ދިވެހި ފެތުންތެރިންނާއި ކޯޗުން އިންތިހާބީ ރައީސް އިބްރާހިމް މުހައްމަދު ސޯލިހަށް މަރުހަބާ ކިޔައި އުފާފާޅުކުރުމަށް ހަފުލާ އެއް ބާއްވައިފި އެވެ.
ހޮނިހިރު ދުވަހުގެ ހަވީރު ސްވިމިން ޓްރެކް ސަރައްދުގައި ބޭއްވި އުފާފާޅުކުމުގެ ހަރަކާތުގައި ނިއު ލެގޫންސް ކުލަބާއި މޯލްޑިވްސް ލައިފް ގާޑް އެސޯސިއޭޝަންގެ އިސް ވެރިންނާއި ކޯޗުންނާއި އަދި ފެތުންތެރިން ބައިވެރި ވިއެވެ. ސްކޫލުތަކުން ފެތުމުގައި ހަރަކާތްތެރިވާ ދަރިވަރުންނާއި އެ ދަރިވަރުންގެ ބެލެނިވެރިން ވެސް އެ އިވެންޓްގައި ބައިވެރިވި އެވެ.
މި ހަރަކާތުގެ ތެރޭގައި ފެތެންތެރިންނަށް ހުރި ދަތިތައް އިންތިހާބީ ރައީސް ސޯލިހަށް ހިއްސާކުރި އެވެ. އެގޮތުން ފެތުންތެރިންނަށް ހާއްސަ ކޮށްފައިވާ ރަނގަޅު ސުވިމިންގ ޕޫލެއް ނެތުމުން، ރާއްޖެ އިން ބޭރުގެ އެކި މުބާރާތްތަކަށް ޕްރެކްޓިސް ކުރަން ދަތިތައް ކުރިމަތި ވާކަން ވެސް ހިއްސާކުރިއެވެ.
އިންތިހާބީ ރައީސް ފެތުންތެރިންނާ ބައްދަލު ކުރައްވަން ވަޑައިގައި ގެންނެވުމުން އާ ސަރުކާރާ މެދު ކުރެވޭ އުއްމީދު ބޮޑުކަން ވެސް ބައެއް ފަރާތްތަކުން ފާހަގަ ކުރެއްވި އެވެ. މި ހަފުލާ ކުރި އަށް ގެންދިޔައީ ހަވީރު ސަޔާއެކު އެވެ.
