އިސްރާއީލްގެ ބޮޑުވަޒީރު ނަތަންޔާހޫ އޮމާންގައި

އިސްރާއީލުގެ ވެރިއަކު ވޭތުވެ ދިޔަ 24 އަހަރުގެ ތެރޭގައި އޮމާނަށް ކުރައްވާ ފުރަތަމަ ދަތުރުފުޅުގައި ބޮޑުވަޒީރު ބެންޖަމިން ނަތަންޔާހޫ އެ ގައުމަށް ވަޑައިގެންފިއެވެ.

ނަތަންޔާހޫގެ މި ދަތުރުފުޅު އައިސްފައި މި ވަނީ ފަލަސްތީނުގެ ރައީސް މަހުމޫދު އައްބާސް އޮމާނަށް ދަތުރު ކުރެއްވިތާ ތިން ވަނަ ދުވަހުއެވެ.

މި ދަތުރުފުޅަކީ އިސްރާއީލާ ގަލްފުގެ ގައުމުތަކާ މެދު ގުޅުން ބަދަހި ވަމުންދާ ކަމުގެ ނިޝާނެކެވެ.

އަވަށްޓެރި އަރަބި ގައުމުތަކާ އިސްރާއީލާ ގުޅުން ރަނަގަޅުވުމާ އެކު އިސްރާއީލާއި، ފަލަސްތީނުގެ ވެރިން އެމެރިކާ އަށް އެއްބާރުލުންދީ ރައީސް ޓްރަމްޕް ވިދާޅުވާ " ގަރުނުގެ އެއްބަސްވުން" އަށް ގޮސް އިސްރާއީލާ ފަލަސްތީނުގެ މައްސަލައަށް ނިމުން ގެނެވޭނެކަމަށް ގިނަ އަދަދެއްގެ އަރަބި ގައުމުތަކުން ދެކެއެވެ.

އީރާނުން ވަނީ ނަތަންޔާހުގެ ދަތުރުފުޅަކީ މުސްލިމް ގައުމުތަކުގެ މެދުގައި ބައިބައިވުން އުފެއްމަށް ކުރައްވާ ދަތުރުފުޅެއް ކަމަށް ބުނެފައެވެ.

ނަތަންޔާހޫ ވިދާޅުވެފައި ވަނީ އިސްރާއީލާ އެއްގޮތަށް އެހެން ގައުމުތައް ވެސް އީރާނާ ދެކޮޅުވުމުގެ ސަބަބުން ގަލްފްގެ އަރަބި ގައުމުތަކާ އިސްރާއީލާ ގާތްކަން އުފެދިފައިވާކަމަށެވެ.