ބަޑިޖެހުމުގެ ހާދިސާއާ ގުޅިގެން ލަންކާގެ ކުރީގެ ވަޒީރު އަރުޖުނާ ހައްޔަރުކޮށްފި

ދެމަތަގޮޑާގައި ހުންނަ ސިލޯން ޕެޓްރޯލިއަމް ކޮޕަރޭޝަން (ސީޕީސީ) އޮފީހުގައި ހިނގި ބަޑިޖެހުމުގެ ހާދިސާއާ ގުޅިގެން ސްރީލަންކާގެ ކުރީގެ ވަޒީރު އަރުޖުނާ ރަނަތުންގައި ހައްޔަރުކޮށްފިއެވެ.

އަރްޖުނާ ރަނަތުންގާ އަށް ޙަމަލާދޭން މަސައްކަތްކުރި ބަޔަކަށް އޭނާގެ ބޮޑީގާޑުން ޙަމަލާދިނުމާ ގުޅިގެން އޭގެ ތެރެއިން އެކަކުވީ އާދީއްތަ ދުވަހު މަރުވެފައެވެ.

ރަނަތުންގާގެ ބޮޑީގާޑުންގެ ގޮތުގައި މަސައްކަތްކުރަނީ ލަންކާގެ ސްޕެޝަލް ޓާސްކް ފޯސްގެ ސިފައިންނެވެ. ރަނަތުންގާގެ ހިމާޔަތުގައި ސިފައިން ބަޑި ޖެހުމުގެ ސަބަބުން އިތުރު ބަޔަކަށް ވެސް ހޮސްޕިޓަލުގައި ފަރުވާދޭންޖެހުނެެވެ.

ކޮޮލަމްބޯ ކްރައިމް ޑިވިޝަނުން ރަނަތުންގާ ހައްޔަރުކުރީ ބަޑިޖެހުމުގެ އެ ހާދިސާގައި ބައިވެރިވިކަމުގެ ތުހުމަތުގައެވެ.

ކޮލަމްބޯގެ މެޖިސްޓްރޭޓް ކޯޓަށް ހާޒިރުކުރުމުން ކަފާލާތުގެ ދަށުން އޭނާ ވަނީ ދޫކޮށްލާފައެވެ.

ސިލޯން ޕެޓްރޯލިއަމް ކޮޕަރޭޝަންގެ މުވައްޒަފަކު މަރުވުމާ ގުޅިގެން ޕެޓްރޯލިއަމް ޓްރޭޑް ޔޫނިއަންތަކުން ވަނީ މުޒާހަރާ ފަށާފައެވެ.

ޔޫނިއަންތަކުންދަނީ މަރުގެ މައްސަލައިގައި ރަނަތުންގާ ހައްޔަރުކުރުމަށް ގޮވާލަމުންނެވެ.

ބަޑި ޖެހުމުގެ ހާދިސާ ހިނގާފައި ވަނީ އެ ހާދިސާ ހިނގި ސަރަހައްދަށް ރަނަތުންގާ ވަޑައިގެންނެވިތަނުންނެވެ.

ހާލަތު ގޯސްވެގެންދިޔައީ ރަނަތުންގާ އަށް ބަޔަކު އަނިޔާކުރަން މަސައްކަތްކުުރުމުންނެވެ.

ބަޑިޖެހުމުގެ ހާދިސާއާ ގުޅިގެން ރަނަތުންގާގެ ބޮޑީގާޑެއް ވަަނީ ހައްޔަރުކޮށްފައެވެ.