މަޖިލީހުގެ ރިޔާސަތު ޤާސިމް ފުރިހަމައަށް ބަލަހައްޓަވާނެ: ރައީސް ނަޝީދު
ރައީސް ނަޝީދު ވަނީ، ޤާސިމް އިބްރާހިމަށް މަރުހަބާ ދަންނަވާފައި
ރައީސް މުހައްމަދު ނަޝީދު، އިންތިހާބީ ރައީސް އިބްރާހިމް މުހައްމަދު ސޯލިހާއެކު
ޖުމްހޫރީ ޕާޓީގެ ލީޑަރު ޤާސިމް އިބްރާހިމް، ރައްޔިތުންގެ މަޖިލީހުގެ ރިޔާސަތު ފުރިހަމައަށް ބަލަހައްޓަވާނެކަމާއިމެދު ޝައްކު ނުކުރައްވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ގުޅިފައިވާ ޕާޓީތަކުގެ ފަރާތުން މަޖިލީހުގެ ރައީސްކަމަށް ޤާސިމް އިބްރާހިމްގެ ނެރުމަށް ނިންމާފައިވާއިރު، ޕާޓީތަކުން ވަނީ ޤާސިމަށް ވޯޓު ދިނުމަށްވެސް އެއްބަސްވެފަ އެވެ. އެގޮތަށް ނިންމީ ގުޅިފައިވާ އިއްތިހާދު ޕާލިމެންޓްރީ ގުރޫޕްގެ ބައްދަލުވުމަށްފަހު އެވެ.
ޤާސިމް އިބްރާހިމް މަޖިލީހުގެ ރައީސްކަމަށް ނެރުމަށް ގުޅިފައިވާ ޕާޓީތަކުން ނިންމުމާއެކު، އެ މަޤާމަށް އެންމެ ގާބިލް ބޭފުޅަކީ ޤާސިމްތޯ ގިނަ ބަޔަކު ގެންދަނީ ސުވާލު އުފައްދަމުންނެވެ. އަދި މަޖިލީސް ރައީސްކަމަށް ޤާސިމް ނެރުމަށް ނިންމީ ކޮން އުސޫލެއްގެ މަތިންތޯވެސް ސުވާލު އުފައްދަމުންގެންދާއިރު، ޤާސިމް އިބްރާހިމަށް އެންމެ ބޮޑު ފާޑުކިޔުމެެއް އަމާޒުވެގެންދަނީ އެމްޑީޕީގެ ސަޕޯޓަރުންގެ ފަރާތުންނެވެ.
ޤާސިމަށް އެ ފާދުކިޔުންތައް އަމާޒުވަމުން ދަނިކޮށް، ހޯމަ ދުވަހުގެރޭ ކުރެއްވި ޓުވީޓެއްގައި އެމްޑީޕީގެ ރައީސްކަންވެސް ކުރައްވާ ކުރީގެ ރައީސް މުހައްމަދު ނަޝީދު ވިދާޅުވީ ގުޅިފައިވާ ޕާޓީތަކުގެ މަޖިލީސް މެމްބަރުން ވަނީ މަޖިލީހުގެ ރައީސްކަމަށް ޤާސިމް ގެނައުމަށް އެއްބަސްވެފައިކަމަށެވެ. އަދި ޤާސިމް ފުރިހަމައަށް މަޖިލީހުގެ ރިޔާސަތު ބަލަހައްޓަވާނެކަމާއިމެދު ސުވާލު ނުއުފެއްދޭކަމަށް ވިދާޅުވަމުން ރައީސް ނަޝީދު ވަނީ ޤާސިމް އިބްރާހިމަށް މަރުހަބާވެސް ދަންނަވާފަ އެވެ.
މިހާރު ރައްޔިތުންގެ މަޖިލީީހުގެ ރައީސްގެ މަޤާމުގައި ހުންނެވި އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލައެއް ގުޅިފައިވާ އިއްތިހާދުން ޕީޕީއެމް/އެމްޑީއޭ ކޯލިޝަންގެ ބައެއް މެމްބަރުންގެ ސޮޔާއެކު މަޖިލީހަށް ހުށަހަޅުއްވާފައިވާއިރު، މަސީހުއަށް މަޖިލީހުގެ ރިޔާސަތު ގެއްލޭނެކަމަށް ޕީޕީއެމަށް ނިސްބަތްވެވަޑައިގަންނަވާ މެމްބަރުންވެސް ގަބޫލުކުރައްވަ އެވެ. އެގޮތުން މަޖިލީހުގެ ރައީސްގެ މަޤާމު ހުސްވުމާއެކު މަޖިލީހުގެ ރައީސްކަމަށް ވާދަކުރައްވާނެކަން ޕީޕީއެމްގެ ނައިބް ލީޑަރު އަބްދުއްރަހީމް އަބްދުﷲވެސް ވަނީ ހާމަކުރައްވާފަ އެވެ.
