ސްރީލަންކާގެ ބޮޑުވަޒީރުކަމުން ރަނިލް ވިކްރަމަ ސިންހަ ވަކިކުރުމަށް ފަހު ރައީސް ސިރިސޭނާ ގެންނަވަމުންދާ ބަދަލުތަކުގެ ތެރެއިން ޓްރާންސްޕޯޓް މިނިސްޓަރކަމާއި ފޮރިން މިިނިސްޓަރ ކަމަށް ބޭފުޅުން އައްޔަން ކުރައްވައިފިއެވެ.
ޔުނައިޓެޑް ޕީޕަލްސް ފްރީޑަމް އެލަޔަންސްއަށް ނިސްބަތްވެ ވަޑައިގަންނަވާ މެމްބަރު ސިރިޕަލާ ޑި ސިލްވަރ މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ މަގާމަށް އައްޔަން ކުރައްވާފައިވާއިރު ފޮރިން މިނިސްޓަރގެ މަގާމަށް އައްޔަން ކުރައްވާފައިވަނީ ޑރ ސަރަތު އަމުނުގަމައެވެ.
ކުއްލި ގޮތަކަށް ލަންކާގެ ބޮޑުވަޒީރު ކަމުން ރަނިލް ދުރުކޮށް، ރައީސް މައިތިރިޕާލާ ސިރިސޭނާ ވަނީ ކުރީގެ ރައީސް މަހިންދަ ރާޖަޕަކްސަ ބޮޑުވަޒީރު ކަމަށް އައްޔަން ކުރައްވާފައެވެ. ނަމަވެސް ރަނިލް އަށް ތާއީދުކުރާ ފަރާތްތަކުން ބުނަނީ ރާޖަޕަކްސަ ބޮޑުވަޒީރު ކަމަށް އައްޔަން ކުރީ ޤާނޫނާއި ޚިލާފަށް ކަމަށެވެ. އަދި ލަންކާގެ ޤާނޫނު ހަދާ މަޖިލީހުގެ ރައީސް ކަރޫ ޖަޔަސޫރިޔާ ވަނީ އަދިވެސް ބޮޑުވަޒީރަކީ ރަނިލް ކަމަށް އެމަނިކުފާނު ޤަބޫލުފުޅުކުރައްވާ ކަމަށް ވިދާޅުވެފައެވެ.
މީގެ އިތުރުން ރަނިލްގެ އިނާޔަތްތައް ކަނޑާލުމަށް ރައީސް ސިރިސޭނާ ނިންމެވި ނިންމެވުމަށް ފާޑުވިދާޅުވެ، މައްސަލަ ވަކި ގޮތަކަށް ނިމެންދެން ރަނިލްގެ އިނާޔަތްތައް އެމަނިކުފާނަށް ދިނުމަށް ޖަޔަސޫރިޔާ ވަނީ ސިރިސޭނަ އަށް ސިޓީ އަކުން ދަންނަވާފައެވެ.
ޖަޔަސޫރިޔާގެ އެންގެވުމަށް ބެލުމެއްނެތި ރަނިލްގެ ސެކިއުރިޓީގައި ހިމެނޭ 1008 މީހުންގެ އަދަދު 10 މީހުންނަށް މަދުކޮށްފައިވާ ކަމަށް ފުލުހުންވަނީ ބުނެފައެވެ.
ފުލުހުންގެ ތަރުޖަމާނު ރުވާން ގުނަސޭކަރަ ވިދާޅުވެފައިވަނީ ސަލާމަތީ ކަންކަމުގައި މަސައްކަތްކުރި މީހުންގެ އަދަދު މަދުކުރި ނަމަވެސް ސަލާމަތީ ކަންކަންހުރި ފެންވަރަށް ބަދަލެއް ނާންނާނެ ކަމަށެވެ.
