން ކުރެއްވީ ހަމައެކަނި ގޮނޑި ދިފާޢުކުރެއްވުމަށްފަކަމަށް ޝާހިދު ވިދާޅުވިއެވެ.
މަސީހުގެ އިސްތިއުފާގެ ވާހަކަ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފުވެސް ޓުވިޓަރގައި ހާމަކުރެއްވީ ފާޑުވިދާޅުވުމާއިއެކުގައެވެ. އެގޮތުން މަހުލޫފު ވިދާޅުވީ، "މަޖިލީހުގެ ރައީސްގެ މަޤާމުގަ ސިފައިންނާއި ފުލުހުން ބޭނުންކޮށްގެން، މަޖިލިސް ގޭޓުގައި ތަޅު އަޅުވައިގެން، ރިޔާސަތު ވަށައިގެން ބޮޑު ފާރެއް ރާނައިގެން އިން އަނިޔާވެރި މަސީޙު އިސްތިއުފާ ދީފި" ކަމަށެވެ.
މީގެ އިތުރުންވެސް ރައްޔިތުންގެ މަޖިލީހުގެ އެހެން ބައެއް މެމްބަރުންވެސް ވަނީ މަސީހުއަށް ފާޑުވިދާޅުވެ ވާހަކަ ދައްކަވާފައެވެ. ޚާއްސަކޮށް މަސީހުގެ އިތުބާރު ނެތްކަމަށް މިދިޔަ އަހަރު ވެއްދި މައްސަލައިގައި ސޮއެކުރުމުން ގޮނޑި ގެއްލުނުކަމަށް ނިންމި 12 މެމްބަރުން ވަނީ މަސީހަށް ފާޑުވިދާޅުވެފައެވެ.
