'ބާރަތު'ގެ ޝޫޓިންގައި ނަގާފައިވާ ފޮޓޯތަކެއް ލީކްވެއްޖެ

ސަލްމާން ޚާންގެ ފިލްމް "ބާރަތު"ގައި އޭނާގެ ތަފާތު ފަސް ސިފައެއް ފެނިގެން ދާނެ ކަމަށް ރިޕޯޓްތައް ބުނެފައި ވަނިކޮށް އެ ފިލްމުގައި ސަލްމާން ފެނިގެންދާނެ ދެ ސިފައެއްގެ ފޮޓޯ ލީކް ވެއްޖެއެވެ.

ސަލްމާންގެ ފޭން ކްލަބުން ހިއްސާކޮށްފައިވާ މި ދެ ފޮޓޯގެ ތެރެއިން އެއް ފޮޓޯގައި ސަލްމާން ފެނިގެން ދަނީ ގަޔަށް ބާރުކޮށް ހުރި ގޮޅި ޖެހި ގަމީހެއްގައެވެ. އަނެއް ފޮޓޯގައި ސަލްމާން ފެނިގެން ދަނީ ވެއިސްޓް ކޯޓެއްގައި އިސްތަށިގަނޑު ފަހަތަށް ވާގޮތަށް ބޮލީގައި ފުނާ އަޅާފައި ހުއްޓައެވެ. މި ފޮޓޯ ބެލެވެނީ އަބޫދާބީގައި ޝޫޓިން ކުރިއަށް ދިޔައިރު ސެޓްގައި ނަގާފައިވާ ފޮޓޯއެއް ކަމަށެވެ.

އަލީ އައްބާސް ޒަފަރު ޑައިރެކްޓްކުރާ މި ފިލްމްގައި ސަލްމާންގެ އުމުރުން 18 އަހަރާއި 70 އަހަރާ ދެމެދުގެ ފަސް ސިފައެއް ފެނިގެން ދާނެއެވެ. އެގޮތުން ސަލްމާން އޭނާގެ ޒުވާން ދުވަސްވަރު ކެރިއަރ ފެށުނުއިރު ކުޅެފައިވާ ފިލްމް މައިނޭ ޕްޔާރްކިޔާ އިން ފެނިގެންދާ ގޮތުން ފެށިގެން މިހާރާއި ހަމައަށް ދައްކުވައިދޭނެއެވެ.

މީގެ ކުރިން ވެސް ވަނީ "ބާރަތު"ގެ ސެޓްގައި އޭނާގެ ފޭންއަކާ އެކު ނަގާފައިވާ ފޮޓޯއެއް ލީކް ވެފައެވެ.

އަލީ ވެސް ވަނީ "ބާރަތު"ގެ އޮފިޝަލް ޕޭޖްގައި އެ ފިލްމްގެ ޝޫޓިންގެ ތެރެއިން ނަގާފައިވާ ފޮޓޯއެއް ހިއްސާކޮށްފައެވެ. ނަމަވެސް އެ ފޮޓޯގައި ސަލްމާންގެ ސިފަ އެހާ ބޮޑަށް ސާފެއް ނުވެއެވެ.

"ބަރާތު"ގައި ސަލްމާނާ އެކު ކުރިން ލީޑް ރޯލް ކުޅުމަށް ހަމަޖެހިފައި އޮތީ ޕްރިޔަންކާ ޗޯޕްޅާއެވެ. ނަމަވެސް އެމެރިކާގެ ލަވަކިޔުންތެރިޔާ ނިކް ޖޯނަސްއާ ކައިވެނި ކުރުމަށް ޕްރިޔަންކާ ވަނީ އެ ފިލްމް ދޫކޮށްލާފައެވެ. އެ ރޯލަށް ފަހުން ހަމަޖައްސާފައި ވަނީ ކެޓްރީނާ ކައިފެވެ.

އަންނަ އަހަރުގެ ޖޫން މަހުގެ 5 ގައި ރިލީޒްކުރާ މި ފިލްމް "ބާރަތު" ގައި ސަލްމާން އާއި ކެޓްރީނާގެ އިތުރުން މުހިއްމު ރޯލްތަކުގެ ފެނިގެންދާ ތަރިންގެ ތެރޭގައި ތައްބޫ އާއި ދިޝާ ޕަޓާނީ ހިމެނެއެވެ.